AI ಬಳಕೆಗೆ ಜವಾಬ್ದಾರಿಯಾಗಿರಬೇಕು; ನಿಮ್ಮ ತಪ್ಪುಗಳಿಗೆ ಅದನ್ನು ದೂಷಿಸಲು ಸಾಧ್ಯವಿಲ್ಲ: ಬ್ಯಾಂಕ್‌ಗಳಿಗೆ ಆರ್‌ಬಿಐ ಗವರ್ನರ್ ಎಚ್ಚರಿಕೆ | RBI Governor

ಮುಂಬೈ: ಬ್ಯಾಂಕುಗಳು ಕೃತಕ ಬುದ್ಧಿಮತ್ತೆಯ ಬಳಕೆಯಲ್ಲಿ ಅತ್ಯಂತ ಜವಾಬ್ದಾರಿಯಿಂದ ಕಾರ್ಯನಿರ್ವಹಿಸಬೇಕು ಎಂದಿರುವ ಭಾರತೀಯ ರಿಸರ್ವ್ ಬ್ಯಾಂಕ್​ನ ಗವರ್ನರ್(RBI Governor) ಸಂಜಯ್ ಮಲ್ಹೋತ್ರಾ, ಅದನ್ನು ಬಳಸುವ ನಿರ್ಧಾರಗಳಿಗೆ ಬ್ಯಾಂಕುಗಳು ಹೊಣೆಯಾಗಿರುತ್ತವೆ. ಮತ್ತು ತಪ್ಪುಗಳು ಸಂಭವಿಸಿದಾಗ ಅದನ್ನು ದೂಷಿಸಲು ಸಾಧ್ಯವಿಲ್ಲ ಎಂದು ಎಚ್ಚರಿಕೆ ನೀಡಿದ್ದಾರೆ.

ಮಂಗಳವಾರ(ಆ. 11) ಮುಂಬೈನಲ್ಲಿ FICCI ಮತ್ತು ಭಾರತೀಯ ಬ್ಯಾಂಕುಗಳ ಸಂಘ ಜಂಟಿಯಾಗಿ ಆಯೋಜಿಸಿದ್ದ 'Fibac 2026' ಸಮ್ಮೇಳನದಲ್ಲಿ ಭಾಗವಹಿಸಿ ಮಾತನಾಡಿರುವ ಅವರು, ಯಾವುದೇ ನಿರ್ಧಾರಕ್ಕೆ ಅಂತಿಮ ಜವಾಬ್ದಾರಿ ಬ್ಯಾಂಕ್​ಗಳ ಮೇಲಿದೆ. ಸೇವೆಯನ್ನು ಒದಗಿಸಿದ ಮಾರಾಟಗಾರ ಅಥವಾ ಅಲ್ಗಾರಿದಮ್‌ನ ಮೇಲಲ್ಲ ಎಂದು ಸ್ಪಷ್ಟಪಡಿಸಿದರು. 

AI ಅನ್ನು ಮಾನವ ಬುದ್ಧಿಮತ್ತೆಗೆ ಪೂರಕವಾಗಿ ಬಳಸಬೇಕು, ಬದಲಿಯಾಗಿ ಅಲ್ಲ. ಯಾವುದೇ ತಪ್ಪು ನಡೆದಾಗ ಈ ನಿರ್ಧಾರವನ್ನು ಮಾದರಿ ತೆಗೆದುಕೊಂಡಿದೆ ಎಂದು ಹೇಳುವುದು ಸಮರ್ಥನೀಯವಲ್ಲ. ನಿಯಂತ್ರಕರಾಗಿ ನಾವು ಅಥವಾ ಗ್ರಾಹಕರು ಅಂತಹ ಉತ್ತರಗಳನ್ನು ಎಂದಿಗೂ ಸ್ವೀಕರಿಸುವುದಿಲ್ಲ ಎಂದು ಹೇಳಿದ್ದಾರೆ.

AI ಮಾಡಿದ ಶಿಫಾರಸುಗಳನ್ನು ವಿಶ್ಲೇಷಿಸುವ ಮತ್ತು ಅಗತ್ಯವಿದ್ದಾಗ ಮಧ್ಯಪ್ರವೇಶಿಸುವ ಮತ್ತು ಮಾರ್ಪಡಿಸುವ ಬಲಿಷ್ಠ ಮಾನವ ಮೇಲ್ವಿಚಾರಣಾ ವ್ಯವಸ್ಥೆಯ ಅವಿಭಾಜ್ಯ ಅಂಗವಾಗಿರಬೇಕು. ಪ್ರತಿಯೊಂದು ಬ್ಯಾಂಕ್ ಮಂಡಳಿಯಿಂದ ಅನುಮೋದಿಸಲ್ಪಟ್ಟ ನಿರ್ದಿಷ್ಟ AI ನೀತಿಯನ್ನು ಹೊಂದಿರಬೇಕು. ಮತ್ತು ಮೂರನೇ ವ್ಯಕ್ತಿಗಳಿಂದ ಸೇವೆಗಳನ್ನು ಪಡೆದರೂ ಸಹ ಬ್ಯಾಂಕುಗಳು ಫಲಿತಾಂಶಗಳಿಗೆ ಜವಾಬ್ದಾರರಾಗಿರಬೇಕು ಎಂದಿದ್ದಾರೆ.

ಗ್ರಾಹಕ ಸೇವೆಯನ್ನು ಸುಧಾರಿಸುವಲ್ಲಿ, ಜಿಎಸ್‌ಟಿ ಫೈಲಿಂಗ್‌ಗಳು ಮತ್ತು ಡಿಜಿಟಲ್ ಹೆಜ್ಜೆಗುರುತುಗಳಂತಹ ದತ್ತಾಂಶಗಳ ಆಧಾರದ ಮೇಲೆ ಸಾಲ ಸೌಲಭ್ಯಗಳನ್ನು ವಿಸ್ತರಿಸುವಲ್ಲಿ ಮತ್ತು ವಂಚನೆಯನ್ನು ಪತ್ತೆಹಚ್ಚುವಲ್ಲಿ ಕೃತಕ ಬುದ್ಧಿಮತ್ತೆ (AI) ಅಪಾರ ಸಾಮರ್ಥ್ಯವನ್ನು ಹೊಂದಿದೆ. ಅದೇ ಸಮಯದಲ್ಲಿ, ಮಾದರಿ ಪಕ್ಷಪಾತ, ದತ್ತಾಂಶ ಗೌಪ್ಯತೆ ಮತ್ತು ಸೈಬರ್ ಭದ್ರತಾ ಬೆದರಿಕೆಗಳ ಬಗ್ಗೆ ಬ್ಯಾಂಕುಗಳು ಜಾಗರೂಕರಾಗಿರಬೇಕು ಎಂದು ಸಲಹೆ ನೀಡಿದ್ದಾರೆ (ಏಜೆನ್ಸೀಸ್).