NEET ಫೇಲ್ ಆದ ಕೋಪಕ್ಕ 'ಬ್ರಿಗೇಡಿಯರ್' ಆದ ಯುವಕ: ಮೋಟಿವೇಷನಲ್ ಸ್ಪೀಚ್ ಕೊಡಲು ಹೋಗಿ ತಗಲಾಕೊಂಡ ನಕಲಿ ಸೇನಾಧಿಕಾರಿ! Fake Brigadier

ಉತ್ತರಪ್ರದೇಶ: ಸಾಧಸುವರೆಗೆ ಸುಳ್ಳನ್ನಾದರೂ ಹೇಳು (Fake it till you make it) ಎನ್ನುವ ಮಾತನ್ನು ಕೇಳಿರುತ್ತೇನೆ. ಆದರೆ ಈ ಮಾತನ್ನು ತಪ್ಪಾಗಿ ಅರ್ಥೈಸಿಕೊಂಡ ಯುವಕನೊಬ್ಬ ಮಾಡಿರುವ ಕರಾಮತ್ತಿಗೆ ಭಾರತದ ಸೇನೆಗೆ ತಬ್ಬಿಬ್ಬಾಗಿದೆ ಎಂದರೆ ನೀವು ನಂಬಲೇ ಬೇಕು.

ಉತ್ತರ ಪ್ರದೇಶದ 21 ವರ್ಷದ ಆರ್ಯನ್ ವರ್ಮಾ ಎನ್ನುವ ಯುವಕನೊಬ್ಬ ನೀಟ್​ ಪರೀಕ್ಷೆಯನ್ನು ಪಾಸಾಗಿ ವೈದ್ಯನಾಗಲು ವಿಫಲನಾದ ಕೋಪದಲ್ಲಿ, ತನ್ನನ್ನು ತಾನೇ ಸೈನ್ಯಾಧಿಕಾರಿ (Fake Brigadier) ಹುದ್ದೆಗೆ ಆಯ್ಕೆಮಾಡಿಕೊಂಡ ಘಟನೆ ವರದಿಯಾಗಿದೆ.

ಆರ್ಯನ್‌ಗೆ ಹೇಗಾದರೂ ಮಾಡಿ ಡಾಕ್ಟರ್ ಆಗಬೇಕು ಎನ್ನುವ ಆಸೆ ಇತ್ತು. ಅದಕ್ಕಾಗಿ NEET ಪರೀಕ್ಷೆ ಕೂಡ ಬರೆದಿದ್ದ. ಆದರೆ ಪರೀಕ್ಷೆಯಲ್ಲಿ ಇತ ಫೇಲ್ ಆದ. ಸಾಮಾನ್ಯವಾಗಿ ಹುಡುಗರು ಫೇಲ್ ಆದ್ರೆ ಮತ್ತೊಮ್ಮೆ ಓದುತ್ತಾರೆ, ಇಲ್ಲವೇ ಬೇರೆ ಕೋರ್ಸ್ ಸೇರುತ್ತಾರೆ. ಆದರೆ ಈ ಆರ್ಯನ್ ಮತ್ತೆ ಓದಲು ಕೂರುವ ಬದಲು ಭಾರತೀಯ ಸೇನೆಯ ಅತ್ಯುನ್ನತ ಹುದ್ದೆಗಳಲ್ಲಿ ಒಂದಾದ ಬ್ರಿಗೇಡಿಯರ್ ಹುದ್ದೆಯನ್ನು ಅಲಂಕರಿಸಲು ನಿರ್ಧರಿಸಿದ್ದಾನೆ.

ಅಷ್ಟಕ್ಕೂ ಈ ನಕಲಿ ಬ್ರಿಗೇಡಿಯರ್‌ ಸಿಕ್ಕಿಬಿದ್ದಿದ್ದು ಹೇಗೆ ಗೊತ್ತಾ? ಶಹಜಹಾನ್‌ಪುರ ಕಂಟೋನ್ಮೆಂಟ್‌ನಲ್ಲಿ ಯುವ ಮಿಲಿಟರಿ ಆಕಾಂಕ್ಷಿಗಳಿಗೆ ಮೋಟಿವೇಷನಲ್ ಸ್ಪೀಚ್ ನೀಡಲು ಇವನಿಗೆ ಆಹ್ವಾನ ಸಿಕ್ಕಿದೆ. ಭಾರಿ ಬಿಲ್ಡಪ್‌ನೊಂದಿಗೆ ತನ್ನ ಕಾರಿನೊಂದಿಗೆ ಎಂಟ್ರಿ ಕೊಟ್ಟಿದ್ದ ಆರ್ಯನ್​ನನ್ನು ನಿಜವಾದ ಸೇನಾ ಗುಪ್ತಚರ ಸಿಬ್ಬಂದಿಗಳು ವಶಕ್ಕೆ ಪಡೆದಿದ್ದಾರೆ.

ಅಧಿಕಾರಿಗಳು ಇವನನ್ನು ಹಿಡಿದು ತಪಾಸಣೆ ನಡೆಸಿದಾಗ, ನಕಲಿ ಬ್ರಿಗೇಡಿಯರ್ ಐಡಿ ಕಾರ್ಡ್, AFMC ಸಂಸ್ಥೆಯ ನಕಲಿ ಸೀಲ್ ಮತ್ತು ಒಂದು ಆಟಿಕೆ ಪಿಸ್ತೂಲ್ ಪತ್ತೆಯಾಗಿದೆ. ತಕ್ಷಣ ಈ ನಕಲಿ ಸೇನಾಧಿಕಾರಿಯನ್ನು ನಿಜವಾದ ಮಿಲಿಟರಿ ವಶಕ್ಕೆ ಪಡೆದಿದ್ದು, ವಿಚಾರಣೆ ಮುಂದುವರಿದಿದೆ

ಈ ನಕಲಿ ಸೇನಾಧಿಕಾರಿ ಆರ್ಯನ್​​ನ ಸುದ್ದಿ ಸೋಷಿಯಲ್​ ಮೀಡಿಯಾನಲ್ಲಿ ಹರಿದಾಡುತ್ತಿದ್ದಂತೆ ನೆಟ್ಟಿಗರ ಕೈ ಮತ್ತು ಕಿವಿ ಫುಲ್​ ಆ್ಯಕ್ಟಿವ್​ ಆಗಿದೆ. ಅವನು ನೇರವಾಗಿ ಬ್ರಿಗೇಡಿಯರ್ ಹುದ್ದೆಯನ್ನು ಆಯ್ಕೆ ಮಾಡಿಕೊಂಡಾಗಲೇ ಇವನ ಆಟ ಮುಗಿದಿತ್ತು ಎಂದು ಒಬ್ಬ ಬಳಕೆದಾರ ಕಮೆಂಟ್​ ಮಾಡಿದ್ದಾರೆ.

ಈ ಸುಳ್ಳನ್ನು ನಿಜ ಮಾಡುವ ಬದಲು ಸರಿಯಾಗಿ ಓದಿದ್ದರೆ ನೀಟ್​ ಪರೀಕ್ಷೆಯಾದರೂ ಪಾಸಾಗುತ್ತಿದ್ದ ಎಂದು ಇನ್ನೊಬ್ಬರು ಹೇಳಿದ್ದಾರೆ. ಇವನು ಸೇನೆಯ ನಕಲಿ ಅಧಿಕಾರಿಯಾಗಿದ್ದರೂ ಯಾರಿಗೂ ಹೇಗೆ ಅನುಮಾನ ಬಂದಿಲ್ಲ ಎಂದು ನನಗೆ ಅರ್ಥವಾಗುತ್ತಿಲ್ಲ ಎಂದು ಮತ್ತೊಬ್ಬರು ಗೊಂದಲ ವ್ಯಕ್ತಪಡಿಸಿದ್ದಾರೆ, (ಏಜನ್ಸೀಸ್​).