ಎಲ್ಲರೂ ಸತ್ತರೂ ಅಭಿಷೇಕ್ ಮಾತ್ರ ಬದುಕಬೇಕೆಂಬ ಹಠ!...ಟಿಎಂಸಿಯ ಎಲ್ಲಾ ಹುದ್ದೆಗಳಿಗೂ ಮದನ್ ಮಿತ್ರಾ ರಾಜೀನಾಮೆ | Madan Mitra

ಬುಧವಾರ ತಮ್ಮ ನಿರ್ಧಾರವನ್ನು ಪ್ರಕಟಿಸಿದ ಮದನ್ ಮಿತ್ರಾ, ಮಮತಾ ಬ್ಯಾನರ್ಜಿ ನೇತೃತ್ವದ ತೃಣಮೂಲ ಕಾಂಗ್ರೆಸ್‌ನೊಂದಿಗೆ ದಶಕಗಳ ಕಾಲ ಹೊಂದಿದ್ದ ಎಲ್ಲಾ ಸಂಬಂಧಗಳನ್ನು ಕಡಿದುಕೊಂಡಿರುವುದಾಗಿ ಅಧಿಕೃತವಾಗಿ ಘೋಷಿಸಿದರು.

ಇತ್ತೀಚಿನ ಕೆಲ ವಾರಗಳಲ್ಲಿ ಟಿಎಂಸಿಯಲ್ಲಿ ಭಾರಿ ಬದಲಾವಣೆಗಳಾಗುತ್ತಿದ್ದು, ಹಲವು ಪ್ರಮುಖ ನಾಯಕರು ಪಕ್ಷದ ಅಧಿನಾಯಕಿಯಾಗಿದ್ದ ಮಮತಾರನ್ನು ತೊರೆದು ಬಂಡಾಯ ಬಣವನ್ನು ಸೇರಿಕೊಂಡಿದ್ದಾರೆ. ಈಗ ಅವರ ಸಾಲಿಗೆ ಮದನ್ ಮಿತ್ರಾ ಹೊಸ ಮತ್ತು ದೊಡ್ಡ ಸೇರ್ಪಡೆಯಾಗಿದೆ. ತಾವು ತೃಣಮೂಲ ಕಾಂಗ್ರೆಸ್‌ನ ಎಲ್ಲಾ ಸಾಂಸ್ಥಿಕ ಹುದ್ದೆಗಳಿಗೂ ರಾಜೀನಾಮೆ ನೀಡುತ್ತಿರುವುದಾಗಿ ತಿಳಿಸಿದ ಅವರು, ಪಕ್ಷದ ಹೈಕಮಾಂಡ್‌ನೊಂದಿಗೆ ಸಂಪೂರ್ಣವಾಗಿ ಸಂಬಂಧ ಕಡಿದುಕೊಂಡಿರುವುದಾಗಿ ಸ್ಪಷ್ಟಪಡಿಸಿದರು.

ತಮ್ಮ ಈ ಕಠಿಣ ರಾಜಕೀಯ ನಿರ್ಧಾರದ ಹಿಂದಿನ ಅಸಲಿ ಕಾರಣವನ್ನು ಬಿಚ್ಚಿಟ್ಟ ಮದನ್ ಮಿತ್ರಾ, ಮಮತಾ ಬ್ಯಾನರ್ಜಿ ಅವರ ಸೋದರಳಿಯ ಹಾಗೂ ಸಂಸದ ಅಭಿಷೇಕ್ ಬ್ಯಾನರ್ಜಿ ವಿರುದ್ಧ ತೀವ್ರ ಅಸಮಾಧಾನ ಹೊರಹಾಕಿದ್ದಾರೆ. ಪಕ್ಷವನ್ನು ತಳಮಟ್ಟದಿಂದ ಪುನರ್ ನಿರ್ಮಿಸಲು ಅವಕಾಶ ಮಾಡಿಕೊಡುವಂತೆ ಮತ್ತು ಸ್ವಲ್ಪ ದಿನಗಳ ಕಾಲ ನಾಯಕತ್ವದಿಂದ ದೂರವಿರುವಂತೆ ತಾವು ಅಭಿಷೇಕ್​​ಗೆ ಸಲಹೆ ನೀಡಿದ್ದಾಗಿ ಬಹಿರಂಗಪಡಿಸಿದರು.

ತಮ್ಮ ಆಕ್ರೋಶವನ್ನು ಮುಂದುವರಿಸಿದ ಮದನ್ ಮಿತ್ರಾ, ಪಕ್ಷದಲ್ಲಿ ಇತರ ಯಾರು ಬೇಕಾದರೂ ಸಾಯಬಹುದು, ಆದರೆ ಅಭಿಷೇಕ್ ಬ್ಯಾನರ್ಜಿಯನ್ನು ಮಾತ್ರ ಯಾವುದೇ ಬೆಲೆ ತೆತ್ತಾದರೂ ರಕ್ಷಿಸಲೇಬೇಕು ಎಂಬ ಹಠಕ್ಕೆ ಪಕ್ಷ ಬಿದ್ದಿರುವುದು ಅತ್ಯಂತ ವಿಷಾದನೀಯ ಸಂಗತಿ. ಟಿಎಂಸಿ ಪಕ್ಷವು ಎಲ್ಲರಿಗೂ ಸೇರಿದ್ದು, ಆದರೆ ಈಗ ಅದು ಕೇವಲ ಒಬ್ಬ ವ್ಯಕ್ತಿಯ (ಅಭಿಷೇಕ್) ಸೇವೆಗೆ ಮಾತ್ರ ಸೀಮಿತವಾಗಿರುವಂತೆ ಕಾಣುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ನಾನು ಮಮತಾ ಜಿ ಅವರಲ್ಲಿ ವಿನಂತಿಸುತ್ತೇನೆ ಬನ್ನಿ, ಇದನ್ನು ನಾವು ಮ್ಯಾರಥಾನ್ ಓಟ ಎಂದು ಭಾವಿಸೋಣ. ಈ ರಾಜಕೀಯ ಹಾದಿಯಲ್ಲಿ ನಾವಿಬ್ಬರೂ ಮುಖಾಮುಖಿಯಾಗಲಿದ್ದೇವೆ. ಯಾವ ಕುದುರೆ ಮುನ್ನಡೆಯುತ್ತದೆ ಎಂಬುದನ್ನು ಕಾಲವೇ ನಿರ್ಧರಿಸಲಿದೆ. ನಾನು ಸದ್ಯಕ್ಕೆ ಶಾಸಕನಾಗಿ ಮುಂದುವರಿದಿದ್ದರೂ, ತೃಣಮೂಲ ಕಾಂಗ್ರೆಸ್‌ಗೆ ಸಂಬಂಧಿಸಿದ ಎಲ್ಲವನ್ನೂ ತೊರೆದಿದ್ದೇನೆ. ಹೀಗಾಗಿ ನಾನು ಕೇವಲ ತಾಂತ್ರಿಕವಾಗಿ ಶಾಸಕನಾಗಿದ್ದೇನೆಯೇ ಹೊರತು, ಕ್ರಿಯಾತ್ಮಕವಾಗಿ ಇನ್ನು ಮುಂದೆ ಟಿಎಂಸಿ ಶಾಸಕನಲ್ಲ ಎಂದು ಘೋಷಿಸಿದರು.

ಮದನ್ ಮಿತ್ರಾ ಅವರ ಈ ಬಂಡಾಯವು ಪಶ್ಚಿಮ ಬಂಗಾಳದ ರಾಜಕೀಯ ವಲಯದಲ್ಲಿ ತೀವ್ರ ಸಂಚಲನ ಸೃಷ್ಟಿಸಿದೆ. ಲೋಕಸಭೆ ಹಾಗೂ ಇತ್ತೀಚಿನ ಚುನಾವಣೆಗಳಲ್ಲಿ ಹಿನ್ನಡೆ ಅನುಭವಿಸುತ್ತಿರುವ ಮಮತಾ ಬ್ಯಾನರ್ಜಿ ಅವರಿಗೆ, ತಮ್ಮದೇ ಹಳೇ ಸಹುದ್ಯೋಗಿಗಳು ಈಗ ಎದುರಾಳಿಯಾಗಿ ನಿಲ್ಲುತ್ತಿರುವುದು ನುಂಗಲಾರದ ತುತ್ತಾಗಿ ಪರಿಣಮಿಸಿದೆ(ಏಜೆನ್ಸೀಸ್​).