ಉತ್ಸವದ ಸೀಸನ್‌ನಲ್ಲಿ ವ್ಯಾಪಾರಕ್ಕೆ ಆತಂಕ!
ಚಾಂದನಿ ಚೌಕ್, ಸದಾರ ಬಜಾರ್, ಖಾರಿ ಬೌಲಿ, ಕರೋಲ್ ಬಾಗ್, ಚಾವರಿ ಬಜಾರ್, ದರಿಯಾಗಂಜ್ ಸೇರಿದಂತೆ ಸುಮಾರು 20 ಕ್ಕೂ ಹೆಚ್ಚು ಪ್ರಮುಖ ಮಾರುಕಟ್ಟೆಗಳು ರಾಮ್‌ಲೀಲಾ ಮೈದಾನದ ಸುತ್ತಮುತ್ತ ಇವೆ. ಈ ಮಾರುಕಟ್ಟೆಗಳಲ್ಲಿ ಮಸಾಲೆ ಪದಾರ್ಥಗಳು, ಒಣದ್ರಾಕ್ಷಿ, ಬಟ್ಟೆ, ಆಭರಣಗಳು, ಎಲೆಕ್ಟ್ರಾನಿಕ್ಸ್ ಹಾಗೂ ಗೃಹೋಪಯೋಗಿ ವಸ್ತುಗಳ ವಹಿವಾಟು ಜೋರಾಗಿ ನಡೆಯುತ್ತದೆ. ಆದರೆ ರಾಲಿಯ ಕಾರಣದಿಂದ ಉಂಟಾಗುವ ಸಂಚಾರ ದಟ್ಟಣೆ ಹಾಗೂ ಬ್ಯಾರಿಕೇಡ್‌ಗಳಿಂದಾಗಿ ಗ್ರಾಹಕರು ಮಾರುಕಟ್ಟೆಗೆ ಆಗಮಿಸಲು ಕಷ್ಟವಾಗಲಿದ್ದು, ಇದರಿಂದ ಸಾವಿರಾರು ಕೋಟಿ ರೂಪಾಯಿ ವಹಿವಾಟು ನಷ್ಟವಾಗಲಿದೆ ಎಂದು ವ್ಯಾಪಾರಿಗಳು ಭೀತಿ ವ್ಯಕ್ತಪಡಿಸಿದ್ದಾರೆ.
ರಾಹುಲ್ ಗಾಂಧಿಯವರ ಮೊಹಬ್ಬತ್ ಕಿ ದೂಕಾನ್ ಉಲ್ಲೇಖ!
ರಾಹುಲ್ ಗಾಂಧಿ ಅವರ ಜನಪ್ರಿಯ ಘೋಷಣೆಯಾದ ಮೊಹಬ್ಬತ್ ಕಿ ದೂಕಾನ್ ಅನ್ನು ಉಲ್ಲೇಖಿಸಿರುವ ವ್ಯಾಪಾರಿಗಳು, ರಾಹುಲ್ ಜೀ, ನೀವು ದ್ವೇಷದ ಮಾರುಕಟ್ಟೆಯಲ್ಲಿ ಪ್ರೀತಿಯ ಅಂಗಡಿಯನ್ನು ತೆರೆಯುತ್ತೀರಿ, ನಾವು ನಿಮ್ಮನ್ನು ಗೌರವಿಸುತ್ತೇವೆ. ಆದರೆ ದೀಪಾವಳಿಯ ಮಾರುಕಟ್ಟೆಯಲ್ಲಿ ದಯವಿಟ್ಟು ಪ್ರೀತಿಯ ಅಂಗಡಿಯನ್ನು ಮುಚ್ಚಿಸಬೇಡಿ ಎಂದು ಭಾವುಕವಾಗಿ ಮನವಿ ಮಾಡಿದ್ದಾರೆ. ನಾವು ಯಾವುದೇ ರಾಜಕೀಯ ಸಂಘರ್ಷ ಬಯಸುವುದಿಲ್ಲ, ಬದಲಾಗಿ ಸಂವಾದದ ಮೂಲಕ ಪರಿಹಾರ ಕಂಡುಕೊಳ್ಳಲು ಬಯಸುತ್ತೇವೆ ಎಂದು ಸಿಟಿಐ ಸ್ಪಷ್ಟಪಡಿಸಿದೆ.
ಮುಖ್ಯ ಚುನಾವಣಾ ಆಯುಕ್ತರ ವಜಾಗೂಳಿಸುವವರೆಗೆ ಪ್ರತಿಭಟನೆ ನಿಲ್ಲುವುದಿಲ್ಲ ಎಂದು ರಾಹುಲ್ ಗಾಂಧಿ ಇತ್ತೀಚೆಗೆ ತಿಳಿಸಿದ್ದು, ಈ ರಾಜಕೀಯ ತಿಕ್ಕಾಟದ ನಡುವೆ ದೆಹಲಿ ವ್ಯಾಪಾರಿಗಳ ಈ ಹೊಸ ಪ್ರಸ್ತಾವನೆಗೆ ಕಾಂಗ್ರೆಸ್ ನಾಯಕರು ಯಾವ ಪ್ರತಿಕ್ರಿಯೆ ನೀಡಲಿದ್ದಾರೆ ಎಂಬುದು ಕುತೂಹಲ ಮೂಡಿಸಿದೆ(ಏಜೆನ್ಸೀಸ್).
