ನವದೆಹಲಿ: ದೇಶಕ್ಕೆ ಮರಳಿದ್ರೆ, ಅವರನ್ನು ಗಲ್ಲಿಗೇರಿಸಲಾಗುವುದು ಎಂಬ ಬಾಂಗ್ಲಾದೇಶದ ಪ್ರಾಸಿಕ್ಯೂಟರ್ ಹೇಳಿಕೆಗೆ ಸಂಬಂಬಂಧಿಸಿದಂತೆ ಪ್ರತಿಕ್ರಿಯಿಸಿರುವ ಮಾಜಿ ಪ್ರಧಾನಿ ಶೇಖ್ ಹಸೀನಾ, ಗುರುವಾರ(ನ. 12) ಬಂಧನ, ಜೈಲು ಶಿಕ್ಷೆ ಅಥವಾ ಸಾವಿನ ಬೆದರಿಕೆ ನಾನು ದೇಶಕ್ಕೆ ಮರಳವುದನ್ನು ತಡೆಯಲು ಸಾಧ್ಯವಿಲ್ಲ. ನನ್ನ ಜನರಿಂದ ದೂರವಿರುವುದಕ್ಕಿಂತ ತಾಯ್ನಾಡಿನಲ್ಲಿ ಸಾಯುವುದೇ ಲೇಸು ಎಂದು ಹೇಳಿದ್ದಾರೆ.
ಸುದ್ದಿ ಸಂಸ್ಥೆ IANSಗೆ ನೀಡಿದ ಆಡಿಯೋ ಸಂದರ್ಶನದಲ್ಲಿ ಮಾತನಾಡಿರುವ ಅವರು, ನೋಡಿ, ನನಗೆ ಅಪಾಯಗಳು ಚೆನ್ನಾಗಿ ಅರ್ಥವಾಗಿವೆ. ನಾನು ಆ ದೇಶಕ್ಕೆ ಕಾಲಿಟ್ಟ ಕ್ಷಣದಲ್ಲೇ ನನ್ನನ್ನು ಬಂಧಿಸಬಹುದು, ಜೈಲಿಗೆ ಕಳುಹಿಸಬಹುದು. ಕೊಲ್ಲಲು ಸಹ ಪ್ರಯತ್ನಿಸಬಹುದು. ಈ ಎಲ್ಲಾ ಸಾಧ್ಯತೆಗಳನ್ನು ನನಗೆ ತಿಳಿದಿದೆ ಎಂದಿದ್ದಾರೆ.
ಆದರೆ, ನಿಮಗೆ ಗೊತ್ತಾ, ನಾನು ಬಹಳ ಹಿಂದೆಯೇ ನನ್ನ ವೈಯಕ್ತಿಕ ಸುರಕ್ಷತೆಯ ಬಗ್ಗೆ ಚಿಂತಿಸುವುದನ್ನು ನಿಲ್ಲಿಸಿದ್ದೇನೆ. ಮಿಲಿಟರಿ ಆಡಳಿತದ ಹೊರತಾಗಿಯೂ ನಾನು 1981ರಲ್ಲಿ ಬಾಂಗ್ಲಾದೇಶಕ್ಕೆ ಮರಳಿದೆ. ಮಿಲಿಟರಿ ಬೆಂಬಲಿತ ಸರ್ಕಾರವು ನನ್ನನ್ನು ಬಂಧಿಸಬಹುದು ಎಂದು ತಿಳಿದಿದ್ದರೂ ನಾನು 2007ರಲ್ಲಿ ಮತ್ತೆ ಮರಳಿದೆ. ನಾನು ಜೈಲು ಶಿಕ್ಷೆ ಮತ್ತು ನನ್ನ ಮೇಲೆ ಪದೇ ಪದೇ ಪ್ರಯತ್ನಗಳನ್ನು ಎದುರಿಸಿದ್ದೇನೆ. ನಾನು ಸರಿ ಎಂದು ನಂಬುವುದನ್ನು ಮಾಡುವುದರಿಂದ ಭಯವು ನನ್ನನ್ನು ಎಂದಿಗೂ ತಡೆಯಲಿಲ್ಲ ಎಂದು ಹೇಳಿದ್ದಾರೆ.
