ತಂದೆಯನ್ನು ನೆನೆದು ಉದ್ಧವ್ ಭಾವುಕ ಪೋಸ್ಟ್..ಹೋರಾಟ ಇನ್ನೂ ಮುಗಿದಿಲ್ಲ ಅಂದ್ರು ರಾಜ್...ಠಾಕ್ರೆ ಸಹೋದರರ ​ಪ್ರತಿಜ್ಞೆ ಏನು ಗೊತ್ತಾ..? | Thackeray Brothers

ಬೃಹನ್ಮುಂಬೈ ಮುನ್ಸಿಪಲ್ ಕಾರ್ಪೊರೇಷನ್ ಚುನಾವಣೆಯಲ್ಲಿ ಬಿಜೆಪಿ ಮತ್ತು ಏಕನಾಥ್ ಶಿಂಧೆ ಬಣದ ಶಿವಸೇನೆ ಜಯಗಳಿಸಿದ್ದು, ಮಹಾಯುತಿ ಮೈತ್ರಿಕೂಟವನ್ನು ಸೋಲಿಸಲು ಒಗ್ಗೂಡಿದ್ದ ಠಾಕ್ರೆಗಳಿಂದ ಅಧಿಕಾರವನ್ನು ಕಸಿದುಕೊಂಡಿದೆ.

ಮರಾಠಿಗರಿಗೆ ಅರ್ಹ ಗೌರವ ಸಿಗುವವರೆಗೆ ಹೋರಾಟ ಹೀಗೆಯೇ ಮುಂದುವರಿಯುತ್ತದೆ ಎಂದಿರುವ ಠಾಕ್ರೆ ಸಹೋದರರು, ಮರಾಠಿ ಉದ್ದೇಶವನ್ನು ಅನುಸರಿಸಿ, ಮುಂಬೈ ನಿವಾಸಿಗಳಿಗೆ ಉತ್ತಮ ಜೀವನವನ್ನು ನೀಡುತ್ತದೆ ಎಂದು ಭರವಸೆ ವ್ಯಕ್ತಪಡಿಸಿದರು.

ಸೋಲಿಗೆ ಎದೆಗುಂದುವುದಿಲ್ಲ, ಮರಾಠಿ ಜನರ ವಿರುದ್ಧ ಇರುವವರನ್ನು ನಮ್ಮ ಕಾರ್ಪೊರೇಟರ್‌ಗಳು ಖಂಡಿತವಾಗಿಯೂ ಮೊಣಕಾಲೂರಿ ಕೂರಿಸುತ್ತಾರೆ ಎಂದು ಗುಡುಗಿರುವ ರಾಜ್ ಠಾಕ್ರೆ, ಬಿಎಂಸಿ ಚುನಾವಣೆಯಲ್ಲಿ ಎಂಎನ್‌ಎಸ್ ಕೇವಲ ಆರು ಸ್ಥಾನಗಳನ್ನು ಗೆಲ್ಲಲು ಸಾಧ್ಯವಾದರೂ ರಾಜ್ಯ ಮತ್ತು ಮರಾಠಿಗಳಿಗಾಗಿ ಹೋರಾಡುತ್ತಲೇ ಇರುವುದಾಗಿ ಪತ್ರ ಬರೆಯುವ ಮೂಲಕ ಪ್ರತಿಜ್ಞೆ ಮಾಡಿದ್ದಾರೆ. 

ಇಡೀ ರಾಜ್ಯದ್ಯಂತ ಆಳುವ ಶಕ್ತಿಗಳು ಮತ್ತು ಅವರ ಆಶ್ರಯದಲ್ಲಿರುವವರು ಮರಾಠಿ ಜನರನ್ನು ಕಿರುಕುಳ ಮತ್ತು ಶೋಷಣೆ ಮಾಡಲು ಸಿಗುವ ಪ್ರತಿಯೊಂದು ಅವಕಾಶವನ್ನು ಬಳಸಿಕೊಳ್ಳುತ್ತಿದೆ, ಆದ್ದರಿಂದ ನಾವು ನಮ್ಮ ಮರಾಠಿ ಜನರ ಬೆಂಬಲಕ್ಕೆ ದೃಢವಾಗಿ ನಿಲ್ಲುವುದು ಅನಿವಾರ್ಯವಾಗಿದೆ. ಚುನಾವಣೆಗಳು ಬರುತ್ತವೆ ಮತ್ತು ಹೋಗುತ್ತವೆ ಆದರೆ ನಮ್ಮ ಉಸಿರು ಮರಾಠಿ ಎಂಬುದನ್ನು ನಾವು ಎಂದಿಗೂ ಮರೆಯಬಾರದು ಎಂದು ಹೇಳಿದರು. ಚುನಾವಣೆ ವಿಷಯದಲ್ಲಿ ಎಲ್ಲಿ, ಏನು ತಪ್ಪಾಗಿದೆ ಎನ್ನುವುದನ್ನು ಎಂಎನ್‌ಎಸ್ ವಿಶ್ಲೇಷಿಸಿ, ಆತ್ಮಾವಲೋಕನ ಮಾಡಿಕೊಳ್ಳುತ್ತದೆ ಎಂದರು.

227 ಸದಸ್ಯ ಬಲದ ಬಿಎಂಸಿಯಲ್ಲಿ ಅಧಿಕಾರ ಹಿಡಿಯಲು 114 ಸ್ಥಾನಗಳು ಬೇಕು. ಬಿಜೆಪಿ 89 ಸ್ಥಾನಗಳಲ್ಲಿ ಗೆಲುವು ಸಾಧಿಸುವ ಮೂಲಕ ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ, ಡಿಸಿಎಂ ಏಕನಾಥ್ ಶಿಂಧೆ ನೇತೃತ್ವದ ಶಿವಸೇನೆ 29 ಸ್ಥಾನಗಳನ್ನು ಗೆದ್ದಿದ್ದು, ಮಹಾಯುತಿ ಮೈತ್ರಿಕೂಟ 118 ವಾರ್ಡ್​ಗಳನ್ನು ತನ್ನ ತೆಕ್ಕೆಗೆ ಹಾಕಿಕೊಂಡಿದೆ. ನಾಲ್ಕು ದಶಕಗಳಿಂದ ಬಿಎಂಸಿಯನ್ನು ಆಳುತ್ತಿರುವ ಠಾಕ್ರೆ ಬಣವು 65 ಸ್ಥಾನಗಳೊಂದಿಗೆ ಎರಡನೇ ಅತಿದೊಡ್ಡ ಪಕ್ಷವಾಗಿದೆ. 

ಈ ಚುನಾವಣೆಯೂ ಠಾಕ್ರೆ ಸಹೋದರರ ಪುನರ್ಮಿಲನಕ್ಕೆ ಸಾಕ್ಷಿಯಾಗಿದ್ದು, ಉದ್ಧವ್​ ಬಣ ಮತ್ತು ಮಹಾರಾಷ್ಟ್ರ ನವನಿರ್ಮಾಣ ಸೇನಾ ಮೈತ್ರಿ ಮಾಡಿಕೊಂಡು ಕಣಕ್ಕೆ ಧುಮುಕಿದವು. ಆದರೂ ಕೂಡ ಈ ಮೈತ್ರಿಕೂಟ ಅಧಿಕಾರ ಪಡೆಯಲು ವಿಫಲವಾಗಿದೆ. ಅನೇಕ ವರ್ಷಗಳ ಕಾಲ ಮಹಾರಾಷ್ಟ್ರವನ್ನು ಆಳಿದ್ದ ಕಾಂಗ್ರೆಸ್ ಕೂಡ ಈ ಚುನಾವಣೆಯಲ್ಲಿ ಪ್ರಭಾವ ಬೀರಲು ವಿಫಲವಾಗಿದ್ದು, ಕೇವಲ 24 ಸ್ಥಾನಗಳಿಗೆ ತೃಪ್ತಿಪಟ್ಟುಕೊಂಡಿದ್ದು, ಪ್ರಕಾಶ್ ಅಂಬೇಡ್ಕರ್​​ರ ವಂಚಿತ್ ಬಹುಜನ್ ಅಘಾಡಿ (ವಿಬಿಎ) ಜೊತೆ ಮೈತ್ರಿ ಮಾಡಿಕೊಂಡು ಕೈ ಪಾಳಯ ಈ ಚುನಾವಣೆಯಲ್ಲಿ ಸ್ಪರ್ಧಿಸಿತ್ತು(ಏಜೆನ್ಸೀಸ್​).