ದಲಿತ-ಮುಸ್ಲಿಂ ಮತಬ್ಯಾಂಕ್ ಮೇಲೆ ಕಣ್ಣು
ಈ ಮೈತ್ರಿಯ ಅಸಲಿ ಲೆಕ್ಕಾಚಾರ ಇರುವುದೇ ದಲಿತ ಮತ್ತು ಮುಸ್ಲಿಂ ಮತಗಳ ಕ್ರೋಢೀಕರಣದಲ್ಲಿ. ವರದಿ ಪ್ರಕಾರ, ಉತ್ತರ ಪ್ರದೇಶದ ಒಟ್ಟು ಜನಸಂಖ್ಯೆಯಲ್ಲಿ ಮುಸ್ಲಿಮರು ಸುಮಾರು ಶೇ. 19 ರಷ್ಟಿದ್ದರೆ, ಪರಿಶಿಷ್ಟ ಜಾತಿಗಳು (SC) ಸುಮಾರು ಶೇ. 21 ರಷ್ಟಿವೆ. ಅಂದರೆ, ಈ ಎರಡು ಸಮುದಾಯಗಳು ಸೇರಿದರೆ ರಾಜ್ಯದ ಒಟ್ಟು ಮತದಾರರಲ್ಲಿ ಸುಮಾರು ಶೇ. 40 ರಷ್ಟಾಗುತ್ತಾರೆ. ಚುನಾವಣೆಯಲ್ಲಿ ಯಾರ ಹಣೆಬರಹವನ್ನಾದರೂ ಬದಲಿಸಬಲ್ಲ ದೊಡ್ಡ ಶಕ್ತಿ ಇದಾಗಿದೆ.
ತೆಲಂಗಾಣದ ಹೊರಗೆ ತನ್ನ ನೆಲೆ ವಿಸ್ತರಿಸಲು ಓವೈಸಿ ಅವರ AIMIM ಸತತ ಪ್ರಯತ್ನ ನಡೆಸುತ್ತಿದೆ. ಯುಪಿಯಲ್ಲಿ ಅಲ್ಪಸಂಖ್ಯಾತ ಮತಗಳ ಮೇಲೆ ಓವೈಸಿ ಹಿಡಿತ ಹೊಂದಿದ್ದರೂ, ಅವುಗಳನ್ನು ಗೆಲುವಿನ ಸೀಟುಗಳಾಗಿ ಬದಲಾಯಿಸುವಲ್ಲಿ ಪಕ್ಷ ವಿಫಲವಾಗಿತ್ತು. ಇನ್ನೊಂದೆಡೆ, 2024ರ ಲೋಕಸಭಾ ಚುನಾವಣೆಯಲ್ಲಿ ನಗೀನಾ ಕ್ಷೇತ್ರದಿಂದ ಭರ್ಜರಿ ಗೆಲುವು ಸಾಧಿಸಿದ ನಂತರ ಚಂದ್ರಶೇಖರ್ ಆಜಾದ್ ಪ್ರಮುಖ ದಲಿತ ನಾಯಕನಾಗಿ ಗುರುತಿಸಿಕೊಂಡಿದ್ದಾರೆ.
ಈಗ ಇವರಿಬ್ಬರೂ ಒಂದಾಗಿರುವುದು ಅಖಿಲೇಶ್ ಯಾದವ್ ಅವರ ಸಮಾಜವಾದಿ ಪಕ್ಷಕ್ಕೆ ದೊಡ್ಡ ತಲೆನೋವಾಗುವ ಸಾಧ್ಯತೆಯಿದೆ. ಸಮಾಜವಾದಿ ಪಕ್ಷ ಕೂಡ ಹಿಂದುಳಿದವರು, ದಲಿತರು ಮತ್ತು ಅಲ್ಪಸಂಖ್ಯಾತರನ್ನು ಒಳಗೊಂಡ 'ಪಿಡಿಎ' ಸೂತ್ರವನ್ನೇ ನಂಬಿಕೊಂಡು ರಾಜಕಾರಣ ಮಾಡುತ್ತಿರುವ ಹಿನ್ನಲೆ ಈ ಹೊಸ ಮೈತ್ರಿ ಇಂಡಿ ಕೂಟಕ್ಕೆ ಕೊಡಲಿ ಏಟನ್ನು ನೀಡಲಿದೆ.
