ನಂದಿ ಬೆಟ್ಟದಲ್ಲಿ ಮಯೂರ ಕ್ಯಾಂಟಿನ್, ಕಡಿಮೆ ಬೆಲೆಗೆ ಪ್ರವಾಸಿಗರ ಖುಷ್

ಚಿಕ್ಕಬಳ್ಳಾಪುರ: ಪ್ರವಾಸಿ ತಾಣ ನಂದಿ ಗಿರಿಧಾಮದ ಸೊಬಗನ್ನು ಅಸ್ವಾಧಿಸುವುದರ ಜತೆಗೆ ಕಡಿಮೆ ದರದಲ್ಲಿ ಕಾಫಿ, ಟೀ, ಊಟ, ತಿಂಡಿಯನ್ನು ಸವಿಯಬಹುದಾಗಿದೆ. ಇಲ್ಲಿ ಇಂದಿರಾ ಕ್ಯಾಂಟಿನ್ ಮಾದರಿಯ ಹೊಸ ಮಯೂರ ಕ್ಯಾಂಟೀನ್ ಸ್ಥಾಪನೆಯ ಮೂಲಕ ರಾಜ್ಯ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮವು ಪ್ರವಾಸಿಗರ ಜೇಬಿನಲ್ಲಿ ಕಾಸು ಉಳಿಸುವ ಕೆಲಸದ ಮೂಲಕ ಮೆಚ್ಚುಗೆಗೆ ಪಾತ್ರವಾಗಿದೆ.
ಹಿಂದೆ ಇಲ್ಲಿನ ದುಬಾರಿ ಹೋಟೆಲ್‌ಗಳಿಗೆ ಹೋಗಿ ದರ ಪಟ್ಟಿಯನ್ನು ನೋಡುತ್ತಿದ್ದಂತೆ ಬಹುತೇಕರು ಅನುಮಾನದಲ್ಲಿ ಮತ್ತೊಮ್ಮೆ ಕಣ್ಣರಳಿಸಿ ಖಾತ್ರಿಪಡಿಸಿಕೊಳ್ಳಬೇಕೆಂಬ ಮನೋಭಾವನೆ ಮೂಡುವ ರೀತಿಯಲ್ಲಿ ಬೆಲೆಗಳು ಕಾಣುತ್ತಿದ್ದವು. ಕನಿಷ್ಠ ತಿಂಡಿಗೆ ಒಬ್ಬರು 200 ರೂ ಖರ್ಚು ಮಾಡಬೇಕಾಗಿತ್ತು. ಮೊದಲೇ ನಿಗದಿತ ಕುಡಿಯುವ ನೀರಿನ ಬಾಟಲ್ ಬೆಲೆಯು ಕನಿಷ್ಠ 5 ರಿಂದ 10 ರೂಗಳಿಗೆ ಹೆಚ್ಚಿಗೆ ಮಾರಲಾಗುತ್ತಿತ್ತು.
ವಿದೇಶಗಳಲ್ಲಿ ಡಾಲರ್ ಲೆಕ್ಕದ ಮಾದರಿಯಲ್ಲಿ ತಿಂಡಿ ತಿನಿಸುಗಳಿಗೆ ಬೆಲೆ ನಿಗದಿಪಡಿಸಿದ್ದು ಇದರ ನಡುವೆ ಅನಧಿಕೃತವಾಗಿ ಹೆಚ್ಚುವರಿ ಹಣವನ್ನು ಪೀಕಲಾಗುತ್ತಿತ್ತು. ಇದರ ಬಗ್ಗೆ ಪ್ರವಾಸಿಗರು ಆಕ್ರೋಶ ವ್ಯಕ್ತಪಡಿಸಿ, ಸಲ್ಲಿಸಿದ ದೂರುಗಳಿಗೆ ಲೆಕ್ಕವೇ ಇಲ್ಲ. ಮೊದಲೇ ಐಷರಾಮಿ ಕೊಠಡಿಗಳ ಬಾಡಿಗೆ, ಸೇವೆಯ ಶುಲ್ಕ ದುಬಾರಿಗೆ ನಂದಿ ಬೆಟ್ಟವು ಸಾಮಾನ್ಯ ಜನರಿಗಲ್ಲ. ಶ್ರೀಮಂತ ಪ್ರವಾಸಿಗರಿಗೆ ಎನ್ನುವಂತಹ ಮಾತು ಕೇಳಿ ಬಂದಿತ್ತು. ಇದರ ನಡುವೆ ಇತ್ತೀಚೆಗೆ ನಿರ್ವಹಣೆಯ ಜವಾಬ್ದಾರಿಯನ್ನು ತೆಕ್ಕೆಗೆ ಹಾಕಿಸಿಕೊಂಡಿರುವ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮವು ಬಡ ಮತ್ತು ಮಧ್ಯಮ ವರ್ಗದ ಪ್ರವಾಸಿಗರ ಹಣ ಉಳಿತಾಯಕ್ಕೆ ಪೂರಕವಾದ ಕ್ರಮವನ್ನು ಕೈಗೊಂಡಿದೆ.

• 20 ರೂಗೆ ಊಟ
  ಇಲ್ಲಿನ ಮಯೂರ ಕ್ಯಾಂಟಿನಲ್ಲಿ 20 ರೂಗಳಿಗೆ ಅನ್ನ ಸಾಂಬರು, 15 ರೂಗಳಿಗೆ ಬಿಸಿ ಬೇಳೆಬಾತ್, ಉಪ್ಪಿಟ್ಟು, ಮೊಸರನ್ನ ಸಿಗುತ್ತದೆ. ಕಾಫಿ, ಟೀ, ಹಾಲು ಯಾವುದೇ ತೆಗೆದುಕೊಂಡರೂ 10 ರೂ. ಇಲ್ಲಿ ಕಡಿಮೆ ಬೆಲೆಯಲ್ಲಿ ಊಟ ತಿಂಡಿ ಸಿಗುತ್ತಿರುವುದು ಪ್ರವಾಸಿಗರ ಖುಷಿಗೆ ಕಾರಣವಾಗಿದೆ. ಶ್ರೀಮಂತರು ದುಬಾರಿಯ ಹೋಟೆಲ್‌ಗಳಲ್ಲಿ ತಿಂದು ತೇಗುತ್ತಾರೆ. ಆದರೆ, ಜನರನ್ನು ಕರೆ ತರುವ ಬಸ್, ಕಾರು, ಟ್ಯಾಕ್ಸಿ, ಆಟೋ ಚಾಲಕರು ಹೆಚ್ಚಿನ ದರಕ್ಕೆ ಬೆಚ್ಚಿ ಬಿದ್ದು ಏನನ್ನು ತಿನ್ನದೇ ಹಾಗೆಯೇ ವಾಪಸ್ಸಾಗುತ್ತಿದ್ದರು. ಇನ್ನು ಕುಟುಂಬ ಸಮೇತ ಬಂದಿರುವ ಬಡ ಮತ್ತು ಮಧ್ಯಮ ವರ್ಗದ ಜನರು ದೊಡ್ಡ ಬಜೆಟ್‌ನ ಲೆಕ್ಕಾಚಾರದಲ್ಲಿ ಮನೆಯಲ್ಲಿ ತಯಾರಿಸಿ ತಂದ ತಿಂಡಿ ತಿನಿಸುಗಳನ್ನು ಹೊಟ್ಟೆ ತುಂಬಿಸಿಕೊಳ್ಳಲು ನೆಚ್ಚಿಕೊಳ್ಳಬೇಕಾಯಿತು. ಆದರೆ, ಇಂದಿರಾ ಕ್ಯಾಂಟಿನ್ ಮಾದರಿಯಲ್ಲಿ ಹೋಟೆಲ್ ಪ್ರಾರಂಭವಾಗುತ್ತಿದ್ದಂತೆ ಪ್ರವಾಸಿ ತಾಣದಲ್ಲಿ, ಪ್ರವಾಸಿ ತಾಣದ ಆಹಾರವನ್ನು ಸವಿದು ಸಂತಸ ವ್ಯಕ್ತಪಡಿಸುತ್ತಿದ್ದಾರೆ.

• ಹಣ ಉಳಿತಾಯದ ಲೆಕ್ಕಾಚಾರ
  ದೇಶ ವಿದೇಶಗಳಿಂದ ಜನರನ್ನು ಆಕರ್ಷಿಸುವ ಅಂತಾರಾಷ್ಟ್ರೀಯ ಪ್ರಾಕೃತಿಕ ರಮ್ಯ ಪ್ರವಾಸಿ ತಾಣ ನಂದಿ ಗಿರಿಧಾಮ. ಇಲ್ಲಿಗೆ ಸಾಮಾನ್ಯ ದಿನಗಳಲ್ಲಿ ಕನಿಷ್ಠ 7 ರಿಂದ 8 ಸಾವಿರ, ವಿಶೇಷ ರಜೆಗಳಂದು ಕನಿಷ್ಠ 11 ಸಾವಿರ ಜನರು ಒಂದು ದಿನಕ್ಕೆ ಆಗಮಿಸುತ್ತಾರೆ. ಇಲ್ಲಿನ ಟಿಪ್ಪು ಡ್ರಾಪ್, ನೆಹರೂ ನಿಲಯ, ಗಾಂಧಿ ನಿಲಯ, ಶ್ರೀ ಯೋಗ ನಂದೀಶ್ವರ ಸ್ವಾಮಿ ದೇವಾಲಯ, ದುರ್ಗದ ಮೆಟ್ಟಿಲು, ಕಲ್ಯಾಣಿ ಸೇರಿದಂತೆ ವಿವಿಧ ಸ್ಥಳಗಳಲ್ಲಿ ಸುತ್ತಾಡಿ ಮುದ ಅನುಭವಿಸುತ್ತಾರೆ. ಪ್ರತಿದಿನ ಬೆಳಿಗ್ಗೆ 5.30 ರಿಂದ ನಂದಿ ಗಿರಿಧಾಮಕ್ಕೆ ಪ್ರವೇಶ ಇರುತ್ತದೆ. ಸಂಜೆ 6 ರ ಬಳಿಕ ಬಾಡಿಗೆ ಕೊಠಡಿಗಳಲ್ಲಿ ತಂಗಿರುವ ಜನರನ್ನು ಬಿಟ್ಟು ಇತರರಿಗೆ ಳಗಡೆ ಬಿಡುವುದಿಲ್ಲ. ಇನ್ನು ಇಲ್ಲಿಗೆ ಪ್ರವಾಸಿಗರ ಪೈಕಿ ಬಡ ಮತ್ತು ಮಧ್ಯಮ ವರ್ಗದ ಜನರ ಪಾಲು ಹೆಚ್ಚು. ಕರ್ನಾಟಕದ ಊಟಿ ಎಂತಲೇ ಹೆಸರುವಾಸಿಯಾಗಿರುವ ಈ ಪ್ರದೇಶದಲ್ಲಿ ಬೆಳಿಗ್ಗೆಯಿಂದ ಸಂಜೆಯವರೆಗೂ ಅಡ್ಡಾಡಿ ಊರುಗಳಿಗೆ ತೆರಳುತ್ತಾರೆ

• ಪ್ರವಾಸಿ ತಾಣ ನಂದಿ ಗಿರಿಧಾಮದಲ್ಲಿ ಪ್ರವಾಸೋದ್ಯಮ ನಿಗಮವು ಸ್ಥಾಪಿಸಿರುವ ಮಯೂರ ಕ್ಯಾಂಟಿನ್‌ನಲ್ಲಿ ಕಡಿಮೆ ಬೆಲೆಗೆ ತಿಂಡಿ, ಊಟ ಸಿಗುತ್ತಿರುವುದು ಖುಷಿಯ ವಿಚಾರ.

ಪಾವನಿ, ಗೃಹಿಣಿ, ಚಿಕ್ಕಬಳ್ಳಾಪುರ