ಕೇರಳಂನಲ್ಲಿ ಕದನ ಕುತೂಹಲ

ಆದರೆ ಅದರಲ್ಲಿ ಹೆಚ್ಚಿನ ಅಯ್ಯಪ್ಪ ಭಕ್ತರು ಪಾಲ್ಗೊಳ್ಳದೆ, ಸರ್ಕಾರ ತೀವ್ರ ಮುಜುಗರವನ್ನೂ ಎದುರಿಸಬೇಕಾಯಿತು. ಇದರ ಬೆನ್ನಲ್ಲೇ ಬೆಳಕಿಗೆ ಬಂದ ಅಯ್ಯಪ್ಪ ದೇಗುಲದ ಚಿನ್ನಾಭರಣ ಕಳವು ಪ್ರಕರಣ ವಿಪಕ್ಷಗಳಿಗೆ ಅಸ್ತ್ರವಾಗಿದೆ. ಇವೆಲ್ಲದರ ನಡುವೆ, ನಟ ಮೋಹನ್​ಲಾಲ್ ಅವರು ಪಿಣರಾಯಿ ವಿಜಯನ್ ಅವರನ್ನು ಸಂದರ್ಶಿಸುವ ವಿಡಿಯೋವನ್ನು ಬಿತ್ತರಿಸಿ, ಸಿಎಂ ಜನಪ್ರಿಯತೆಯನ್ನು ಹೆಚ್ಚಿಸುವ ಪ್ರಯತ್ನವೂ ನಡೆದಿದೆ. ಮೂರನೇ ಬಾರಿಗೆ ಅಧಿಕಾರಕ್ಕೆ ಏರುವ ತವಕದಲ್ಲಿ ಎಲ್​ಡಿಎಫ್ ಇದೆ. ಮತದಾರ ಮತ್ತೆ ರೆಡ್ ಸೆಲ್ಯೂಟ್ ಹಾಕುವನೇ?

ಕೈಗೆ ಇಂದಿರಾ ಗ್ಯಾರಂಟಿ ಬಲ: ಕಾಂಗ್ರೆಸ್ ನೇತೃತ್ವದ ಯುಡಿಎಫ್ ಗ್ಯಾರಂಟಿ ಎಂಬ ಹಿಟ್ ಫಾಮುಲಾವನ್ನು ದೇವರನಾಡಿನಲ್ಲೂ ಪ್ರಯೋಗಿಸಿದೆ. ಮನೆಮನೆಗೆ ತೆರಳಿ ಕಾರ್ಯಕರ್ತರು ಉಚಿತ ಯೋಜನೆಗಳ ಪ್ರಚಾರ ಮಾಡುತ್ತಿದ್ದಾರೆ. ಮುಸ್ಲಿಂ ಪ್ರಾಬಲ್ಯ ಹೆಚ್ಚಿರುವ ಜಿಲ್ಲೆಗಳಲ್ಲಿ ಮುಸ್ಲಿಂ ಲೀಗ್ ಕಾರ್ಯಕರ್ತರು ಕಾಂಗ್ರೆಸ್ ಪರ ಹಗಲಿರುಳು ದುಡಿಯುತ್ತಿರುವುದು ಪಕ್ಷದ ಬಲವರ್ಧನೆಗೆ ಪೂರಕವಾಗಿದೆ. ಸಾರ್ವಜನಿಕ ಪ್ರತಿಭಟನೆ ವೇಳೆ ಅನೇಕ ಕಾಂಗ್ರೆಸ್ ಕಾರ್ಯಕರ್ತರ ಮೇಲೆ ಎಲ್​ಡಿಎಫ್ ಸರ್ಕಾರ ದಬ್ಬಾಳಿಕೆ ಮಾಡಿದೆ, ಪೊಲೀಸ್ ಕೇಸ್ ಹಾಕಲಾಗಿದೆ ಎಂಬುದು ಕೈ ಪಕ್ಷದ ಆರೋಪ. ಗ್ಯಾರಂಟಿ ಯೋಜನೆ ಕೇರಳದಲ್ಲಿಯೂ ಗೆಲುವಿಗೆ ಸುಲಭ ಹಾದಿಯಾದೀತೇ? ರಾಹುಲ್ ಗಾಂಧಿ, ಪ್ರಿಯಾಂಕಾ ವಾದ್ರಾ, ಕರ್ನಾಟಕ ಸಿಎಂ ಸಿದ್ದರಾಮಯ್ಯ, ಡಿಸಿಎಂ ಡಿ.ಕೆ.ಶಿವಕುಮಾರ್ ಮಾಡಿದ ಚುನಾವಣಾ ಪ್ರಚಾರ ಫಲ ನೀಡುವುದೇ? ಒಂದೊಮ್ಮೆ ಗೆದ್ದರೆ ಸಿಎಂ ಗದ್ದುಗೆಗೇರಲು ರಾಹುಲ್ ಗಾಂಧಿ ನಿಕಟವರ್ತಿ ಕೆ.ಸಿ.ವೇಣುಗೋಪಾಲ್, ಹಿರಿಯ ಮುಖಂಡ ರಮೇಶ್ ಚೆನ್ನಿತ್ತಲ, ಕೆಪಿಸಿಸಿ ಅಧ್ಯಕ್ಷ ವಿ.ಡಿ.ಸತೀಶನ್, ನಾಯಕ ಶಶಿ ಥರೂರ್ ತುದಿಗಾಲಲ್ಲಿ ನಿಂತಿದ್ದಾರೆ.

ಮೋದಿ ಮ್ಯಾಜಿಕ್ ಆದೀತೆ...: ಕೇರಳಂನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರೇ ಎನ್​ಡಿಎಗೆ ಬಲ. ಕೇಂದ್ರ ಸಚಿವ, ನಟ ಸುರೇಶ್ ಗೋಪಿ ಅವರನ್ನು ಹೊರತುಪಡಿಸಿದರೆ, ಸ್ಥಳೀಯ ನಾಯಕರು ಅಧಿಕಾರದ ರುಚಿ ಕಂಡವರಲ್ಲ. ಒ.ರಾಜಗೋಪಾಲ್ ರಾಜಕೀಯದಲ್ಲಿ ಈಗ ಸಕ್ರಿಯರಲ್ಲ. ಲೋಕಸಭಾ ಚುನಾವಣೆ ಮಾದರಿಯಲ್ಲಿ ಕ್ರಿಶ್ಚಿಯನ್ ಮತಗಳನ್ನೇ ಹೆಚ್ಚು ಕೇಂದ್ರೀಕರಿಸಿ ಎನ್​ಡಿಎ ಪ್ರಚಾರ ಮಾಡಿದೆ. ಹೆಚ್ಚಿನ ಸಂಖ್ಯೆಯಲ್ಲಿ ಆರ್​ಎಸ್​ಎಸ್ ಶಾಖೆಗಳಿರುವ ಈ ರಾಜ್ಯದಲ್ಲಿ ಸ್ವಯಂಸೇವಕರು ಬಿಜೆಪಿ-ಎನ್​ಡಿಎ ಗೆಲುವಿಗೆ ಮನೆಮನೆ ಸಂಪರ್ಕ ಮಾಡುತ್ತಿದ್ದಾರೆ.

ಪಿಣರಾಯಿ ನೇತೃತ್ವದ ಎಲ್​ಡಿಎಫ್ ಅನ್ನು ಮತ್ತೆ ಅಧಿಕಾರಕ್ಕೆ ಏರದಂತೆ ಮಾಡುವ, ರಾಹುಲ್ ಗಾಂಧಿ ನಾಯಕತ್ವದ ಕಾಂಗ್ರೆಸ್ ನಾಗಾಲೋಟಕ್ಕೂ ಅಂಕುಶ ಹಾಕುವ ಉದ್ದೇಶದಿಂದ ಎನ್​ಡಿಎ ವಿಕಸಿತ ಕೇರಳಂ ಎಂಬ ಪರಿಕಲ್ಪನೆಯೊಂದಿಗೆ ಮತದಾರರನ್ನು ಓಲೈಸುತ್ತಿದೆ. ಮೂಲಸೌಕರ್ಯ, ಸಂಚಾರ ಸೌಲಭ್ಯ, ಕೊಚ್ಚಿ ಮೆಟ್ರೋ-ನಗರ ಸಾರಿಗೆ, ಆರೋಗ್ಯ, ಶಿಕ್ಷಣ, ಉದ್ಯೋಗ ಸೃಷ್ಟಿ, ಪ್ರವಾಸೋದ್ಯಮ, ಉತ್ತಮ ಆಡಳಿತ ಎಂಬ ಭರವಸೆಯ ಮಾತುಗಳಿಗೆ ಮತದಾರನ ಕಿವಿಗೊಟ್ಟಾನೇ? ಪ್ರಧಾನಿ ನರೇಂದ್ರ ಮೋದಿ, ನಾಯಕಿ ಸ್ಮೃತಿ ಇರಾನಿ, ಬೆಂಗಳೂರು ಸಂಸದ ತೇಜಸ್ವಿ ಸೂರ್ಯ, ತಮಿಳುನಾಡಿನ ಫೈರ್ ಬ್ಯ್ರಾಂಡ್ ಅಣ್ಣಾಮಲೈ, ನಟಿ ಖುಷ್ಬೂ ಕೇರಳದಲ್ಲಿ ಸುತ್ತಾಡಿದ್ದಾರೆ. ಇವರ ಈ ನಡೆ ಮತವಾಗಿ ಬದಲಾದೀತೇ? ಶಬರಿಮಲೆ ವಿವಾದ ಕಮಲ ಪಡೆಗೆ ಶಕ್ತಿ ತುಂಬೀತೇ? ಕಾದುನೋಡಬೇಕು.