ಕರೊನಾ ತಡೆಗೆ ನಾಗಮಂಗಲ ಮಾದರಿ: ಸೂಕ್ಷ್ಮ ಪ್ರದೇಶದಲ್ಲಿ ಸೂಕ್ಷ್ಮತೆಯಿಂದ ಕರ್ತವ್ಯ |ಎಲ್ಲ ಇಲಾಖೆಗಳ ನೌಕರರಿಗೂ ಕೆಲಸ

ನಾಗಮಂಗಲ: ತಬ್ಲಿಘಿಯವರಿಂದ ದೇಶದೆಲ್ಲೆಡೆ ಹಬ್ಬಿರುವ ಮಾರಕ ಕರೊನಾ ಸೋಂಕು ಮಳವಳ್ಳಿಯನ್ನು ಅಪ್ಪಿಕೊಂಡರೂ ರಾಜ್ಯದ ಸೂಕ್ಷ್ಮ ಪ್ರದೇಶಗಳಲ್ಲಿ ಒಂದಾದ ನಾಗಮಂಗಲದಲ್ಲಿ ಕಾಣಿಸಿಕೊಳ್ಳದಿರುವುದು ಸಮಾಧಾನಕರ ಸಂಗತಿ.

ದೆಹಲಿ ನಿಜಾಮುದ್ದೀನ್ ಪ್ರದೇಶದಲ್ಲಿರುವ ತಬ್ಲಿಘಿ ಜಮಾತ್ ಧರ್ಮಸಭೆಯಲ್ಲಿ ಪಾಲ್ಗೊಂಡಿದ್ದವರಿಂದಾಗಿ ದೇಶದೆಲ್ಲೆಡೆ ಕರೊನಾ ಸೋಂಕು ನಿರೀಕ್ಷೆ ಮೀರಿ ವ್ಯಾಪಿಸುತ್ತಿದೆ. ಈ ನಡುವೆ ದೆಹಲಿಯಿಂದ ಬಂದಿದ್ದ 10 ಧರ್ಮಗುರುಗಳು ಉಳಿದುಕೊಂಡಿದ್ದ ಮೈಸೂರು, ಮಂಡ್ಯ ಜಿಲ್ಲೆಯ ಮಳವಳ್ಳಿಗೂ ಸೋಂಕು ತಗುಲಿಕೊಂಡಿದೆ. ಆದರೆ, ಅದೇ ಧರ್ಮಗುರುಗಳು ವಾಸ್ತವ್ಯ ಹೂಡಿದ್ದ ನಾಗಮಂಗಲಕ್ಕೆ ಅದೃಷ್ಟವಶಾತ್ ಅಂಟಿಲ್ಲ. ಹಾಗಂತ ಅಧಿಕಾರಿಗಳು ಕಣ್ಣುಮುಚ್ಚಿ ಕುಳಿತಿಲ್ಲ. ಇತರ ತಾಲೂಕುಗಳಿಗೆ ಹೋಲಿಸಿದರೆ ಅಧಿಕಾರಿಗಳು, ಸಿಬ್ಬಂದಿ ಒಂದು ಹೆಜ್ಜೆ ಮುಂದಿಟ್ಟು, ಮೈಯೆಲ್ಲ ಕಣ್ಣಾಗಿಸಿಕೊಂಡು ಕೆಲಸ ಮಾಡುತ್ತಿದ್ದಾರೆ.

ಅಂದರೆ, ಕರೊನಾ ವೈರಸ್ ಸೋಂಕಿನಿಂದಾಗಿ ದೇಶದೆಲ್ಲೆಡೆ ಲಾಕ್​ಡೌನ್ ಜಾರಿಯಾದ ನಂತರ 65 ಇಲಾಖೆಗಳ ಪೈಕಿ 50ಕ್ಕೂ ಹೆಚ್ಚು ಇಲಾಖೆಗಳಿಗೆ ಕೆಲಸದಿಂದ ವಿನಾಯಿತಿ ನೀಡಿದ್ದು, ಮನೆಯಲ್ಲೇ ಇರುವಂತೆ ಸೂಚಿಸಲಾಗಿದೆ. ಪರಿಣಾಮ ಆರೋಗ್ಯ, ಪೊಲೀಸ್, ಕಂದಾಯ, ಪಂಚಾಯತ್ ರಾಜ್ ಇಲಾಖೆ ಸೇರಿ ಕೆಲ ಇಲಾಖೆಗಳಷ್ಟೇ ಬೆವರು ಸುರಿಸುತ್ತಿವೆ. ಸರ್ಕಾರ ವೇತನ ಕೊಟ್ಟು ಮನೆಯಲ್ಲಿ ಕೂರಿಸುವವರನ್ನು ಸೇವೆಗೆ ನಿಯೋಜಿಸುವ ಬದಲಿಗೆ ಸ್ವಯಂಸೇವಕರನ್ನು ಸೇವೆಗೆ ಆಹ್ವಾನಿಸುತ್ತಿದೆ. ಆದರೆ, ನಾಗಮಂಗಲದಲ್ಲಿ ಮಾತ್ರ ಅಧಿಕಾರಿಗಳು ಸ್ವಯಂಸೇವಕರನ್ನು ಕಾಯದೆ 65 ಇಲಾಖೆಗಳ ಅಧಿಕಾರಿಗಳನ್ನು ಕೆಲಸಕ್ಕೆ ನಿಯೋಜಿಸಿಕೊಂಡಿದ್ದಾರೆ.

ಪ್ರತಿ ಇಲಾಖೆಗಳ ಅಧಿಕಾರಿ, ಸಿಬ್ಬಂದಿಗೆ ಅವರದೇ ಆದ ಜವಾಬ್ದಾರಿ ವಹಿಸಿದ್ದು, ಕರೊನಾ ತಡೆಗೆ ಅಚ್ಚುಕಟ್ಟಾಗಿ ಕರ್ತವ್ಯ ನಿಭಾಯಿಸುವಂತೆ ಸ್ಪೂರ್ತಿ ತುಂಬಿದ್ದಾರೆ. ದೇಶದ ಕೆಲವೆಡೆ ಮುಸ್ಲಿಂ ಸಮುದಾಯದ ಕೆಲವರು ಮಾಡಿದ ಪುಂಡಾಟಿಕೆಯಿಂದ ಎಲ್ಲ ಕಡೆ ತಪ್ಪು ಸಂದೇಶ ರವಾನೆಯಾಗಿರುವ ಹಿನ್ನೆಲೆಯಲ್ಲಿ ಯಾವುದೇ ತೊಂದರೆ ಆಗದಂತೆ ಮುಸ್ಲಿಮರು ಇರುವ ವಾರ್ಡ್​ಗಳಿಗೆ ಮುಸ್ಲಿಂ ಅಧಿಕಾರಿ,ಸಿಬ್ಬಂದಿಯನ್ನೇ ನೇಮಿಸಲಾಗಿದೆ. ಹೀಗಾಗಿ ಎಲ್ಲವೂ ನಿರಾತಂಕವಾಗಿ ನಡೆಯುತ್ತಿದೆ.

4 ವಾರ್ಡ್​ಗಳು ಕಂಟೋನ್ಮೆಂಟ್

ಸದ್ಯ ಸೋಂಕು ದೃಢಪಟ್ಟಿರುವ ದೆಹಲಿಯ ಧರ್ಮಗುರುಗಳು, ಪಟ್ಟಣದಲ್ಲಿ ಕೂಡ ಕೆಲದಿನ ಉಳಿದಿದ್ದ ಪರಿಣಾಮ ಜಿಲ್ಲಾಧಿಕಾರಿ ತಾಲೂಕಿನಾದ್ಯಂತ ಹೈ ಅಲರ್ಟ್ ಘೊಷಣೆ ಮಾಡಿದ್ದಾರೆ. ಜತೆಗೆ ಪಟ್ಟಣದ 12, 14, 15 ಮತ್ತು 16ನೇ ವಾರ್ಡ್​ಗಳನ್ನು ಕಂಟೋನ್ಮೆಂಟ್ ಜೋನ್ ಎಂದು ಘೊಷಿಸಲಾಗಿದೆ. ಮನೆ ಮನೆಗೆ ತೆರಳಿ ಸರ್ವೆ ಮಾಡುವ ಕಾರ್ಯಕ್ಕೆ ವಿವಿಧ ಇಲಾಖೆಯ ಅಧಿಕಾರಿಗಳನ್ನು ನೇಮಿಸಿದ್ದು, ಎಲ್ಲ ಸಿಬ್ಬಂದಿ ಮಿನಿ ವಿಧಾನಸೌಧಕ್ಕೆ ಆಗಮಿಸಿ ತಮ್ಮ ಕಾರ್ಯಕ್ಷೇತ್ರದ ಮಾಹಿತಿ ಪಡೆದುಕೊಂಡಿದ್ದಾರೆ.

ಎಂ.ಕೆ. ಉಮೇಶ್

https://www.vijayavani.net/petition-filed-in-supreme-court-seeking-ban-on-all-activities-of-tablighi-jamaat-delhi/