ಕಮಲದೆಲೆಯ ಈ ಉಪಮಾನವು ಬಂದಿರುವುದು, ಪಾಪವಂಟದಿರುವ ಜೀವನದ ಪರಿಯ ನಿದರ್ಶನಕ್ಕಾಗಿ. ಇಲ್ಲಿಯ ಭಾವವನ್ನು ಶ್ರೀರಂಗಮಹಾಗುರುಗಳು ಇನ್ನೂ ವಿಸ್ತರಿಸಿಯೂ ವಿಶದತರವಾಗಿಯೂ ಹೇಳಿದ್ದಾರೆ: ನೀರಿನಲ್ಲೇ ಹುಟ್ಟಿ, ನೀರಿನಲ್ಲೇ ಬೆಳೆದು, ಸರ್ವದಾ ನೀರಿನಲ್ಲೇ ಇರುವುದು, ಕಮಲ; ಆದರೂ ಅದರ ಎಲೆಗೆ ನೀರು ಅಂಟುವುದಿಲ್ಲ; ಅಂತೆಯೇ ಪ್ರಾಕೃತಜನರ (ಎಂದರೆ ಸಾಧಾರಣಜನರ) ಮಧ್ಯದಲ್ಲಿಯೇ ಇದ್ದೂ, ಪ್ರಾಕೃತಭಾವವನ್ನು ತಾನು ಅಂಟಿಸಿಕೊಳ್ಳದೇ ಜ್ಞಾನಿಯು ಜೀವನ ಮಾಡುತ್ತಾನೆ. ಜ್ಞಾನಿಗಳ ಉದಾತ್ತಜೀವನಶೈಲಿಗೆ ಕನ್ನಡಿಹಿಡಿಯುತ್ತದೆ, ಈ ನುಡಿ; ಉಪನಿಷತ್ಸಾರವಾದ ಗೀತೆಯ ಸಾರದ ಜೀವನಾನ್ವಯವನ್ನು ಸಪರಿಷ್ಕಾರವಾಗಿಯೂ ಸ್ಪುಟತರವಾಗಿಯೂ ಸಾರುತ್ತದೆ ಕೂಡ.
