ಫುಡ್ ಪಾರ್ಸೆಲ್‌ನಲ್ಲಿ 20 ರೂ. ನೋಟು, ಕ್ಷಮಾಪಣೆ ಪತ್ರ: ನೆಟ್ಟಿಗರ ಹೃದಯ ಗೆದ್ದ ರೆಸ್ಟೋರೆಂಟ್‌ನ ಕ್ಯೂಟ್ ನಡೆ! Food Delivery

ಆಹಾರದ ಪೊಟ್ಟಣದ ಜೊತೆಗೆ ಒಂದು ಪುಟ್ಟ ಕೈಬರಹದ ಕ್ಷಮೆಯಾಚನೆ ಪತ್ರ ಹಾಗೂ ಅದರೊಂದಿಗೆ 20 ರೂಪಾಯಿಯ ನೋಟೊಂದು ಲಭ್ಯವಾಗಿತ್ತು. ಸದ್ಯ ಈ ಭಿನ್ನ ಹಾಗೂ ಚಿಂತನಶೀಲ ನಡೆ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗುತ್ತಿದ್ದು, ನೆಟ್ಟಿಗರ ಹೃದಯ ಗೆಲ್ಲುತ್ತಿದೆ.

ಶ್ರಿಯಾ ಎಂಬ ಇನ್‌ಸ್ಟಾಗ್ರಾಮ್ ಬಳಕೆದಾರರು ರೆಸ್ಟೋರೆಂಟ್‌ ಒಂದರಲ್ಲಿ 'ಚೀಸೀ ಮೊಮೊ' (Cheesy Momos) ಆರ್ಡರ್ ಮಾಡಿದ್ದರು. ಆದರೆ, ಅವರ ಆರ್ಡರ್ ತಯಾರಿಸುವ ಹೊತ್ತಿಗೆ ರೆಸ್ಟೋರೆಂಟ್‌ನಲ್ಲಿ ಚೀಸೀ ಮೊಮೊಗಳ ಸ್ಟಾಕ್ ಖಾಲಿಯಾಗಿತ್ತು. ಇಂತಹ ಸಂದರ್ಭದಲ್ಲಿ ಗ್ರಾಹಕರಿಗೆ ತಿಳಿಸದೆ ಆರ್ಡರ್ ರದ್ದುಗೊಳಿಸುವ ಅಥವಾ ಸುಮ್ಮನೆ ಕಳುಹಿಸುವ ಬದಲಿಗೆ, ರೆಸ್ಟೋರೆಂಟ್ ಸಾಮಾನ್ಯ ಗರಿಗರಿಯಾದ (Crispy) ಮೊಮೊಗಳನ್ನು ಪ್ಯಾಕ್ ಮಾಡಿ ಕಳುಹಿಸಿತ್ತು. ಜೊತೆಗೆ, ಎರಡು ಖಾದ್ಯಗಳ ನಡುವಿನ ಬೆಲೆಯ ವ್ಯತ್ಯಾಸವಾದ 20 ರೂಪಾಯಿಯನ್ನು ನಗದು ರೂಪದಲ್ಲಿ ಮರುಪಾವತಿಸಿತ್ತು.

ಶ್ರಿಯಾ ಅವರು ಪಾರ್ಸೆಲ್ ಬಿಚ್ಚಿದಾಗ ಪ್ಯಾಕೇಜ್‌ಗೆ ಅಂಟಿಸಲಾಗಿದ್ದ ಕೈಬರಹದ ಟಿಪ್ಪಣಿಯೊಂದು ಕಂಡುಬಂದಿದೆ. ಅದರಲ್ಲಿ, "ಚೀಸೀ ಮೊಮೊಗಳು ಸ್ಟಾಕ್‌ನಲ್ಲಿ ಇಲ್ಲದ ಕಾರಣ ಸಾಮಾನ್ಯ ಗರಿಗರಿಯಾದ ಮೊಮೊಗಳನ್ನು ಕಳುಹಿಸಲಾಗಿದೆ. ಬೆಲೆಯ ವ್ಯತ್ಯಾಸವಾದ 20 ರೂಪಾಯಿಯನ್ನು ಪಾರ್ಸೆಲ್ ಒಳಗಡೆ ಮರುಪಾವತಿಸಲಾಗಿದೆ, ಧನ್ಯವಾದಗಳು" ಎಂದು ಬರೆಯಲಾಗಿತ್ತು.

ಆದಾಗ್ಯೂ, ಬಳಕೆದಾರರು ಈ ಭಿನ್ನ ಅನುಭವವನ್ನು ವೀಡಿಯೋ ಮಾಡಿ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ವೀಡಿಯೋ ಜೊತೆಗೆ ಸಣ್ಣ ಸನ್ನೆಗಳು ದೊಡ್ಡ ಅನಿಸಿಕೆಯನ್ನು ಬಿಡುತ್ತವೆ ಹಾಗೂ ಒಂದು ರೆಸ್ಟೋರೆಂಟ್ ನಿಜವಾಗಿಯೂ ತನ್ನ ಗ್ರಾಹಕರ ಬಗ್ಗೆ ಕಾಳಜಿ ವಹಿಸಿದಾಗ... ಎಂದು ಬರೆದುಕೊಂಡಿದ್ದಾರೆ. ಈ ಕ್ಲಿಪ್ ವೀಕ್ಷಕರ ಗಮನ ಸೆಳೆದಿದ್ದು, ಲಕ್ಷಾಂತರ ಜನರು ಇದನ್ನು ಶ್ಲಾಘಿಸುತ್ತಿದ್ದಾರೆ.

ಇಲ್ಲಿ ಮರುಪಾವತಿ ಮಾಡಿದ ಮೊತ್ತ ಸಾಧಾರಣವಾಗಿದ್ದರೂ, ವೀಕ್ಷಕರು ಆ ಸನ್ನೆಯ ಹಿಂದಿನ ಪ್ರಾಮಾಣಿಕತೆಯನ್ನು ಮೆಚ್ಚಿಕೊಂಡಿದ್ದಾರೆ. ಸದ್ದಿಲ್ಲದೆ ಆರ್ಡರ್ ಬದಲಾಯಿಸಿ ಗ್ರಾಹಕರು ಗಮನಿಸುವುದಿಲ್ಲ ಎಂದು ಭಾವಿಸುವ ಬದಲು, ರೆಸ್ಟೋರೆಂಟ್ ಪಾರದರ್ಶಕತೆ, ಕೈಬರಹದ ಕ್ಷಮೆಯಾಚನೆ ಮತ್ತು ನಗದು ಮರುಪಾವತಿಯನ್ನು ಆರಿಸಿಕೊಂಡಿದೆ. ರೆಸ್ಟೋರೆಂಟ್‌ನ ಈ ನಡೆ ಒಂದು ಸಾಮಾನ್ಯ ನಿರಾಶಾದಾಯಕ ಅನುಭವವನ್ನು ಸ್ಮರಣೀಯ ಕ್ಷಣವಾಗಿ ಪರಿವರ್ತಿಸಿದ್ದು, ಅನುಕೂಲಕ್ಕಿಂತ ಪ್ರಾಮಾಣಿಕತೆಯನ್ನು ಮೆರೆದ ರೆಸ್ಟೋರೆಂಟ್ ಆಡಳಿತ ಮಂಡಳಿಯನ್ನು ನೆಟ್ಟಿಗರು ಮುಕ್ತಕಂಠದಿಂದ ಶ್ಲಾಘಿಸುತ್ತಿದ್ದಾರೆ (ಏಜೆನ್ಸೀಸ್​).