ಪ್ರವಾಸಕ್ಕೆ ಫರ್ಮಾನು: ಜಿಲ್ಲಾ ಉಸ್ತುವಾರಿ ಹೊರತಾದ ಜಿಲ್ಲೆಗಳಿಗೆ ಸಚಿವರ ಪ್ರವಾಸಕ್ಕೆ ವರಿಷ್ಠರು ಫರ್ವನು ಹೊರಡಿಸಿದ್ದು, ಆಯಾ ಇಲಾಖೆ ಕಾರ್ಯಕ್ರಮಗಳ ಅನುಷ್ಠಾನ ಪರಿಶೀಲಿಸಬೇಕು ಎಂಬ ಸೂಚನೆ ನೀಡಿದ್ದಾರೆ ಎಂದು ಪಕ್ಷದ ಮೂಲಗಳು ತಿಳಿಸಿವೆ. ಬಯಸಿ ಮಂತ್ರಿ ಪದವಿ ಪಡೆದವರಲ್ಲಿ ಹಲವರು ರಾಜ್ಯದ ಜನತೆಗೆ ‘ಪರಿಚಯ’ ಮಾಡಿಕೊಳ್ಳುವ ದೃಷ್ಟಿಯಿಂದಲಾದರೂ ಭೇಟಿ ನೀಡಬೇಕು ಎಂದು ಕಾರ್ಯಕರ್ತರು ಬಯಸಿದ್ದಾರೆ. ಇಲಾಖೆ ಹೊಣೆ ಹೊತ್ತ ಸಚಿವರು ಜಿಲ್ಲೆಗಳಿಗೆ ಭೇಟಿ ನೀಡಿದರೆ ಅಧಿಕಾರಿಗಳು ಚುರುಕಾಗುತ್ತಾರೆ, ವಾಸ್ತವಾಂಶ ತಿಳಿಯುತ್ತದೆ, ಜತೆಗೆ ಸರ್ಕಾರಕ್ಕೂ ಒಳ್ಳೆಯ ಹೆಸರು ಬರುತ್ತದೆ. ಪ್ರತಿ ತಿಂಗಳಲ್ಲಿ ಒಂದು ಅಥವಾ ಎರಡು ಆನ್ಲೈನ್ ಮೂಲಕ ನಡೆಯುವ ಚರ್ಚೆ ವೇಳೆ ಸಂಗ್ರಹಿಸಿದ ಮಾಹಿತಿ, ಅಭಿಪ್ರಾಯಗಳಿಗೆ ವರಿಷ್ಠರು ಮಣೆ ಹಾಕಿದ್ದಾರೆ. ಬಹುತೇಕ ಸಚಿವರು ‘ನಿರ್ದೇಶಕರ’ ಪಾತ್ರಧಾರಿಗಳು. ಅಂದರೆ ಅಧಿಕಾರಿಗಳಿಗೆ ನಿರ್ದೇಶನ ನೀಡಿ ಕೈತೊಳೆದುಕೊಳ್ಳುತ್ತಿದ್ದಾರೆ ಎನ್ನುವುದು ಮೌಲ್ಯಮಾಪನ ವೇಳೆ ದೆಹಲಿ ನಾಯಕರು ಗಮನಿಸಿದ್ದಾರೆ. ಸಚಿವರಿಗಿಂತ ಹೆಚ್ಚಿಗೆ ಸಿಎಂ ಬೊಮ್ಮಾಯಿ ಸುತ್ತುತ್ತಿದ್ದಾರೆ. ಕೆಲವರಂತೂ ಕ್ಷೇತ್ರಕ್ಕೆ ಸೀಮಿತವೆಂಬ ಸಾರ್ವಜನಿಕರ ಟೀಕೆ-ಟಿಪ್ಪಣಿಗಳು ಪಕ್ಷದ ರಾಜ್ಯ ನಾಯಕರ ಕಿವಿಗೂ ತಲುಪಿದೆ. ಈ ಹಿನ್ನೆಲೆಯಲ್ಲಿ ಕೇಂದ್ರ ಸಚಿವರು ರಾಜ್ಯ ಪ್ರವಾಸ ಕೈಗೊಳ್ಳುವ ರೀತಿಯಲ್ಲಿ ರಾಜ್ಯದ ಸಚಿವರು ಜಿಲ್ಲಾ ಪ್ರವಾಸ ಕೈಗೊಳ್ಳಬೇಕು ಎನ್ನುವುದು ಸೂಚನೆಯ ಸಾರ.
