ವಯಸ್ಸು ಜಸ್ಟ್​ ನಂಬರ್​ ಅಷ್ಟೇ... ಅಂದುಕೊಂಡಿದ್ದನ್ನು ಸಾಧಿಸಿದ ಲಕ್ಷ್ಮೀಯ ಸ್ಫೂರ್ತಿದಾಯಕ ಕತೆ! Success story

Success story : ವಯಸ್ಸು ಅನ್ನೋದು ಜಸ್ಟ್​ ನಂಬರ್ ಅಂತ ಹೇಳುವುದನ್ನು ನೀವು ಅನೇಕ ಸಂದರ್ಭಗಳಲ್ಲಿ ಕೇಳಿರುತ್ತೀರಿ. ಆಂಧ್ರ ಪ್ರದೇಶದ ಶ್ರೀಕಾಕುಳಂನ ಲಕ್ಷ್ಮಿ ಅವರ ವಿಷಯದಲ್ಲಿ ಇದು ನೂರಕ್ಕೆ ನೂರು ನಿಜವಾಗಿದೆ. ಏಕೆಂದರೆ, ಜೀವನದಲ್ಲಿ ಅವರು ಎದುರಿಸಿದ ಗಂಭೀರ ಕಾಯಿಲೆಗಳು ಮತ್ತು ವೃದ್ಧಾಪ್ಯದ ಸಮಸ್ಯೆಗಳು ಅವರ ಆತ್ಮವಿಶ್ವಾಸವನ್ನು ಕುಗ್ಗಿಸಲು ಎಂದಿಗೂ ಸಾಧ್ಯವಾಗಲಿಲ್ಲ. ಅಸಾಧ್ಯವೆಂದು ತೋರಿದ ಕಡೆ, ಅವರು ಅದ್ಭುತ ಯಶಸ್ಸು ಸಾಧಿಸಿದರು ಮತ್ತು ಇಂದಿನ ಪೀಳಿಗೆಗೆ ಮಾದರಿಯಾಗಿ ನಿಂತಿದ್ದಾರೆ. ಪರಿಶ್ರಮ ಮತ್ತು ಆತ್ಮವಿಶ್ವಾಸದಿಂದ ಜೀವನದಲ್ಲಿ ಏನು ಬೇಕಾದರೂ ಸಾಧಿಸಬಹುದು ಅನ್ನೋದನ್ನು ಸಾಬೀತುಪಡಿಸಿದ್ದಾರೆ. ಲಕ್ಷ್ಮೀ ಅವರ ಸ್ಫೂರ್ತಿದಾಯಕ ಪ್ರಯಾಣದ ಬಗ್ಗೆ ನಾವೀಗ ತಿಳಿದುಕೊಳ್ಳೋಣ.

ಶ್ರೀಕಾಕುಳಂ ಜಿಲ್ಲೆಯ ಲಕ್ಷ್ಮೀ ಅವರಿಗೆ ಸುಮಾರು 65 ವರ್ಷ ವಯಸ್ಸಾಗಿದೆ. ಈ ವಯಸ್ಸಿನಲ್ಲಿ ಬಹುತೇಕ ಮಂದಿ ಒಂದು ಮೂಲೆ ಸೇರಿಬಿಡುತ್ತಾರೆ. ಆದರೆ, ವಯಸ್ಸು ಅಥವಾ ಅನಾರೋಗ್ಯ ತಮ್ಮ ಆಸೆಗಳಿಗೆ ಅಡ್ಡಿಯಾಗಲು ಲಕ್ಷ್ಮೀ ಅವರು ಬಿಡಲಿಲ್ಲ. ಹಲವು ವರ್ಷಗಳಿಂದ, ಕೀಲು ನೋವು ಮತ್ತು ಇತರ ದೀರ್ಘಕಾಲದ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದರು. ಒಂದು ಹಂತದಲ್ಲಿ, ವೈದ್ಯರು ಸಹ ತುಂಬಾ ವಿಶ್ರಾಂತಿ ಬೇಕಿದೆ ಮತ್ತು ಯಾವುದೇ ಚಟುವಟಿಕೆಯಲ್ಲಿ ಭಾಗಿಯಾಗದಂತೆ ಸಲಹೆ ನೀಡಿದ್ದರು.

ಆದರೆ, ಲಕ್ಷ್ಮೀ ಅವರು ಮಾತ್ರ ಯಾವುದನ್ನು ಬಿಟ್ಟುಕೊಡಲಿಲ್ಲ. ತಮ್ಮ ಹಳೆಯ ನೆನಪುಗಳನ್ನು ಮತ್ತು ತಮ್ಮ ನೆಚ್ಚಿನ ಚಟುವಟಿಕೆಗಳನ್ನು ನೆನಪಿಸಿಕೊಂಡರು. ತಮ್ಮ ಬಾಲ್ಯದ ಉತ್ಸಾಹವಾದ ನೇಯ್ಗೆ ಕಲೆಯನ್ನು ಮತ್ತೆ ಆರಂಭಿಸಲು ನಿರ್ಧರಿಸಿದರು. ಆರಂಭದಲ್ಲಿ, ಕೀಲು ನೋವಿನಿಂದಾಗಿ ಮಗ್ಗದಲ್ಲಿ ದೀರ್ಘಕಾಲ ಕುಳಿತು ಕೈಗಳನ್ನು ಚಲಿಸುವುದು ತುಂಬಾ ಕಷ್ಟಕರವಾಗಿತ್ತು. ಆದಾಗ್ಯೂ, ಅವರು ಪ್ರತಿದಿನ ಕೆಲವು ನಿಮಿಷಗಳ ಕಾಲ ಯೋಗಾಭ್ಯಾಸ ಮಾಡಲು ಪ್ರಾರಂಭಿಸಿದರು ಮತ್ತು ಕ್ರಮೇಣ ಸಮಯವನ್ನು ಹೆಚ್ಚಿಸಿದರು.

ಆತ್ಮವಿಶ್ವಾಸ ಮತ್ತು ದೃಢಸಂಕಲ್ಪ ಎಂಬ ಬಲವಾದ ಔಷಧದ ಜೊತೆಗೆ, ಸರಳ ವ್ಯಾಯಾಮಗಳನ್ನು ಮಾಡುವ ಮೂಲಕ ತಮ್ಮ ಅನಾರೋಗ್ಯವನ್ನು ನಿವಾರಿಸಿದರು. ಅಲ್ಪಾವಧಿಯಲ್ಲಿಯೇ, ತಮ್ಮ ಅದ್ಭುತ ಕೌಶಲ್ಯದಿಂದ ಸೀರೆ ಮತ್ತು ಕಂಬಳಿಗಳನ್ನು ನೇಯಲು ಪ್ರಾರಂಭಿಸಿದರು. ಅವರು ನೇಯ್ದ ಉತ್ಪನ್ನಗಳು ಮಾರುಕಟ್ಟೆಯಲ್ಲಿ ಉತ್ತಮ ಪ್ರತಿಕ್ರಿಯೆ ಪಡೆದವು. ಅನಾರೋಗ್ಯದ ಕಾರಣ ಮನೆಯಲ್ಲಿಯೇ ಕುಳಿತಿದ್ದ ಅವರೀಗ ನಾಲ್ಕು ಜನರಿಗೆ ಉದ್ಯೋಗ ನೀಡುವ ಹಂತಕ್ಕೆ ಬೆಳೆದಿದ್ದಾರೆ. ವಯಸ್ಸು ಅಥವಾ ರೋಗಗಳು ನಮ್ಮ ಗುರಿಗಳನ್ನು ಮಿತಿಗೊಳಿಸುವುದಿಲ್ಲ ಎಂದು ಲಕ್ಷ್ಮೀ ಅವರ ಯಶಸ್ಸು ಸ್ಪಷ್ಟವಾಗಿ ಸಾಬೀತುಪಡಿಸುತ್ತದೆ.

ಲಕ್ಷ್ಮಿ ಅವರು 65ನೇ ವಯಸ್ಸಿನಲ್ಲಿ ಯೋಗಾಭ್ಯಾಸ ಮಾಡುತ್ತಿದ್ದಾರೆ. ತಮ್ಮ ದೇಹವನ್ನು ಬಿಲ್ಲಿನಂತೆ ತಿರುಗಿಸುತ್ತಾ ಅತ್ಯಂತ ಸಂಕೀರ್ಣವಾದ ಯೋಗ ಭಂಗಿಗಳನ್ನು ಸಲೀಸಾಗಿ ಪ್ರದರ್ಶಿಸುತ್ತಾ ಎಲ್ಲರನ್ನೂ ಅಚ್ಚರಿಗೊಳಿಸುತ್ತಿದ್ದಾರೆ. ಅಷ್ಟೇ ಅಲ್ಲ, ಅವರು ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಯೋಗ ಸ್ಪರ್ಧೆಗಳಲ್ಲಿ ಭಾಗವಹಿಸಿದ್ದಾರೆ ಮತ್ತು ಒಂದು ಡಜನ್‌ಗೂ ಹೆಚ್ಚು ಚಿನ್ನದ ಪದಕಗಳನ್ನು ಗೆದ್ದಿದ್ದಾರೆ. ಅಷ್ಟೇ ಅಲ್ಲ, ಅವರು ಅನೇಕ ಜನರಿಗೆ ಯೋಗವನ್ನು ಕಲಿಸುತ್ತಿದ್ದಾರೆ. ಅವರು ತಮ್ಮ ಜೀವನ ಶೈಲಿಯನ್ನು ಉತ್ತಮವಾಗಿ ಬದಲಾಯಿಸಿಕೊಂಡಿದ್ದಾರೆ. ಜೀವನಶೈಲಿಯ ತಪ್ಪುಗಳಿಂದಾಗಿ ಬೊಜ್ಜು ಹೊತ್ತಿರುವ ಯುವ ಪೀಳಿಗೆಯಲ್ಲಿ ಲಕ್ಷ್ಮೀ ಅವರು ಬದಲಾವಣೆಗೆ ಸ್ಫೂರ್ತಿ ನೀಡುತ್ತಿದ್ದಾರೆ.

ಲಕ್ಷ್ಮಿ ಅವರು 2004 ರಲ್ಲಿ ವಾರಂಗಲ್‌ಗೆ ಯೋಗ ಕಲಿಸುವುದು ಮಾತ್ರವಲ್ಲದೆ ಸ್ಪರ್ಧಿಸುವ ಉದ್ದೇಶದಿಂದ ಹೋದರು. ಅಲ್ಲಿ ನಡೆದ ಸ್ಪರ್ಧೆಯಲ್ಲಿ ಅವರು ನಾಲ್ಕನೇ ಸ್ಥಾನ ಪಡೆದರು. ಆ ಪ್ರದರ್ಶನದ ಮೂಲಕ, ಅವರು ರಾಷ್ಟ್ರೀಯ ಮಟ್ಟದ ಸ್ಪರ್ಧೆಗಳಲ್ಲಿ ಭಾಗವಹಿಸಿದರು ಮತ್ತು ಹಿಂತಿರುಗಿ ನೋಡಲಿಲ್ಲ. ಕಷ್ಟಕರವಾದ ಆಸನಗಳನ್ನು ಅಭ್ಯಾಸ ಮಾಡುತ್ತಾ, ಅವರು ರಾಷ್ಟ್ರೀಯ ಮಟ್ಟದ ಯೋಗ ಕ್ರೀಡಾ ಸ್ಪರ್ಧೆಗಳಲ್ಲಿ ಭಾಗವಹಿಸಿ 30ಕ್ಕೂ ಹೆಚ್ಚು ಚಿನ್ನದ ಪದಕಗಳನ್ನು ಗೆದ್ದರು. 2013 ರಲ್ಲಿ, ಅವರು ಥೈಲ್ಯಾಂಡ್‌ನಲ್ಲಿ ನಡೆದ ಅಂತಾರಾಷ್ಟ್ರೀಯ ಸ್ಪರ್ಧೆಯಲ್ಲಿ ಭಾಗವಹಿಸಿ ನಾಲ್ಕು ವಿಭಾಗಗಳಲ್ಲಿ ನಾಲ್ಕು ಚಿನ್ನದ ಪದಕಗಳನ್ನು ಗೆದ್ದರು ಮತ್ತು ಚಾಂಪಿಯನ್ಸ್ ಆಫ್ ದಿ ಚಾಂಪಿಯನ್ಸ್ ಆದರು. ಲಕ್ಷ್ಮಿ ಅವರ ಪ್ರತಿಭೆಗೆ ಥೈಲ್ಯಾಂಡ್ ಯೋಗ ಅಸೋಸಿಯೇಷನ್ ​​ಮಿಸ್ ಯೋಗ ಯೂನಿವರ್ಸ್ ಪ್ರಶಸ್ತಿಯನ್ನು ನೀಡಿ ಗೌರವಿಸಿದೆ. 2015 ರಲ್ಲಿ ಚೀನಾದ ಬೀಜಿಂಗ್‌ನಲ್ಲಿ ನಡೆದ ಅಂತಾರಾಷ್ಟ್ರೀಯ ಸ್ಪರ್ಧೆಗಳಲ್ಲಿ ಅವರು ಭಾಗವಹಿಸಿದ್ದರು. ಭಾರತದಲ್ಲಿ ಎಲ್ಲೆಲ್ಲಿ ಸ್ಪರ್ಧೆಗಳು ನಡೆದರೂ, ಲಕ್ಷ್ಮಿ ತಮ್ಮದೇ ಆದ ಶೈಲಿಯಲ್ಲಿ ಕಷ್ಟಕರವಾದ ಆಸನಗಳನ್ನು ಸಹ ಸುಲಭವಾಗಿ ಪ್ರದರ್ಶಿಸುವ ಮೂಲಕ ತಮ್ಮ ಚಿನ್ನದ ಪದಕಗಳ ಪಟ್ಟಿಯನ್ನು ಹೆಚ್ಚಿಸುತ್ತಿದ್ದಾರೆ. ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಅನೇಕ ಮಹಿಳೆಯರಿಗೆ ಉಚಿತವಾಗಿ ಯೋಗವನ್ನು ಕಲಿಸುತ್ತಿದ್ದಾರೆ ಮತ್ತು ಪ್ರತಿಯೊಬ್ಬರಲ್ಲೂ ವಿವಿಧ ಆರೋಗ್ಯ ತತ್ವಗಳು ಮತ್ತು ಯೋಗ ಪ್ರಜ್ಞೆಯನ್ನು ತುಂಬುತ್ತಿದ್ದಾರೆ.

ಲಕ್ಷ್ಮಿ ಅವರ ಯಶಸ್ಸಿನ ಕಥೆ ನಮಗೆಲ್ಲರಿಗೂ ಸ್ಫೂರ್ತಿಯಾಗಿದೆ. ಆತ್ಮವಿಶ್ವಾಸ ಮತ್ತು ಪರಿಶ್ರಮದಿಂದ ಜೀವನದಲ್ಲಿ ಸಮಸ್ಯೆಗಳು ಮತ್ತು ಕಾಯಿಲೆಗಳನ್ನು ಹೇಗೆ ಜಯಿಸುವುದು ಎಂಬುದನ್ನು ಲಕ್ಷ್ಮೀ ಅವರು ನಮಗೆ ಕಲಿಸಿದ್ದಾರೆ. ನಮಗೆ ವಯಸ್ಸಾದರೂ ಅಥವಾ ನಮ್ಮ ಆರೋಗ್ಯ ಕೈಕೊಟ್ಟರೂ ನಮ್ಮ ಕನಸುಗಳು ಮತ್ತು ಕೌಶಲ್ಯಗಳು ಎಂದಿಗೂ ಸಾಯಬಾರದು ಎಂಬುದನ್ನು ನಾವು ಲಕ್ಷ್ಮೀ ಅವರಿಂದ ಕಲಿಯಬಹುದು, (ಏಜೆನ್ಸೀಸ್​).