ಚಂದ್ರನ ಅಂಗಳದಲ್ಲೂ 4ಜಿ ಜಾಲ ಸ್ಥಾಪನೆಗೆ ನಾಸಾ ನಿರ್ಧಾರ

ನ್ಯೂಯಾರ್ಕ್: ಚಂದಿರನ ಅಂಗಳದಲ್ಲಿ 4ಜಿ ಇಂಟರ್​ನೆಟ್ ಜಾಲ ಸ್ಥಾಪಿಸಲು ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ ನಿರ್ಧರಿಸಿದೆ. ಈ ಕೆಲಸ ನಿಭಾಯಿಸಲು ಟೆಲಿಕಾಂ ದಿಗ್ಗಜ ನೋಕಿಯಾ ಸಹಿತ ಹಲವು ಕಂಪನಿಗಳು ಗುತ್ತಿಗೆ ಪಡೆದಿವೆ. ಮೊದಲು 4ಜಿ/ಎಲ್​ಟಿಇ ಜಾಲ ಸ್ಥಾಪಿಸಿ ನಂತರ ಅದನ್ನು 5ಜಿಗೆ ಪರಿವರ್ತಿಸಲು ನೋಕಿಯಾ ಯೋಜಿಸಿದೆ. ನಾಸಾದ ‘ಟಿಪ್ಪಿಂಗ್ ಪಾಯಿಂಟ್’ ಆಯ್ಕೆ ಪ್ರಕ್ರಿಯೆಯನ್ವಯ ಈ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ. ಬಾಹ್ಯಾಕಾಶ ಸಂಶೋಧನೆ ಮತ್ತು ಅಭಿವೃದ್ಧಿ ಈ ಯೋಜನೆಯ ಉದ್ದೇಶವಾಗಿದೆ.

ಗುರಿಯೇನು?: ಚಂದ್ರನ ಮೇಲೆ ಈ ದಶಕದ ಅಂತ್ಯದೊಳಗೆ ಕಾಯಂ ‘ಆರ್ಟೆಮಿಸ್’ ಕಾರ್ಯಕ್ರಮ ಜಾರಿಗೊಳಿಸಲು ಅಗತ್ಯವಾದ ತಂತ್ರಜ್ಞಾನ ಅಭಿವೃದ್ಧಿ ಪಡಿಸುವುದು ನಾಸಾದ ಗುರಿ.

ವೇಗದ ಸಂವಹನ: 4ಜಿ ವ್ಯವಸ್ಥೆ ಚಂದ್ರನ ಮೇಲ್ಮೈ ಮೇಲೆ ಅತಿ ದೂರದ, ಅತಿ ವೇಗದ ಹಾಗೂ ದಕ್ಷ ಸಂವಹನಕ್ಕೆ ನೆರವಾಗುತ್ತದೆ ಎಂದು ನಾಸಾ ಅಧಿಕೃತ ಪ್ರಕಟಣೆಯಲ್ಲಿ ತಿಳಿಸಿದೆ.

ವಲಸೆಗೆ ತಯಾರಿ: ಚಂದ್ರನ ಮೇಲ್ಮೈ ಮೇಲೆ ದೀರ್ಘ ಕಾಲ ಬಾಳುವಂಥ ಇಂಧನ ವ್ಯವಸ್ಥೆ ಅಗತ್ಯವಾಗಿದೆ. ಚಂದ್ರನ ಮೇಲೆ ಮಾನವ ವಲಸೆ ಹೋಗುವ ಸಾಮರ್ಥ್ಯವನ್ನು ಕೂಡ ಅಭಿವೃದ್ಧಿಪಡಿಸಬೇಕಾಗಿದೆ ಎಂದು ನಾಸಾ ಆಡಳಿತಾಧಿಕಾರಿ ಜಿಮ್ ಬ್ರೖೆಡನ್​ಸ್ಟೈನ್ ಹೇಳಿದ್ದಾರೆ.

ಆಯ್ಕೆಯಾದ ಕಂಪನಿಗಳು

ಈ ಯೋಜನೆಗೆ ನಾಸಾ ಒಟ್ಟು 14 ಅಮೆರಿಕನ್ ಕಂಪನಿಗಳನ್ನು ಆಯ್ಕೆ ಮಾಡಿದೆ. ಅವುಗಳಲ್ಲಿ ನೋಕಿಯಾ ಕೂಡ ಒಂದು. ಸ್ಪೇಸ್ ಎಕ್ಸ್, ಲಾಕ್​ಹೀಡ್ ಮಾರ್ಟಿನ್, ಸಿಯೆರಾ ನೆವಾಡಾ, ಎಸ್​ಎಸ್​ಎಎಲ್ ರೊಬೋಟಿಕ್ಸ್ ಮತ್ತು ಯುನೈಟೆಡ್ ಲಾಂಚ್ ಅಲಯನ್ಸ್ (ಯುಎಲ್​ಎ) ಇತರ ಪ್ರಮುಖ ಕಂಪನಿಗಳು.

2018ರಲ್ಲೇ ಕ್ರಮ

ಚಂದ್ರನ ಮೇಲೆ ಎಲ್​ಟಿಇ ನೆಟ್​ವರ್ಕ್ ಸ್ಥಾಪಿಸಲು ನೋಕಿಯಾ 2018ರಲ್ಲೇ ಪ್ರಥಮ ಪ್ರಯತ್ನ ನಡೆಸಿತ್ತು. ಅಪೋಲೊ ಲ್ಯಾಂಡಿಂಗ್​ಗಾಗಿ ನೆಟ್​ವರ್ಕ್ ಸ್ಥಾಪಿಸಲು ಜರ್ಮನಿಯ ಬಾಹ್ಯಾಕಾಶ ಸಂಸ್ಥೆ ಪಿಟಿಸೈಂಟಿಸ್ಟ್ ್ಸ ಮತ್ತು ಬ್ರಿಟನ್​ನ ವೊಡಾಫೋನ್ ಜೊತೆ ಕೈಜೋಡಿಸಿತ್ತು. ಆದರೆ ಆ ಯೋಜನೆ ಕೊನೆಗೂ ಕೈಗೂಡಲೇ ಇಲ್ಲ.

2028ರ ಹೊತ್ತಿಗೆ ನಾಸಾದ ಗಗನಯಾನಿಗಳು ಚಂದ್ರನ ಮೇಲೆ ಕೆಲಸ ಮಾಡುವುದನ್ನು ನೋಡುವುದು ನಮ್ಮ ಗುರಿಯಾಗಿದೆ. ಅದಕ್ಕಾಗಿ ತ್ವರಿತವಾಗಿ ತಂತ್ರಜ್ಞಾನ ಅಭಿವೃದ್ಧಿ ಪಡಿಸಲಾಗುತ್ತದೆ.| ಜಿಮ್ ಬ್ರೖೆಡನ್​ಸ್ಟೈನ್, ನಾಸಾ ಆಡಳಿತಾಧಿಕಾರಿ