ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರವೂ ದೀಪಾವಳಿಗೂ ಮುನ್ನವೇ ಕೇಂದ್ರ ಸರ್ಕಾರಿ ನೌಕರರಿಗೆ ಭಾರಿ ಸಿಹಿ ಸುದ್ದಿ ನೀಡಿದ್ದು, ಬುಧವಾರ(ಅ. 28) ನಡೆದ ಸಚಿವ ಸಂಪುಟ ಸಭೆಯಲ್ಲಿ ತುಟ್ಟಿ ಭತ್ಯೆ (ಡಿಎ) ಶೇ. 3 ರಷ್ಟು ಹೆಚ್ಚಳಕ್ಕೆ ಅನುಮೋದನೆ ನೀಡಿದೆ.
ಕೇಂದ್ರ ಸರ್ಕಾರದ ಈ ನಿರ್ಧಾರವು 1.16 ಕೋಟಿಗೂ ಹೆಚ್ಚು ಕೇಂದ್ರ ಸರ್ಕಾರಿ ನೌಕರರು ಮತ್ತು ಪಿಂಚಣಿದಾರರಿಗೆ ಸಂತಸ ತಂದಿದೆ. ಈ ಹೆಚ್ಚಳವು 2026ರ ಜುಲೈ 1 ರಿಂದ ಪೂರ್ವಾನ್ವಯವಾಗುವಂತೆ ಜಾರಿಗೆ ಬರಲಿದೆ. ಈ ಹೊಸ ಹೆಚ್ಚಳದೊಂದಿಗೆ, 7ನೇ ವೇತನ ಆಯೋಗದ ಅಡಿಯಲ್ಲಿ ಕೇಂದ್ರ ಸರ್ಕಾರಿ ನೌಕರರು ಈಗ ಶೇಕಡಾ 63 ರಷ್ಟು ತುಟ್ಟಿಭತ್ಯೆಯನ್ನು ಪಡೆಯಲಿದ್ದಾರೆ. ಅಲ್ಲದೆ, ಸರ್ಕಾರವು ತುಟ್ಟಿ ಪರಿಹಾರವನ್ನು (DR) ಕೂಡ ಶೇಕಡಾ 3 ರಷ್ಟು ಹೆಚ್ಚಿಸುವುದಾಗಿ ಘೋಷಿಸಿದೆ.
ಹೆಚ್ಚುವರಿಯಾಗಿ, 6ನೇ ವೇತನ ಆಯೋಗದ ವ್ಯಾಪ್ತಿಗೆ ಬರುವವರಿಗೆ ತುಟ್ಟಿಭತ್ಯೆ ಶೇಕಡಾ 262ರಿಂದ ಶೇಕಡಾ 269ಕ್ಕೆ (+ಶೇಕಡಾ 7) ಮತ್ತು 5ನೇ ವೇತನ ಆಯೋಗದ ಅಡಿಯಲ್ಲಿ ಶೇಕಡಾ 483ರಿಂದ ಶೇಕಡಾ 497ಕ್ಕೆ (+ಶೇಕಡಾ 14) ಹೆಚ್ಚಾಗಿದೆ. ಈ ಒಟ್ಟು ತುಟ್ಟಿಭತ್ಯೆ ಹೆಚ್ಚಳಕ್ಕಾಗಿ ಸರ್ಕಾರವು 10,016 ಕೋಟಿ ರೂಪಾಯಿಗಳನ್ನು ವೆಚ್ಚ ಮಾಡಲಿದೆ ಎನ್ನಲಾಗಿದೆ. ಪ್ರಸ್ತುತ, ಕೇಂದ್ರ ಸರ್ಕಾರಿ ನೌಕರರು ಶೇ. 60ರಷ್ಟು ತುಟ್ಟಿ ಭತ್ಯೆ (DA) ಪಡೆಯುತ್ತಿದ್ದರೆ, ಪಿಂಚಣಿದಾರರು ಶೇ. 60ರಷ್ಟು ತುಟ್ಟಿ ಪರಿಹಾರ (DR) ಪಡೆಯುತ್ತಿದ್ದಾರೆ.
