ಈ ತೀರ್ಪು ಅವರಿಗೆ ಅರ್ಪಣೆ... ಸುದೀರ್ಘ ಪತ್ರದ ಮೂಲಕ 8 ವರ್ಷದ ನೋವು ಹಂಚಿಕೊಂಡ ಭಾವನಾ! Actress Attack Case

Actress Attack Case : ಆ ಕರಾಳ ಘಟನೆ ನಡೆದು ಸುಮಾರು 8 ವರ್ಷಗಳೇ ಕಳೆದಿವೆ. ಭಾರತೀಯ ಸಿನಿಮಾ ರಂಗವನ್ನೇ ಬೆಚ್ಚಿ ಬೀಳಿಸಿದ ಘಟನೆ ಅದು. ಮಲಯಾಳಂ ಚಿತ್ರರಂಗದಲ್ಲಿ ಸ್ಟಾರ್​ ನಾಯಕಿಯಾಗಿ ಮೆರೆಯುತ್ತಿದ್ದ ಪ್ರಖ್ಯಾತ ನಟಿಯನ್ನು 2017, ಫೆಬ್ರವರಿ 17 ರಂದು ಪಲ್ಸರ್​ ಸುನಿ ಮತ್ತು ಆತನ ಗ್ಯಾಂಗ್​ ಕಿಡ್ನಾಪ್​ ಮಾಡಿ ದೈಹಿಕವಾಗಿ ಕಿರುಕುಳ ( Actress Attack Case ) ನೀಡಿ ಅಟ್ಟಹಾಸ ಮೆರೆದಿತ್ತು. ಬಳಿಕ ಧೈರ್ಯ ಮಾಡಿ ಕೋರ್ಟ್​ ಮೆಟ್ಟಿಲೇರಿದ ಸಂತ್ರಸ್ತ ನಟಿ ಸಾಕಷ್ಟು ಅವಮಾನಗಳನ್ನು ಎದುರಿಸಿ, 8 ವರ್ಷಗಳ ಸುದೀರ್ಘ ಕಾನೂನು ಹೋರಾಟ ಮಾಡಿದರು. ಅಂತಿಮವಾಗಿ ನಟಿಯ ಹೋರಾಟಕ್ಕೆ ಜಯ ಸಿಕ್ಕಿದೆ. ಅಂದು ಅಟ್ಟಹಾಸ ಮೆರೆದ ಪಾಪಿಗಳಿಗೆ ಡಿಸೆಂಬರ್​ 12 ರಂದು ಶಿಕ್ಷೆ ಪ್ರಕಟಿಸಿದ ಎರ್ನಾಕುಲಂ ಪ್ರಧಾನ ಸೆಷನ್ಸ್ ನ್ಯಾಯಾಲಯ, ಆರು ಆರೋಪಿಗಳಿಗೆ 20 ವರ್ಷ ಜೈಲು ಶಿಕ್ಷೆ ಹಾಗೂ 50 ಸಾವಿರ ದಂಡ ವಿಧಿಸಿದೆ. ಆದರೆ, ಈ ಪ್ರಕರಣದಲ್ಲಿ ಮಲಯಾಳಂ ನಟ ದಿಲೀಪ್​ ಖುಲಾಸೆಗೊಂಡಿದ್ದು ಅಚ್ಚರಿ ಮೂಡಿಸಿದೆ.

ನ್ಯಾಯಾಲಯದ ತೀರ್ಪಿನ ಬೆನ್ನಲ್ಲೇ ಸಂತ್ರಸ್ತೆ ನಟಿ ತಮ್ಮ ಇನ್​ಸ್ಟಾಗ್ರಾಂನಲ್ಲಿ ಪೋಸ್ಟ್​ ಒಂದನ್ನು ಹಂಚಿಕೊಂಡಿದ್ದು, ತೀರ್ಪಿನ ಬಗ್ಗೆ ಸಂತಸ ವ್ಯಕ್ತಪಡಿಸಿದ್ದಾರೆ.

ಅಷ್ಟಕ್ಕೂ ಸಂತ್ರಸ್ತ ನಟಿ ತಮ್ಮ ಇನ್​ಸ್ಟಾಗ್ರಾಂನಲ್ಲಿ ಬರೆದುಕೊಂಡಿದ್ದೇನು ಅನ್ನೋದನ್ನು ಕಂಪ್ಲೀಟ್​ ಆಗಿ ನೋಡುವುದಾದರೆ, 8 ವರ್ಷ, 9 ತಿಂಗಳು ಮತ್ತು 23 ದಿನಗಳ ನಂತರ, ಬಹಳ ದೀರ್ಘ ಮತ್ತು ನೋವಿನ ಪ್ರಯಾಣದ ಅಂತ್ಯದಲ್ಲಿ ನಾನು ಕೊನೆಗೂ ಒಂದು ಸಣ್ಣ ಬೆಳಕಿನ ಕಿರಣವನ್ನು ಕಂಡಿದ್ದೇನೆ. ಆರು ಆರೋಪಿಗಳು ತಪ್ಪಿತಸ್ಥರೆಂದು ಸಾಬೀತಾಗಿದೆ ಮತ್ತು ಅದಕ್ಕಾಗಿ ನಾನು ಕೃತಜ್ಞಳಾಗಿದ್ದೇನೆ ಎಂದಿದ್ದಾರೆ.

ಮಾತು ಮುಂದುವರಿಸಿದ ಸಂತ್ರಸ್ತ ನಟಿ, ನಾನು ಇಷ್ಟು ದಿನ ಅನುಭವಿಸಿದ ನೋವನ್ನು ಸುಳ್ಳು ಮತ್ತು ಈ ಪ್ರಕರಣ ಒಂದು ಕಟ್ಟುಕಥೆ ಎಂದು ಕರೆದವರಿಗೆ ಈ ಕ್ಷಣ ಅಂದರೆ ಈ ತೀರ್ಪನ್ನು ಸಮರ್ಪಿಸಲಾಗಿದೆ. ಅಂದು ಏನೇನೋ ಮಾತನಾಡಿದವರು ಇಂದು ತೀರ್ಪು ನೋಡಿ ನಿಮ್ಮೊಂದಿಗೆ ಶಾಂತಿಯಿಂದ ಇದ್ದೀರಿ ಎಂದು ನಾನು ಭಾವಿಸುತ್ತೇನೆ. ಎ1 ಆರೋಪಿಯನ್ನು ನನ್ನ ವೈಯಕ್ತಿಕ ಕಾರು ಚಾಲಕನೆಂದು ಇನ್ನೂ ಹೇಳುತ್ತಿದ್ದಾರೆ. ಆದರೆ, ಅದು ಸಂಪೂರ್ಣ ಸುಳ್ಳು. ಆತ ನನ್ನ ಚಾಲಕನಾಗಿರಲಿಲ್ಲ, ನನ್ನ ಉದ್ಯೋಗಿಯೂ ಅಲ್ಲ ಮತ್ತು ನನಗೆ ತಿಳಿದಿರುವ ವ್ಯಕ್ತಿಯೂ ಅಲ್ಲ. ಆತ 2016ರಲ್ಲಿ ನಾನು ಕೆಲಸ ಮಾಡುತ್ತಿದ್ದ ಸಿನಿಮವೊಂದಕ್ಕೆ ಚಾಲಕನಾಗಿ ನಿಯೋಜಿಸಲ್ಪಟ್ಟಿದ್ದ ವ್ಯಕ್ತಿ ಮಾತ್ರ. ವಿಪರ್ಯಾಸವೆಂದರೆ, ಆ ಸಮಯದಲ್ಲಿ ನಾನು ಆತನನ್ನು ಒಮ್ಮೆ ಅಥವಾ ಎರಡು ಬಾರಿ ಮಾತ್ರ ಭೇಟಿಯಾಗಿದ್ದೆ ಎಂದು ಸ್ಪಷ್ಟನೆ ನೀಡಿದ್ದಾರೆ.

ಈ ತೀರ್ಪು ಅನೇಕ ಜನರಿಗೆ ಅಚ್ಚರಿ ಮೂಡಿಸಬಹುದು ಆದರೆ, ಇದು ನನಗೆ ಅಚ್ಚರಿ ಮೂಡಿಸಲಿಲ್ಲ. 2020ರ ಆರಂಭದಲ್ಲೇ ಏನೋ ಸರಿಯಿಲ್ಲ ಎಂದು ನನಗೆ ಅನಿಸಲು ಪ್ರಾರಂಭಿಸಿತು. ಪ್ರಕರಣವನ್ನು ನಿರ್ವಹಿಸುವ ವಿಧಾನದಲ್ಲಿ, ವಿಶೇಷವಾಗಿ ಒಬ್ಬ ನಿರ್ದಿಷ್ಟ ಆರೋಪಿ ಕಡೆಗೆ ಬಂದಾಗ, ಪ್ರಾಸಿಕ್ಯೂಷನ್ ಸಹ ಬದಲಾವಣೆಗಳನ್ನು ಗಮನಿಸಿತು. ವರ್ಷಗಳಲ್ಲಿ ನಾನು ಹಲವಾರು ಬಾರಿ ಹೈಕೋರ್ಟ್ ಮತ್ತು ಸುಪ್ರೀಂ ಕೋರ್ಟ್ ಅನ್ನು ಸಂಪರ್ಕಿಸಿದೆ. ಅಧೀನ ನ್ಯಾಯಾಲಯವನ್ನು ನಾನು ನಂಬುವುದಿಲ್ಲ ಅಂತಾನೂ ಸ್ಪಷ್ಟವಾಗಿ ಹೇಳಿದೆ. ಆದರೆ, ಈ ಪ್ರಕರಣವನ್ನು ಅದೇ ನ್ಯಾಯಾಧೀಶರಿಂದ ದೂರ ಸರಿಸಲು ನಾನು ಮಾಡಿದ ಪ್ರತಿಯೊಂದು ವಿನಂತಿಯನ್ನು ವಜಾಗೊಳಿಸಲಾಯಿತು.

ಎಲ್ಲ ವಿವರಗಳನ್ನು ಮುಂದಿನ ಸ್ಲೈಡ್‌ನಲ್ಲಿ ಹಂಚಿಕೊಳ್ಳುತ್ತೇನೆ ಎಂದಿರುವ ಸಂತ್ರಸ್ತ ನಟಿ, ವರ್ಷಗಳ ನೋವು, ಕಣ್ಣೀರು ಮತ್ತು ಭಾವನಾತ್ಮಕ ಹೋರಾಟದ ನಂತರ, ನಾನು ನೋವಿನಿಂದ ಕೂಡಿದ ಒಂದು ಅರಿವಿಗೆ ಬಂದಿದ್ದೇನೆ. ಅದೇನೆಂದರೆ, ಈ ದೇಶದ ಪ್ರತಿಯೊಬ್ಬ ನಾಗರಿಕನನ್ನು ಕಾನೂನಿನ ಮುಂದೆ ಸಮಾನವಾಗಿ ನಡೆಸಿಕೊಳ್ಳುವುದಿಲ್ಲ. ಪ್ರತಿಯೊಂದು ನ್ಯಾಯಾಲಯವೂ ಒಂದೇ ರೀತಿಯಲ್ಲಿ ಕಾರ್ಯನಿರ್ವಹಿಸುವುದಿಲ್ಲ ಎಂದು ನನಗೆ ತಿಳಿದಿದೆ. ಈ ದೀರ್ಘ ಪ್ರಯಾಣದುದ್ದಕ್ಕೂ ನನ್ನೊಂದಿಗೆ ನಿಂತ ಎಲ್ಲರಿಗೂ ನನ್ನ ಹೃತ್ಪೂರ್ವಕ ಧನ್ಯವಾದಗಳು ಎಂದಿರುವ ನಟಿ, ನನ್ನ ವಿರುದ್ಧ ನಿಂದನೀಯ ಕಾಮೆಂಟ್‌ಗಳು ಮತ್ತು ನನ್ನ ಮೇಲೆ ದಾಳಿ ಮಾಡುವುದನ್ನು ಮುಂದುವರಿಸಲು ನೀವು ಸ್ವತಂತ್ರರು. ಏಕೆಂದರೆ, ಆ ರೀತಿ ಮಾಡಲು ನೀವು ಹಣ ಪಡೆದಿರುತ್ತೀರಿ ಎಂದು ಖಡಕ್​ ಮಾತುಗಳನ್ನಾಡಿದ್ದಾರೆ.

ಈ ಪ್ರಕರಣದಲ್ಲಿ ಪ್ರಮುಖ ಸಾಕ್ಷ್ಯವಾದ ಮೆಮೊರಿ ಕಾರ್ಡ್ ನ್ಯಾಯಾಲಯದ ಕಸ್ಟಡಿಯಲ್ಲಿದ್ದಾಗ ಮೂರು ಬಾರಿ ಅಕ್ರಮವಾಗಿ ಮೆಮೊರಿ ಕಾರ್ಡ್​ ಬಳಕೆಯಾಗಿರುವುದು ಕಂಡುಬಂದಿದೆ ಎಂದು ಸಂತ್ರಸ್ತ ನಟಿ ಬರೆದುಕೊಂಡಿದ್ದಾರೆ.

ಇಬ್ಬರು ಸಾರ್ವಜನಿಕ ಅಭಿಯೋಜಕರು ಈ ಪ್ರಕರಣಕ್ಕೆ ರಾಜೀನಾಮೆ ನೀಡಿ, ನ್ಯಾಯಾಲಯದ ವಾತಾವರಣವು ಪ್ರಾಸಿಕ್ಯೂಷನ್‌ಗೆ ಪ್ರತಿಕೂಲವಾಗಿದೆ ಎಂದು ಸ್ಪಷ್ಟವಾಗಿ ಹೇಳಿದರು. ಇಬ್ಬರೂ ವೈಯಕ್ತಿಕವಾಗಿ ಈ ನ್ಯಾಯಾಲಯದಿಂದ ನ್ಯಾಯವನ್ನು ನಿರೀಕ್ಷಿಸಬಾರದು ಎಂಬ ಮಾತುಗಳನ್ನು ಆಡಿದರು. ಏಕೆಂದರೆ ಇದು ಪಕ್ಷಪಾತಿಯಾಗಿದೆ ಎಂದು ಅವರು ಭಾವಿಸಿದರು.

ಮೆಮೊರಿ ಕಾರ್ಡ್‌ನ ತಿರುಚುವಿಕೆಯ ಬಗ್ಗೆ ಸರಿಯಾದ ತನಿಖೆ ನಡೆಸಬೇಕೆಂದು ನಾನು ಪದೇಪದೆ ವಿನಂತಿಸಿದೆ. ಆದಾಗ್ಯೂ, ನಾನು ಮತ್ತೆ ಮತ್ತೆ ಕೇಳುತ್ತಲೇ ಇರುವವರೆಗೂ ತನಿಖಾ ವರದಿಯನ್ನು ನನಗೆ ಎಂದಿಗೂ ನೀಡಿಲ್ಲ ಎಂದು ನಟಿ ಹೇಳಿದ್ದಾರೆ.

ನಾನು ನ್ಯಾಯಯುತ ವಿಚಾರಣೆಗಾಗಿ ಹೋರಾಡುತ್ತಿರುವಾಗ, ಆರೋಪಿಗಳು ಇದೇ ನ್ಯಾಯಾಧೀಶರು ಪ್ರಕರಣದ ವಿಚಾರಣೆ ನಡೆಸುವುದನ್ನು ಮುಂದುವರಿಸಬೇಕೆಂದು ಕೋರಿ ಅರ್ಜಿ ಸಲ್ಲಿಸಿದರು. ಇದು ನನ್ನ ಮನಸ್ಸಿನಲ್ಲಿ ಇನ್ನಷ್ಟು ಗಂಭೀರ ಅನುಮಾನಗಳನ್ನು ಹುಟ್ಟುಹಾಕಿತು ಎಂದು ನಟಿ ಬರೆದುಕೊಂಡಿದ್ದಾರೆ.

ನಾನು ಭಾರತದ ಗೌರವಾನ್ವಿತ ರಾಷ್ಟ್ರಪತಿ ಮತ್ತು ಭಾರತದ ಗೌರವಾನ್ವಿತ ಪ್ರಧಾನ ಮಂತ್ರಿಗಳಿಗೆ ಪತ್ರಗಳನ್ನು ಬರೆದು ನನ್ನ ಕಳವಳಗಳನ್ನು ವ್ಯಕ್ತಪಡಿಸಿ ಮತ್ತು ಮಧ್ಯಪ್ರವೇಶವನ್ನು ಕೋರಿದೆ. ಸಾರ್ವಜನಿಕರು ಮತ್ತು ಮಾಧ್ಯಮಗಳು ಹಾಜರಿದ್ದು, ಏನು ನಡೆಯುತ್ತಿದೆ ಎಂಬುದನ್ನು ಸ್ವತಃ ನೋಡಲು ಸಾಧ್ಯವಾಗುವಂತೆ, ಮುಕ್ತ ನ್ಯಾಯಾಲಯದಲ್ಲಿ ವಿಚಾರಣೆ ನಡೆಸುವಂತೆ ನಾನು ನ್ಯಾಯಾಲಯವನ್ನು ವಿನಂತಿಸಿದೆ. ಆದರೆ, ನನ್ನ ವಿನಂತಿಯನ್ನು ತಿರಸ್ಕರಿಸಲಾಯಿತು ಎಂದು ಸಂತ್ರಸ್ತ ನಟಿ ಸುದೀರ್ಘವಾಗಿ ಬರೆದುಕೊಂಡು ಬೇಸರ ಹೊರಹಾಕಿದ್ದಾರೆ.

* ಫೆಬ್ರವರಿ 17, 2017ರಂದು ನಟಿಯ ಮೇಲೆ ಹಲ್ಲೆ ನಡೆಯಿತು. ನಟಿ ಆ ದಿನ ರಾತ್ರಿ ತ್ರಿಸ್ಸೂರ್‌ನಲ್ಲಿರುವ ತನ್ನ ಮನೆಯಿಂದ ಮಾರ್ಟಿನ್ ಹೆಸರಿನ ಚಾಲಕ ಚಲಾಯಿಸುತ್ತಿದ್ದ ಮಹೀಂದ್ರಾ ಎಸ್‌ಯುವಿಯಲ್ಲಿ ಹೊರಟಿದ್ದರು. ಈ ವೇಳೆ ಮಾರ್ಟಿನ್ ಮಾಹಿತಿಯ ಮೇರೆಗೆ, ಪಲ್ಸರ್ ಸುನಿ ಚಲಾಯಿಸುತ್ತಿದ್ದ ಟೆಂಪೋ ಟ್ರಾವೆಲ್ಲರ್ ಅಂಗಮಾಲಿಯಿಂದ ಅವರನ್ನು ಹಿಂಬಾಲಿಸಿತು. ಮಣಿಕಂಠನ್ ಮತ್ತು ವಿಜೀಶ್ ಎಂಬುವರು ಅದರಲ್ಲಿದ್ದರು. ಟೆಂಪೋ ಟ್ರಾವೆಲ್ಲರ್ ಆಲುವಾದ ಅಥಣಿಯಲ್ಲಿ ನಟಿಯ ವಾಹನಕ್ಕೆ ಡಿಕ್ಕಿ ಹೊಡೆದು ನಕಲಿ ಅಪಘಾತವನ್ನು ಸೃಷ್ಟಿಸಿತು.

* ಬಳಿಕ ಮಾರ್ಟಿನ್ ಕಾರಿನಿಂದ ಕೆಳಗೆ ಇಳಿದು ಜಗಳವಾಡುತ್ತಿರುವಾಗ ಟೆಂಪೋ ಟ್ರಾವೆಲ್ಲರ್​ನಿಂದ ಹೊರಬಂದ ಮಣಿಕಂಠನ್ ಮತ್ತು ವಿಜೀಶ್, ಹಿಂದಿನ ಸೀಟಿಗೆ ನುಗ್ಗಿ, ನಟಿಯ ಕೈಗಳನ್ನು ಹಿಡಿದು ಬಾಯಿ ಮುಚ್ಚಿದರು. ಬಳಿಕ ಅದೇ ವಾಹನದಲ್ಲಿ ತಮ್ಮ ಪ್ರಯಾಣವನ್ನು ಮುಂದುವರೆಸಿದರು. ಅವರು ಕಲಾಮಸ್ಸೆರಿ ತಲುಪಿದಾಗ, ಪ್ರದೀಪ್ ಕೂಡ ಅವರೊಂದಿಗೆ ಸೇರಿಕೊಂಡನು.

* ಕೆಲವು ಆರೋಪಿಗಳು ಎರಡೂ ವಾಹನಗಳನ್ನು ಸರದಿಯಂತೆ ಚಲಾಯಿಸಿದರು. ಚಾಲಕ ಮಾರ್ಟಿನ್ ಈ ವೇಳೆ ಅಸಹಾಯಕನಂತೆ ನಟಿಸಿದನು. ಅವರು ಮಾರ್ಟಿನ್ ನನ್ನು ಪಳರಿವತ್ತಂ-ವೆನ್ನಾಲ ಮಾರ್ಗದಲ್ಲಿ ಇಳಿಸಿದರು. ಈ ವೇಳೆ ಪಲ್ಸರ್ ಸುನಿ ವಾಹನವನ್ನು ಚಲಾಯಿಸಿದನು. ಸಲೀಂ ಮತ್ತು ಮಣಿಕಂದನ್ ಅವನ ಜೊತೆ ಇದ್ದರು.

* ಕಕ್ಕನಾಡ್‌ನಲ್ಲಿ ಸುನಿ, ನಟಿಯ ಎಡಭಾಗದಲ್ಲಿ ಕುಳಿತು, ಸಲೀಮ್‌ಗೆ ಡ್ರೈವಿಂಗ್​ ಜವಾಬ್ದಾರಿಯನ್ನು ವಹಿಸಿದನು. ತಮ್ಮ ಕೃತ್ಯಕ್ಕೆ ಸಹಕರಿಸದೇ ಹೋದರೆ ಮಾದಕ ದ್ರವ್ಯ ಸೇವಿಸಿ, ದೃಶ್ಯವನ್ನು ರೆಕಾರ್ಡ್ ಮಾಡುವುದಾಗಿ ಬೆದರಿಕೆ ಹಾಕಿದನು. ನಂತರ ಆಕೆಯನ್ನು ವಿವಸ್ತ್ರಗೊಳಿಸಿ ಕಿರುಕುಳ ನೀಡಿದನು ಮತ್ತು ದೃಶ್ಯವನ್ನು ತನ್ನ ಮೊಬೈಲ್ ಫೋನ್‌ನಲ್ಲಿ ರೆಕಾರ್ಡ್ ಮಾಡಿದನು. ಈ ಕೃತ್ಯಕ್ಕೆ ಸುಪಾರಿ ನೀಡಿದ ವ್ಯಕ್ತಿ ತನಗೆ ಕರೆ ಮಾಡುತ್ತಾನೆ ಎಂದು ಈ ವೇಳೆ ಪಲ್ಸರ್​ ಸುನಿ ಹೇಳಿದನು. ಆದಾಗ್ಯೂ, ನಟ ದಿಲೀಪ್ ಆ ಸಮಯದಲ್ಲಿ ರಾಮಲೀಲಾ ಚಿತ್ರದ ಚಿತ್ರೀಕರಣವನ್ನು ನಿಲ್ಲಿಸಿ, ಆಸ್ಪತ್ರೆಗೆ ದಾಖಲಾಗಿದ್ದರು. ಇದು ಕೂಡ ಸಾಕಷ್ಟು ಅನುಮಾನಕ್ಕೆ ಕಾರಣವಾಗಿದೆ.

* ಸುಮಾರು 2 ಗಂಟೆಗಳ ಕಾಲ ನಟಿಯ ಮೇಲೆ ದೌರ್ಜನ್ಯ ಎಸಗಿದ ಕಿಡಿಗೇಡಿಗಳು, ತಡರಾತ್ರಿ ನಟಿಯನ್ನು ನಿರ್ದೇಶಕ ಲಾಲ್ ಅವರ ಮನೆಯಲ್ಲಿ ಇಳಿಸಿದರು. ಆ ಬಳಿಕ ಈ ಘಟನೆಯ ಬಗ್ಗೆ ಹೊರಜಗತ್ತಿಗೆ ತಿಳಿಯಿತು. ಮುಗ್ಧನಂತೆ ಕಾಣುತ್ತಿದ್ದ ಮಾರ್ಟಿನ್​ನನ್ನು ಫೆಬ್ರವರಿ 18 ರಂದು ವಶಕ್ಕೆ ಪಡೆಯಲಾಯಿತು.

* ಈ ಮಧ್ಯೆ, ಡೀಲ್​ ಮಾಡಿದ ಪ್ರಕಾರ ನಮಗೆ ಹಣ ಸಿಕ್ಕಿಲ್ಲ ಎಂದು ದಿಲೀಪ್‌ಗೆ ಬೆದರಿಕೆ ಹಾಕಲು ಸುನಿ ಹಲವು ಬಾರಿ ಪ್ರಯತ್ನಿಸಿದ್ದ. ದಿಲೀಪ್‌ನ ನಂಬಿಕಸ್ಥರಿಗೆ ತನ್ನ ಫೋನ್‌ ಮೂಲಕ ಸುನಿ ಹಲವಾರು ಬಾರಿ ಕರೆ ಮಾಡಿದ್ದ.

* ಫೆಬ್ರವರಿ 18 ರಂದು ಶಂಕಿತರು ಬಳಸುತ್ತಿದ್ದ ಎರಡು ವಾಹನಗಳು ಪತ್ತೆಯಾದವು ಮತ್ತು ವಿಶೇಷ ಶೋಧ ತಂಡವನ್ನು ರಚಿಸಲಾಯಿತು.

* ಫೆಬ್ರವರಿ 19 ರಂದು, ವಡಿವಾಲ್ ಸಲೀಂ ಮತ್ತು ಪ್ರದೀಪ್ ಅವರನ್ನು ಕೊಯಮತ್ತೂರಿನಲ್ಲಿ ಬಂಧಿಸಲಾಯಿತು. ಇದರ ನಡುವೆ ನಟಿಗೆ ನೈತಿಕ ಬಲ ತುಂಬಲು ಕೊಚ್ಚಿಯಲ್ಲಿ ಚಲನಚಿತ್ರ ಕಾರ್ಯಕರ್ತರ ಸಭೆ ನಡೆಯಿತು. ಈ ವೇಳೆ ನಟ ದಿಲೀಪ್ ಸಮ್ಮುಖದಲ್ಲಿ ಪಿತೂರಿ ನಡೆಸಿದ್ದಾರೆ ಎಂದು ದಿಲೀಪ್​ ಮಾಜಿ ಪತ್ನಿ ಮಂಜು ವಾರಿಯರ್ ಆರೋಪಿಸಿದರು.

* ಫೆಬ್ರವರಿ 20 ರಂದು ಪಾಲಕ್ಕಾಡ್‌ನಲ್ಲಿ ಮಣಿಕಂದನ್​ನನ್ನು ಬಂಧಿಸಲಾಯಿತು.

* ಈ ಪ್ರಕರಣದ ಮೊದಲ ಆರೋಪಿ ಪಲ್ಸರ್ ಸುನಿಯನ್ನು ಫೆಬ್ರವರಿ 23 ರಂದು ಬಂಧಿಸಲಾಯಿತು. ನ್ಯಾಯಾಲಯಕ್ಕೆ ಶರಣಾಗಲು ಬಂದಾಗ ಆತನನ್ನು ಬಂಧಿಸಲಾಯಿತು. ಇದಕ್ಕೂ ಮೊದಲೇ ಅಶ್ಲೀಲ ದೃಶ್ಯಗಳನ್ನು ಒಂದೆಡೆ ಹಸ್ತಾಂತರಿಸಲಾಗಿತ್ತು. ಇದರ ನಡುವೆ ಸುನಿ, ದಿಲೀಪ್‌ನನ್ನು ಭೇಟಿಯಾಗಲು ಸಹ ಪ್ರಯತ್ನಿಸಿದನು.

* ಏಪ್ರಿಲ್ 18 ರಂದು ಅಂಗಮಾಲಿ ನ್ಯಾಯಾಲಯದಲ್ಲಿ ಆರೋಪಪಟ್ಟಿ ಸಲ್ಲಿಸಲಾಯಿತು. ಪಲ್ಸರ್ ಸುನಿ ಅವರನ್ನು ಮೊದಲ ಆರೋಪಿಯನ್ನಾಗಿ ಮಾಡಲಾಗಿದೆ.

* ಏಪ್ರಿಲ್ 20 ರಂದು ವಿಷ್ಣು ಎಂಬ ವ್ಯಕ್ತಿ ತನಗೆ ಕರೆ ಮಾಡಿ 1.5 ಕೋಟಿ ರೂಪಾಯಿ ಬೇಡಿಕೆ ಇಟ್ಟಿದ್ದಾನೆ ಎಂದು ದಿಲೀಪ್ ದೂರು ನೀಡಿದರು.

* ಜೂನ್ 25 ರಂದು ಸುನಿಯ ಸಹ ಆರೋಪಿ ವಿಷ್ಣು ಮತ್ತು ಸನಲ್ ದಿಲೀಪ್ ಅವರನ್ನು ಬ್ಲ್ಯಾಕ್ ಮೇಲ್ ಮಾಡಲು ಯತ್ನಿಸಿದ್ದಾರೆ ಎಂದು ಆರೋಪಿಸಲಾಯಿತು.

* ಜೂನ್ 28 ರಂದು ನಟರಾದ ದಿಲೀಪ್ ಮತ್ತು ನಾದಿರ್​ ಶಾ ಅವರನ್ನು ಪ್ರಕರಣಕ್ಕೆ ಸಂಬಂಧಿಸಿದಂತೆ ವಿಚಾರಣೆ ನಡೆಸಲಾಯಿತು.

* ಜುಲೈ 2ರಂದು ದಿಲೀಪ್ ಅವರ ಸಿನಿಮಾ ಶೂಟಿಂಗ್​ ಸ್ಥಳದಲ್ಲಿ ಪಲ್ಸರ್ ಸುನಿ ಇದ್ದ ಫೋಟೋ ಕಾಣಿಸಿಕೊಂಡಿತು.

* ಜುಲೈ 10 ರಂದು ದಿಲೀಪ್ ಅವರನ್ನು ಬಂಧಿಸಲಾಯಿತು. ನಂತರ ಅವರನ್ನು ಅಲುವಾ ಸಬ್-ಜೈಲಿನಲ್ಲಿ ಇರಿಸಲಾಯಿತು.

* ಜುಲೈ 20 ರಂದು ಸಾಕ್ಷ್ಯ ನಾಶಪಡಿಸಿದ್ದಕ್ಕಾಗಿ ಸುನಿ ಅವರ ಮೊದಲ ವಕೀಲ ಪ್ರತೀಶ್ ಚಾಕೊ ಅವರನ್ನು ಬಂಧಿಸಲಾಯಿತು.

* ಪ್ರತಿಶ್ ಚಾಕೊ ಅವರ ಜೂನಿಯರ್ ರಾಜು ಜೋಸೆಫ್ ಅವರನ್ನು ಆಗಸ್ಟ್ 2 ರಂದು ಬಂಧಿಸಲಾಯಿತು.

* ಸೆಪ್ಟೆಂಬರ್ 2 ರಂದು ದಿಲೀಪ್ ಅವರ ತಂದೆಯ ಶ್ರದ್ಧಾ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಅವಕಾಶ ನೀಡಲಾಯಿತು.

* ಅಕ್ಟೋಬರ್ 3 ರಂದು ಹೈಕೋರ್ಟ್ ಕಟ್ಟುನಿಟ್ಟಿನ ಷರತ್ತುಗಳೊಂದಿಗೆ ದಿಲೀಪ್‌ಗೆ ಜಾಮೀನು ನೀಡಿತು.

* ನವೆಂಬರ್ 21 ರಂದು ದಿಲೀಪ್ ಅವರನ್ನು ವಿದೇಶಕ್ಕೆ ಪ್ರಯಾಣಿಸಲು ಹೈಕೋರ್ಟ್ ಅನುಮತಿ ನೀಡಿತು.

* ನವೆಂಬರ್ 22 ರಂದು ದಿಲೀಪ್ ಅವರನ್ನು ಪೂರಕ ಆರೋಪಪಟ್ಟಿಯಲ್ಲಿ ಎಂಟನೇ ಪ್ರತಿವಾದಿಯನ್ನಾಗಿ ಮಾಡಲಾಯಿತು.

* ಮಾರ್ಚ್ 8, 2018 ರಂದು ಎರ್ನಾಕುಲಂ ಸೆಷನ್ಸ್ ನ್ಯಾಯಾಲಯದಲ್ಲಿ ಪ್ರಕರಣದ ವಿಚಾರಣೆ ಪ್ರಾರಂಭವಾಯಿತು.

* ನವೆಂಬರ್ 29, 2019 ರಂದು, ಸುಪ್ರೀಂ ಕೋರ್ಟ್ ಆರು ತಿಂಗಳೊಳಗೆ ವಿಚಾರಣೆಯನ್ನು ಪೂರ್ಣಗೊಳಿಸಬೇಕೆಂದು ನಿರ್ದೇಶಿಸಿತು.

* ಜನವರಿ 30, 2020 ರಂದು ಸಾಕ್ಷ್ಯ ವಿಚಾರಣೆ ಪ್ರಾರಂಭವಾಯಿತು.

* ಡಿಸೆಂಬರ್ 25, 2021 ರಂದು ನಿರ್ದೇಶಕ ಬಾಲಚಂದ್ರ ಕುಮಾರ್ ಅವರು ಕೆಲವು ಪ್ರಮುಖ ಹೇಳಿಕೆಗಳನ್ನು ಬಹಿರಂಗಪಡಿಸಿದರು.

* ಜನವರಿ 4, 2022 ರಂದು ಬಾಲಚಂದ್ರ ಕುಮಾರ್ ಅವರ ಹೇಳಿಕೆಗಳ ಆಧಾರದ ಮೇಲೆ ತನಿಖೆಯನ್ನು ಮುಂದುವರಿಸಲು ಕೋರ್ಟ್​ ಅನುಮತಿ ನೀಡಿತು.

* ಸೆಪ್ಟೆಂಬರ್ 17, 2024 ರಂದು ಪಲ್ಸರ್ ಸುನಿಗೆ ಜಾಮೀನು ನೀಡಲಾಯಿತು.

* ಡಿಸೆಂಬರ್ 11, 2024 ರಂದು ಅಂತಿಮ ವಾದಗಳು ಪ್ರಾರಂಭವಾದವು.

* ಪ್ರತಿವಾದಿಯ ವಾದಗಳು ಏಪ್ರಿಲ್ 9, 2025 ರಂದು ಮುಕ್ತಾಯಗೊಂಡವು.

* 2025, ಡಿಸೆಂಬರ್​ 8ರಂದು ತೀರ್ಪು ಪ್ರಕಟಿಸಿದ ನ್ಯಾಯಾಲಯ ನಟ ದಿಲೀಪ್​ ಅವರನ್ನು ಪ್ರಕರಣದಿಂದ ಖುಲಾಸೆಗೊಳಿಸಿ, ಉಳಿದ ಆರೋಪಿಗಳನ್ನು ತಪ್ಪಿತಸ್ಥರೆಂದು ಹೇಳಿತು. ಅಲ್ಲದೆ, ಡಿಸೆಂಬರ್​ 12ರಂದು ಶಿಕ್ಷೆ ಪ್ರಕಟಿಸುವುದಾಗಿ ಹೇಳಿತು.

* ಡಿಸೆಂಬರ್​ 12ರಂದು ತೀರ್ಪು ಪ್ರಕಟಿಸಿದ ಎರ್ನಾಕುಲಂ ಪ್ರಧಾನ ಸೆಷನ್ಸ್ ನ್ಯಾಯಾಲಯದ ನ್ಯಾಯಾಧೀಶ ಹನಿ ಎಂ ವರ್ಗೀಸ್, ಆರು ಆರೋಪಿಗಳಿಗೆ 20 ವರ್ಷಗಳ ಕಠಿಣ ಶಿಕ್ಷೆಯನ್ನು ವಿಧಿಸಿ, 50 ಸಾವಿರ ರೂ. ದಂಡವನ್ನು ಪಾವತಿಸಲು ಸೂಚಿಸಿದೆ. ಪ್ರಕರಣದ ಪ್ರಮುಖ ಆರೋಪಿ ಸುನಿಲ್‌ಗೆ ಐಟಿ ಕಾಯ್ದೆಯಡಿ ಹೆಚ್ಚುವರಿಯಾಗಿ 5 ವರ್ಷ ಜೈಲು ಶಿಕ್ಷೆಯನ್ನು ವಿಧಿಸಿದ್ದು, ಸುನಿ 25 ವರ್ಷಗಳ ಕಾಲ ಜೈಲು ಶಿಕ್ಷೆ ಅನುಭವಿಸಬೇಕು.

* ಆರು ಆರೋಪಿಗಳಾದ ಎನ್.ಎಸ್. ಸುನಿಲ್ (ಪಲ್ಸರ್ ಸುನಿ), ಮಾರ್ಟಿನ್ ಆಂಟನಿ, ಬಿ. ಮಣಿಕಂದನ್, ವಿ.ಪಿ. ವಿಜೀಶ್, ಎಚ್. ಸಲೀಂ, ಮತ್ತು ಪ್ರದೀಪ್ 50,000 ರೂ. ದಂಡದ ಜತೆ 20 ವರ್ಷಗಳ ಜೈಲು ಶಿಕ್ಷೆಗೆ ಗುರಿಯಾಗಿದ್ದಾರೆ. ಮುಖ್ಯವಾಗಿ, ಆರೋಪಿಗಳ ದಂಡದ ಮೊತ್ತದಿಂದ ಸಂತ್ರಸ್ತ ನಟಿಗೆ 5 ಲಕ್ಷ ರೂ. ಹಣವನ್ನು ನೀಡಲಾಗುವುದು ಎಂದು ತೀರ್ಪಿನಲ್ಲಿ ಉಲ್ಲೇಖಿಸಲಾಗಿದೆ, (ಏಜೆನ್ಸೀಸ್​).