ಪ್ರಸನ್ನ ಅವರೆ, ಮಗನ ಹೂಡಿಕೆ ಸರಿಯಾಗಿರಬೇಕು ಎಂಬ ನಿಮ್ಮ ಕಾಳಜಿ ಇಷ್ಟವಾಯಿತು. ಹೂಡಿಕೆಗೆ ಮುಂಜಾಗ್ರತೆಯೇ ಮದ್ದು ಎನ್ನುವುದನ್ನು ನೀವು ಅರಿತುಕೊಂಡಿದ್ದೀರಿ. ಮ್ಯೂಚುವಲ್ ಫಂಡ್ ಎಸ್ಐಪಿ ಮೂಲಕ ಹೂಡಿಕೆ ಮಾಡುವುದು ಇತ್ತೀಚಿನ ದಿನಗಳಲ್ಲಿ ಅತ್ಯಂತ ಜನಪ್ರಿಯ ಮಾದರಿಯಾಗಿದೆ. ದೇಶದಲ್ಲಿ ಪ್ರತಿ ತಿಂಗಳು 8,000 ಕೋಟಿ ರೂ.ಗೂ ಹೆಚ್ಚು ಹಣ ಮ್ಯೂಚುವಲ್ ಫಂಡ್ ಎಸ್ಐಪಿಯಲ್ಲಿ ಹೂಡಿಕೆಯಾಗುತ್ತಿದೆ. ಇದೀಗ ಇನ್ಶೂರೆನ್ಸ್ ಕಂಪನಿಗಳೂ ಅದರಲ್ಲಿ ಒಂದಿಷ್ಟು ಪಾಲು ಪಡೆದುಕೊಳ್ಳುವ ಪ್ರಯತ್ನದಲ್ಲಿವೆ. ನೀವು ಹೇಳಿರುವ ಇನ್ಶೂರೆನ್ಸ್ ಕಂಪನಿ ಹೊರತಂದಿರುವ ಎಸ್ಐಐಪಿ ಹೂಡಿಕೆ ಯೋಜನೆ ಯುನಿಟ್ ಲಿಂಕ್ಡ್ ಇನ್ಶೂರೆನ್ಸ್ ಪ್ಲಾ್ಯನ್ ( ಯುಲಿಪ್) ಆಗಿದೆ. ಇದು ಇನ್ಶೂರೆನ್ಸ್ ಮತ್ತು ಹೂಡಿಕೆಯ ಸಮ್ಮಿಶ್ರಣ. ಎಸ್ಐಐಪಿ ಪ್ಲಾ್ಯನ್ ನಲ್ಲಿ ಪ್ರೀಮಿಯಂ ಅಲೋಕೇಷನ್ ಚಾರ್ಜ್(ಪಿಎಸಿ) ವಿಧಿಸಲಾಗುತ್ತದೆ. ಎಲ್ಲ ಯುಲಿಪ್ಗಳಲ್ಲಿ ಇರುವಂತೆ ಎಸ್ಐಐಪಿ ಯೋಜನೆಯಲ್ಲೂ ಆರಂಭಿಕ 5 ವರ್ಷಗಳಲ್ಲಿ ಪ್ರೀಮಿಯಂ ಅಲೋಕೇಷನ್ ಚಾರ್ಜ್ ಹೆಚ್ಚು (ಏಜೆಂಟ್ ಮೂಲಕ ಖರೀದಿಸಿದರೆ ಶೇ.8 , ಆನ್ಲೈನ್ನಲ್ಲಿ ಖರೀದಿಸಿದರೆ ಶೇ.3 ) ಇದೆ. 6ನೇ ವರ್ಷದಿಂದ ಪಿಎಸಿ ಚಾರ್ಜ್ ಏಜೆಂಟ್ ಮೂಲಕ ಖರೀದಿಸಿದ್ದರೆ ಶೇ.3 ಮತ್ತು ಆನ್ಲೈನ್ನಲ್ಲಿ ಖರೀದಿಸಿದ್ದರೆ ಶೇ.1 ಇದೆ. ಇದಲ್ಲದೆ ಹೆಚ್ಚುವರಿಯಾಗಿ ನೀವು ಫಂಡ್ ಮ್ಯಾನೇಜ್ಮೆಂಟ್ ದರಗಳನ್ನು ಕಟ್ಟಬೇಕಾಗುತ್ತದೆ. ಇದರಿಂದಾಗಿ ಮಾರುಕಟ್ಟೆಯಲ್ಲಿ ಅಂತಿಮವಾಗಿ ಹೂಡಿಕೆ ಮೊತ್ತ ಕಡಿಮೆಯಾಗುತ್ತದೆ. ಉದಾಹರಣೆಗೆ ನೀವು 1 ಲಕ್ಷ ರೂ. ವಾರ್ಷಿಕ ಪ್ರೀಮಿಯಂ ಪಾವತಿಸುತ್ತೀರಿ ಎಂದು ಭಾವಿಸೋಣ. ಈ 1 ಲಕ್ಷ ರೂ.ನಲ್ಲಿ ಎಲ್ಲ ವೆಚ್ಚಗಳನ್ನು ಕಡಿತಗೊಳಿಸಿದರೆ 89,330 ರೂ. ಮಾತ್ರ ಅಂತಿಮ ಹೂಡಿಕೆ ಮೊತ್ತವಾಗುತ್ತದೆ. ಈ ದೊಡ್ಡ ಮೊತ್ತದ ಶುಲ್ಕ ದೀರ್ಘಾವಧಿಯಲ್ಲಿ ಹಣ ಒಟ್ಟುಗೂಡಿಸುವ ನಿಮ್ಮ ಪ್ರಯತ್ನಕ್ಕೆ ಹಿನ್ನಡೆ ಉಂಟು ಮಾಡುತ್ತದೆ. ಆದರೆ ಮ್ಯೂಚುವಲ್ ಫಂಡ್ನಲ್ಲಿ ಈ ಪರಿ ಶುಲ್ಕಗಳಿಲ್ಲ. ಈಕ್ವಿಟಿ ಫಂಡ್ಗಳಲ್ಲಿ ಹೆಚ್ಚೆಂದರೆ ಶೇ. 2.25 ಮತ್ತು ಡೆಟ್ಫಂಡ್ಗಳಲ್ಲಿ ಗರಿಷ್ಠ ಶೇ.2 ಶುಲ್ಕ ವಿಧಿಸಲಾಗುತ್ತದೆ. ಅಂದರೆ ನೀವು 1 ಲಕ್ಷ ರೂ. ಡಿಸ್ಟ್ರಿಬ್ಯೂಟರ್ ಮೂಲಕ ಹೂಡಿಕೆ ಮಾಡಿದರೆ ಅಂತಿಮವಾಗಿ 97,750 ರೂ. ಹೂಡಿಕೆಯಾಗುತ್ತದೆ. ನೇರವಾಗಿ (ಡೈರೆಕ್ಟ್) 1 ಲಕ್ಷ ರೂ. ಹೂಡಿಕೆ ಮಾಡಿದರೆ 99,000 ರೂ. ಹೂಡಿಕೆಯಾಗುತ್ತದೆ. ಮೇಲಿನ ಅಂಶಗಳನ್ನು ಪರಿಗಣಿಸಿ ನೋಡಿದಾಗ ಮ್ಯೂಚುವಲ್ ಫಂಡ್ ಎಸ್ಐಪಿ ಹೂಡಿಕೆಯೇ ಸೂಕ್ತ. ಆದರೆ 4 ಸಾವಿರ ರೂ. ಹೂಡಿಕೆ ಮಾಡಬೇಕೇ? ಅಥವಾ ಕಡಿಮೆ ಹೂಡಿಕೆ ಮಾಡಬೇಕೇ? ಎನ್ನುವುದು ನಿಮ್ಮ ರಿಸ್ಕ್ ಪೊ›ಫೈಲ್ (ನಿಮ್ಮ ಆರ್ಥಿಕ ಸ್ಥಿತಿಗತಿ) ಅವಲಂಬಿಸಿದೆ. ಇನ್ನು ನಿಮ್ಮ ಮಗನಿಗೆ ಒಂದು ಪಿಪಿಎಫ್ ಖಾತೆ ಆರಂಭಿಸಲು ತಿಳಿಸಿ. ಪ್ರಮುಖ ಬ್ಯಾಂಕ್ಗಳು , ಅಂಚೆ ಕಚೇರಿಯಲ್ಲಿ ಪಿಪಿಎಫ್ ಖಾತೆ ಆರಂಭಿಸಬಹುದು. ಜತೆಗೆ ಒಂದು ಟಮ್ರ್ ಇನ್ಶೂರೆನ್ಸ್ ಮತ್ತು ಹೆಲ್ತ್ ಇನ್ಶೂರೆನ್ಸ್ ಮಾಡಿಸಿಕೊಳ್ಳಲು ಹೇಳಿ. ನಿಮ್ಮ ಮಗನ ಭವಿಷ್ಯ ಉಜ್ವಲವಾಗಲಿ.
