ಮಧ್ಯಪ್ರದೇಶದಲ್ಲಿ ಬಿಜೆಪಿ ಗೆಲುವಿನ ಅಂತರವೇ ಹುಬ್ಬೇರಿಸುವಂಥದ್ದು. ಹಾಲಿ ಸಿಎಂ ಶಿವರಾಜ್ ಸಿಂಗ್ ಚೌಹಾಣ್ರನ್ನು ಪಕ್ಷದ ಸಿಎಂ ಅಭ್ಯರ್ಥಿ ಎಂದು ದೆಹಲಿ ವರಿಷ್ಠರು ಘೊಷಿಸದಿದ್ದರೂ, ಚೌಹಾಣ್ ಜನಪ್ರಿಯತೆ ಕಿಂಚಿತ್ತೂ ಕಡಿಮೆಯಾಗಿಲ್ಲ ಎನ್ನುವುದು ಸ್ಪಷ್ಟ. ಕೇವಲ ಮೋದಿ ಜನಪ್ರಿಯತೆಯಿಂದ ರಾಜ್ಯ ಚುನಾವಣೆಯನ್ನು ಇಷ್ಟೊಂದು ಅಂತರದಲ್ಲಿ ಗೆಲ್ಲಲು ಸಾಧ್ಯವೇ ಇಲ್ಲ. ಹೀಗಾಗಿ, ಮಧ್ಯಪ್ರದೇಶದ ಸಾಧನೆಗೆ ಚೌಹಾಣ್ರಿಗೆ ಕ್ರೆಡಿಟ್ ಅರ್ಹವಾಗಿ ಸಲ್ಲಬೇಕು. 2005ರಿಂದ ರಾಜ್ಯದ ಮುಖ್ಯಮಂತ್ರಿಯಾಗಿರುವ ಶಿವರಾಜ್ ಸಿಂಗ್ ಚೌಹಾಣ್, 2018ರ ವಿಧಾನಸಭೆ ಚುನಾವಣೆಯಲ್ಲಿ ಸೋತಿದ್ದರು. ಆದರೆ, 2020ರ ಮಾರ್ಚ್ ತಿಂಗಳಲ್ಲಿ ಕೆಲ ಶಾಸಕರು ಕಾಂಗ್ರೆಸ್ ಬೆಂಬಲ ಹಿಂಪಡೆದ ಪರಿಣಾಮ ಶಿವರಾಜ್ ನೇತೃತ್ವದಲ್ಲಿ ಚುನಾವಣೆ ಸೋತ ಒಂದೇ ವರ್ಷದಲ್ಲಿ ಬಿಜೆಪಿ ಮತ್ತೆ ಅಧಿಕಾರಕ್ಕೆ ಬಂತು. ತಮ್ಮನ್ನು ಸಿಎಂ ಸ್ಥಾನದ ಅಭ್ಯರ್ಥಿಯೆಂದು ಘೊಷಣೆ ಮಾಡದಿದ್ದರೂ, ನಿರಂತರ ಪ್ರಚಾರದ ಮೂಲಕ ಜನಮನ ಸೆಳೆದ ಶಿವರಾಜ್ ಸಿಂಗ್, ‘ನಾನು ಮತ್ತೊಮ್ಮೆ ಸಿಎಂ ಆಗುವುದು ನಿಮಗೆ ಬೇಡವೇ’ ಎಂಬ ಭಾವನಾತ್ಮಕ ಮನವಿಯನ್ನೂ ಮಾಡಿದ್ದರು. ಈ ಮನವಿ ಬಗ್ಗೆ ನಾನಾ ಬಗೆಯ ವಿಶ್ಲೇಷಣೆ ಕೇಳಿಬಂದರೂ, ರಾಜ್ಯದ ಮತದಾರ ಶಿವರಾಜರೇ ನಮ್ಮ ನಾಯಕ ಎಂದು ತೀರ್ಪು ನೀಡಿದ್ದಾರೆ. ದಿಲ್ಲಿ ವರಿಷ್ಠರು ಚೌಹಾಣ್ರನ್ನು ಮತ್ತೆ ಸಿಎಂ ಆಗಿ ನೇಮಕ ಮಾಡುತ್ತಾರೋ ಗೊತ್ತಿಲ್ಲ. ಆದರೆ, ಅವರ ಬದಲಿಗೆ ಮತ್ತೊಬ್ಬರನ್ನು ಆಯ್ಕೆ ಮಾಡುವಂತಹ ಸಾಹಸದ ಕೆಲಸಕ್ಕೆ ವರಿಷ್ಠರು ಕೈಹಾಕುವ ಬಗ್ಗೆ ಅನುಮಾನವಿದೆ. ಬಿಜೆಪಿ ಗೆಲುವಿನಲ್ಲಿ ರಾಜ್ಯದ ಮಹಿಳಾ ಮತದಾರರೂ ನಿರ್ಣಾಯಕ ಪಾತ್ರವಹಿಸಿದ್ದಾರೆ. ರಾಜ್ಯದ ಮಹಿಳೆಯರಿಗೆ ತಿಂಗಳಿಗೆ 1000 ರೂ. ಹಣಕಾಸು ನೆರವು ನೀಡುವ ಲಾಡ್ಲಿ ಬೆಹ್ನಾ ಯೋಜನೆ ಗ್ರಾಮೀಣ ಮತದಾರರನ್ನು ಬಹುವಾಗಿ ಸೆಳೆದಿದೆ. ಚೌಹಾಣ್ರ ಮಹಿಳೆಯನ್ನು ಪೂಜ್ಯಭಾವದಿಂದ ನೋಡುವ ಕನ್ಯಾಪೂಜಾ ಕಾರ್ಯಕ್ರಮಗಳೂ ಯಶಸ್ವಿಯಾಗಿವೆ. ರಾಜ್ಯಾದ್ಯಂತ ಮನೆ-ಮನಗಳಲ್ಲಿ ಮಾಮಾಜೀ ಎಂದೇ ಗುರುತಿಸಿಕೊಂಡಿರುವ ಚೌಹಾಣ್, ಸಜ್ಜನ ರಾಜಕಾರಣಿ ಎಂದೇ ಖ್ಯಾತಿ. ಅಹಂಕಾರವಿಲ್ಲದ, ಜನಸಾಮಾನ್ಯನಂತೆ ನಡೆದುಕೊಳ್ಳುವ ಚೌಹಾಣ್ ವ್ಯಕ್ತಿತ್ವ ಪಕ್ಷಕ್ಕೆ ಮತ್ತೊಮ್ಮೆ ಲಾಭತಂದುಕೊಟ್ಟಿರುವುದು ಸುಳ್ಳಲ್ಲ. 2023ರ ಜನವರಿಯಿಂದ ನವೆಂಬರ್ 15ರ ಚುನಾವಣಾ ಪ್ರಚಾರದ ಕೊನೆ ದಿನದ ತನಕ ಸುಮಾರು 1,000 ಕಾರ್ಯಕ್ರಮಗಳನ್ನು ಉದ್ದೇಶಿಸಿ ಭಾಷಣ ಮಾಡಿದ್ದಾರೆ. ಅಂದರೆ, ದಿನಕ್ಕೆ ಸರಾಸರಿ ಮೂರು ಕಾರ್ಯಕ್ರಮ. ಚುನಾವಣೆ ಘೊಷಣೆಯಾಗುವ ಮುನ್ನ ಅವರು 53 ಜಿಲ್ಲೆಗಳಲ್ಲಿ 53 ಮಹಿಳಾ ರ್ಯಾಲಿಗಳನ್ನು ನಡೆಸಿದ್ದರು. ಚುನಾವಣಾ ದಿನಾಂಕ ಘೊಷಣೆ ಬಳಿಕ 37 ದಿನಗಳಲ್ಲಿ 165 ರ್ಯಾಲಿಗಳಲ್ಲಿ ಭಾಷಣ ಮಾಡಿದ್ದಾರೆ.
