ನವದೆಹಲಿ: ಉತ್ತರ ಪ್ರದೇಶಕ್ಕೆ ಅಂಟಿಕೊಂಡಿದ್ದ ಗೂಂಡಾರಾಜ್ ಕಳಂಕವನ್ನು ಯೋಗಿ ಅದಿತ್ಯನಾಥರ ನೇತೃತ್ವದ ಸರ್ಕಾರ ಈ ಐದು ವರ್ಷದಲ್ಲಿ ತೊಡೆದುಹಾಕಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದರು. ವರ್ಚುವಲ್ ಮೂಲಕ ಸೋಮವಾರ ಮೊದಲ ಚುನಾವಣಾ ರ್ಯಾಲಿ ನಡೆಸಿದ ಅವರು, ರಾಜ್ಯದಲ್ಲಿ ವಿಶೇಷವಾಗಿ ಪಶ್ಚಿಮ ಭಾಗದಲ್ಲಿ ಧನಬಲ, ಬಾಹುಬಲ ಇದ್ದವರದ್ದೇ ಆಡುಂಬೊಲ ಆಗಿತ್ತು. ಇಂಥದ್ದನ್ನು ಬಿಜೆಪಿ ಸರ್ಕಾರ ಹೊಗಲಾಡಿಸಿ ರಾಜ್ಯದಲ್ಲಿ ಕಾನೂನು- ಸುವ್ಯವಸ್ಥೆಯನ್ನು ಸರಿಪಡಿಸಿ ಜನರು ನೆಮ್ಮದಿಯಿಂದ ಬದುಕುವಂತೆ ಮಾಡಿದೆ. ದೊಂಬಿ, ದರೋಡೆ, ಹತ್ಯೆಗಳು ಇಲ್ಲವಾಗಿದೆ. ವ್ಯಾಪಾರಿಗಳ ಸುಲಿಗೆಗೆ ಕಡಿವಾಣ ಬಿದ್ದಿದೆ. ಸಂಜೆ ನಂತರ ಹೆಣ್ಣುಮಕ್ಕಳು ನಿರಾಂತಕವಾಗಿ ಓಡಾಡುವ ಸನ್ನಿವೇಶ ಇದೆ. ಹಿಂದಿನ ಸರ್ಕಾರ ಪೋಷಿಸುತ್ತಿದ್ದ ಗೂಂಡಾಗಳನ್ನು ಮಟ್ಟಹಾಕಲಾಗಿದೆ. ಹೊತ್ತಿ ಉರಿಯುತ್ತಿದ್ದ ಪ್ರದೇಶದಲ್ಲಿ ಈಗ ಸಂಭ್ರಮ ಮನೆ ಮಾಡಿದೆ ಎಂದರು. ಕನಸು ಕಾಣುವವರು ನಿದ್ರಿಸುತ್ತಲೇ ಇರುತ್ತಾರೆ. ಸಿಎಂ ಯೋಗಿ ರಾಜ್ಯವನ್ನು ಅಭಿವೃದ್ಧಿ ಪಥದಲ್ಲಿ ಕೊಂಡೊಯ್ಯುತ್ತಿದ್ದಾರೆ ಎಂದರು.
