ಏನಿದು ಫ್ಲೆಕ್ಸ್-ಇಂಧನ? ಹೇಗೆ ಕೆಲಸ ಮಾಡುತ್ತೆ?
ಫ್ಲೆಕ್ಸ್-ಇಂಧನ ವಾಹನಗಳು ಕೇವಲ ಪೆಟ್ರೋಲ್ ಮಾತ್ರವಲ್ಲದೆ, ಪೆಟ್ರೋಲ್ ಜೊತೆ ಎಥೆನಾಲ್ ಎಷ್ಟು ಬೆರೆತಿದ್ದರೂ, ಅಥವಾ ಸಂಪೂರ್ಣವಾಗಿ ಬರೀ ಎಥೆನಾಲ್ (E100) ಹಾಕಿದರೂ ಸುಲಭವಾಗಿ ಚಲಿಸುತ್ತವೆ. ಈ ವಾಹನಗಳಲ್ಲಿರುವ ಅತ್ಯಾಧುನಿಕ ಸ್ಮಾರ್ಟ್ ಸೆನ್ಸರ್‌ಗಳು ಟ್ಯಾಂಕ್‌ನಲ್ಲಿರುವ ಇಂಧನದ ಗುಣಮಟ್ಟವನ್ನು ತಾವೇ ಗ್ರಹಿಸಿ, ಎಂಜಿನ್ ಹೇಗೆ ಕೆಲಸ ಮಾಡಬೇಕೋ ಹಾಗೆ ಹೊಂದಿಸಿಕೊಳ್ಳುತ್ತವೆ.
ಈಗಾಗಲೇ ಬ್ರೆಜಿಲ್‌ನಲ್ಲಿ 2003 ರಿಂದಲೇ ಈ ತಂತ್ರಜ್ಞಾನ ಯಶಸ್ವಿಯಾಗಿ ಕಾರ್ಯನಿರ್ವಹಿಸುತ್ತಿದೆ. ಅಲ್ಲಿ ಕಬ್ಬಿನಿಂದ ತಯಾರಾಗುವ ಎಥೆನಾಲ್‌ನಿಂದಲೇ ಬಹುತೇಕ ವಾಹನಗಳು ರಸ್ತೆಯಲ್ಲಿ ಓಡಾಡುತ್ತವೆ. ಇದೀಗ ಅದೇ ಕ್ರಾಂತಿಯನ್ನು ಭಾರತದಲ್ಲೂ ಜಾರಿಗೆ ತರಲು ಸರ್ಕಾರ ಮುಂದಾಗಿದೆ.
ಈಗಿರುವ ವಾಹನಗಳಿಗೆ ಎಥೆನಾಲ್ ಹಾಕಬಹುದಾ?
ಈ ಹೊಸ ನಿಯಮ ಪ್ರಕಟವಾಗಿದೆ ಎಂದು ಈಗ ನೀವು ಓಡಿಸುತ್ತಿರುವ ಪೆಟ್ರೋಲ್ ಬೈಕ್ ಅಥವಾ ಕಾರಿಗೆ ನೇರವಾಗಿ E85 ಅಥವಾ E100 ಎಥೆನಾಲ್ ಹಾಕುವಂತಿಲ್ಲ! ಸದ್ಯ ಭಾರತದಲ್ಲಿ ಶೇ. 20ರಷ್ಟು ಎಥೆನಾಲ್ ಮಿಶ್ರಿತ (E20) ಪೆಟ್ರೋಲ್ ಬಳಸಲಾಗುತ್ತಿದೆ.
ಸೂಕ್ತ ಕಂಪನಿ ಪ್ರಮಾಣೀಕರಣವಿಲ್ಲದೆ ಹಳೆಯ ಎಂಜಿನ್‌ಗಳಿಗೆ ಪೂರ್ತಿ ಎಥೆನಾಲ್ ಹಾಕಿದರೆ ಎಂಜಿನ್ ಕೆಟ್ಟುಹೋಗುವ ಸಾಧ್ಯತೆ ಇರುತ್ತದೆ. ಕಂಪನಿಗಳಿಂದಲೇ ವಿಶೇಷವಾಗಿ ಪ್ರಮಾಣೀಕರಿಸಲ್ಪಟ್ಟ ಹೊಸ ಫ್ಲೆಕ್ಸ್-ಇಂಧನ ವಾಹನಗಳಿಗೆ ಮಾತ್ರ E85 ಮತ್ತು E100 ಬಳಸಲು ಅನುಮತಿ ದೊರೆಯಲಿದೆ.
