ವಧುವರರ ವೆಬ್​​ಸೈಟಲ್ಲಿ ಪರಿಚಯ ಬೆಳೆಸಿ ಹಣ ಲಪಟಾಯಿಸಿದ ಖದೀಮ

ಪುಣೆ : ಸೈಬರ್​ ಖದೀಮರು ಯಾವ ರೂಪದಲ್ಲಿ ಯಾವ ಕಡೆಯಿಂದ ಬೇಕಿದ್ದರೂ ನುಸುಳಿಬಂದು ವಂಚಿಸುತ್ತಾರೆ ಎನ್ನುವುದಕ್ಕೆ ಇದು ಉದಾಹರಣೆ. ಅವಿವಾಹಿತ ವೈದ್ಯೆಯೊಬ್ಬರನ್ನು ಮ್ಯಾಟ್ರಿಮೋನಿಯಲ್​ ವೆಬ್​ಸೈಟ್​ನಲ್ಲಿ ಪರಿಚಯ ಮಾಡಿಕೊಂಡು ಹಣ ಲಪಟಾಯಿಸಿರುವ ಪ್ರಕರಣ ವರದಿಯಾಗಿದೆ.

ಪುಣೆಯ ಖಾಸಗಿ ಆಸ್ಪತ್ರೆಯ ಉದ್ಯೋಗಿಯಾದ 36 ವರ್ಷದ ಮಹಿಳೆಯೊಬ್ಬರು ವಧುವರರ ಸಂಪರ್ಕ ವೇದಿಕೆಯಾದ ವೆಬ್​ಸೈಟ್​ ಒಂದರಲ್ಲಿ ಸದಸ್ಯರಾಗಿದ್ದರು. ಮಾರ್ಚ್​ ಕೊನೆಯ ವಾರದಲ್ಲಿ, ವ್ಯಕ್ತಿಯೊಬ್ಬ, ವಿದೇಶದಲ್ಲಿ ನೆಲೆಸಿರುವ ಭಾರತೀಯ ವೈದ್ಯನೆಂಬಂತೆ ಆಕೆಯನ್ನು ಆನ್​​ಲೈನ್​​ನಲ್ಲಿ ಸಂಪರ್ಕಿಸಿದ. ಆರಂಭಿಕವಾಗಿ ಅದೇ ವೇದಿಕೆಯ ಮೂಲಕ ಮಾತನಾಡುತ್ತಿದ್ದ ಅವರು ನಂತರ ತಮ್ಮ ಫೋನ್​ ನಂಬರ್​ಗಳನ್ನು ಬದಲಾಯಿಸಿಕೊಂಡರು.

ಇದನ್ನೂ ಓದಿ: ನಿವೇಶನರಹಿತರಿಗೆ ಎರಡು ತಿಂಗಳಲ್ಲಿ ಹಕ್ಕುಪತ್ರ : ಈಗಾಗಲೇ 600 ಎಕರೆ ಜಮೀನು ಗುರುತು

ಮಾತುಕತೆ ಮುಂದುವರೆದಂತೆ ಕೆಲವು ವೈಯಕ್ತಿಕ ಮಾಹಿತಿಗಳನ್ನು ಸಂಗ್ರಹಿಸಿರುವ ವಂಚಕನು ಮಹಿಳೆಯ ತಾಯಿಯ ಜನ್ಮದಿನಕ್ಕೆ ತಾನೊಂದು ಉಡುಗೊರೆ ಕಳುಹಿಸಿರುವುದಾಗಿ ಹೇಳಿದ್ದಾನೆ. ನಂತರ ಆ ಉಡುಗೊರೆಯ ಕಸ್ಟಮ್​ ಕ್ಲಿಯರೆನ್ಸ್​ಗಾಗಿ 36,000 ರೂಪಾಯಿ ಅಗತ್ಯವಿದೆ ಎಂದು ವರ್ಗಾಯಿಸಿಕೊಂಡಿದ್ದಾನೆ. ಆದರೆ, ಅದೇ ನೆಪದಲ್ಲಿ ಮತ್ತೆ 90,000 ರೂ.ಗಳ ಬೇಡಿಕೆ ಇಟ್ಟಾಗ ಮಹಿಳೆಗೆ ಅನುಮಾನ ಬಂದು ಪ್ರಶ್ನೆಗಳನ್ನು ಕೇಳಿದ್ದಾರೆ. ತದನಂತರ ನಕಲಿ ಪ್ರೊಫೈಲ್​ನ ಹಿಂದಿನ ಖದೀಮ, ಆಕೆಯ ಕಾಲ್​ಗಳಿಗೆ ಪ್ರತಿಕ್ರಿಯಿಸುವುದನ್ನೇ ನಿಲ್ಲಿಸಿದ್ದಾನೆ.

ನೊಂದ ಮಹಿಳೆಯು ಪುಣೆ ನಗರದ ಕೋಂಧ್ವ ಪೊಲೀಸರಿಗೆ ದೂರು ದಾಖಲಿಸಿದ್ದಾರೆ. ಐಟಿ ಕಾಯ್ದೆ ಮತ್ತು ಐಪಿಸಿಯ ವಿವಿಧ ಸೆಕ್ಷನ್​​ಗಳಡಿ ಎಫ್​.ಐ.ಆರ್​. ದಾಖಲಿಸಲಾಗಿದ್ದು, ನಕಲಿ ಪ್ರೊಫೈಲ್​ ಸೃಷ್ಟಿಸಿ ವಂಚಿಸಿರುವ ಸೈಬರ್​ ಖದೀಮನ ಪತ್ತೆ ಕಾರ್ಯ ಆರಂಭವಾಗಿದೆ. ಕೆಲವು ಶಂಕಿತರ ದೂರವಾಣಿ ಸಂಖ್ಯೆ ಮತ್ತು ಬ್ಯಾಂಕ್​ ಖಾತೆಗಳನ್ನು ಪರಿಶೀಲಿಸಲಾಗುತ್ತಿದೆ ಎಂದು ಇನ್ಸ್​ಪೆಕ್ಟರ್ ಶಬ್ಬೀರ್ ಸಯ್ಯೆದ್ ಹೇಳಿದ್ದಾರೆ. (ಏಜೆನ್ಸೀಸ್)

https://www.vijayavani.net/video-watch-monkey-travelling-in-metro-train/

https://www.vijayavani.net/in-search-of-husband-woman-travels-from-patna-to-ludhiana-with-incomplete-phone-number/