VIDEO: ಹೇಳೋರು ಇಲ್ಲ, ಕೇಳೋರೂ ಇಲ್ಲ, ಕಾಟ ಕೊಡೋ ಮನುಷ್ಯರಂತೂ ಮನೆ ಬಿಟ್ಟು ಬರೋದಿಲ್ಲ..! ಫುಲ್​ ಜೋಶ್​ನಲ್ಲಿವೆ ಈ ಕೋತಿಗಳು

ಎಲ್ಲೆಲ್ಲೂ ಕರೊನಾ ಆತಂಕ. ಲಾಕ್​ಡೌನ್​. ಮನುಷ್ಯರೆಲ್ಲ ಮನೆ ಸೇರಿದ್ದಾರೆ. ಪ್ರಾಣಿಗಳೆಲ್ಲ ರೋಡಿಗೆ ಇಳೀತಿವೆ. ಮನುಷ್ಯರ ಸಂಚಾರ ಕಡಿಮೆಯಾಗುತ್ತಿದ್ದಂತೆ ಕಾಡು ಪ್ರಾಣಿಗಳು ರಸ್ತೆಗೆ ಬಂದು ರಾಜಾರೋಷವಾಗಿ ಓಡಾಡುತ್ತಿರುವ ಹಲವು ವಿಡಿಯೋಗಳು ಇಂಟರ್​ನೆಟ್​ನಲ್ಲಿ ವೈರಲ್ ಆಗಿವೆ.

ಈಗ ಕೋತಿಗಳ ವಿಡಿಯೋವೊಂದು ಟ್ರೆಂಡ್​ ಸೃಷ್ಟಿಸಿದೆ. ಹೇಳಿಕೇಳಿ ಕೋತಿಗಳು ನೋಡಿ..ಚೇಷ್ಟೆ ಸ್ವಲ್ಪ ಜಾಸ್ತಿನೇ ಮಾಡ್ತವೆ..ಅಷ್ಟಕ್ಕೂ ಅವು ಏನು ಮಾಡಿವೆ? ನೆಟ್ಟಿಗರು ಅಷ್ಟು ಆಕರ್ಷಿತರಾಗಲು ಕಾರಣ ಏನು ಗೊತ್ತಾಗಬೇಕಾದರೆ ಈ ಸುದ್ದಿ ಓದಿ..ವಿಡಿಯೋ ನೋಡಿ..

ಮುಂಬೈನ ಬೋರಿವಾಲಿಯಲ್ಲಿ ನಡೆದ ಸಖತ್​ ಫನ್ನಿ ಘಟನೆ ಇದು. ಮನುಷ್ಯರಿಲ್ಲದೆ ಬಿಕೋ ಎನ್ನುತ್ತಿದ್ದ ಸ್ವಿಮ್ಮಿಂಗ್​ ಪೂಲ್​ನಲ್ಲಿ ಕೋತಿಗಳು ಮನಸೋ ಇಚ್ಛೆ ಈಜಿ, ಫುಲ್​ ಮಜಾ ಮಾಡಿದ್ದಾವೆ. ಈ ವಿಡಿಯೋವನ್ನು ಶೇರ್​ ಮಾಡಿದ ಇನ್​​ಸ್ಟಾಗ್ರಾಂ ಬಳಕೆದಾರರೋರ್ವರು, ಕೋತಿಗಳು ಹಲವು ವರ್ಷಗಳಿಂದ ಕಾಯುತ್ತಿದ್ದವೇನೋ..ಈಗ ಅವಕಾಶ ಸಿಕ್ಕಂತಾಗಿದೆ ಎಂದು ಅಷ್ಟೇ ಫನ್ನಿ ಕ್ಯಾಪ್ಷನ್​ ಬರೆದಿದ್ದಾರೆ.

ಒಂದು ಕೋತಿ ಅಲ್ಲಿನ ಕಟ್ಟಡದ ಬಾಲ್ಕನಿಗೆ ಹಾಕಲಾಗಿರುವ ಕಂಬಿಯ ಮೇಲೆ ಕುಳಿತಿರುತ್ತದೆ. ಮತ್ತೊಂದು ಅಲ್ಲೇ ಪಕ್ಕದ ಮನೆಯ ಕಿಟಕಿಯ ಮೇಲೆ ಕುಳಿತಿರುತ್ತದೆ. ಬಾಲ್ಕಿನಿಯ ಮೇಲೆ ಕುಳಿತ ಮಂಗ ಕೂಡಲೇ ಸ್ವಿಮ್ಮಿಂಗ್​ ಪೂಲ್​ಗೆ ಹಾರುತ್ತದೆ. ಸ್ವಲ್ಪ ಹೊತ್ತು ಸ್ವಚ್ಛಂದವಾಗಿ ಈಜಿ ಕೊಳದ ಒಂದು ಮೂಲೆಯಲ್ಲಿ ಹೋಗಿ ಕುಳಿತುಕೊಳ್ಳುತ್ತದೆ. ಆ ಒಂದು ಮಂಗವನ್ನು ನೋಡಿದ ಉಳಿದ ಮಂಗಗಳೂ ಅದನ್ನೇ ಮಾಡುತ್ತವೆ. ಇಡೀ ಈಜುಕೊಳದಲ್ಲಿ ಯಾರ ಭಯವೂ ಇಲ್ಲದೆ ಆಟವಾಡುವುದನ್ನು ವಿಡಿಯೋದಲ್ಲಿ ನೋಡಬಹುದು.

ವಿಡಿಯೋ ಪೋಸ್ಟ್​ ಆದ ಕೆಲವೇ ಹೊತ್ತಲ್ಲಿ ವಿಪರೀತ ವೈರಲ್​ ಆಗಿದೆ. ಒಂದು ಲಕ್ಷಕ್ಕೂ ಅಧಿಕ ವೀವ್ಸ್​ ಪಡೆದುಕೊಂಡಿದೆ. ಅನೇಕರು ಮೆಚ್ಚುಗೆಯಿಂದ ಕಾಮೆಂಟ್​ ಮಾಡಿದ್ದಾರೆ. (ಏಜೆನ್ಸೀಸ್​)