ಸಚಿವರಿಗೆ ಸಲ್ಲಿಕೆಯಾಗಿರುವ ಪ್ರಶ್ನಾವಳಿಗಳಲ್ಲಿ ಕೇವಲ ಇಲಾಖೆಗೆ ಸಂಬಂಧಿಸಿದ ಪ್ರಶ್ನೆಗಳಷ್ಟೇ ಇಲ್ಲ. ಪಕ್ಷದ ಸಂಘಟನೆಗೆ ಸಂಬಂಧಿಸಿದಂತೆ ಹಲವು ಪ್ರಶ್ನೆಗಳನ್ನಿಡಲಾಗಿದೆ. ಸಚಿವರಾದ ನಂತರ ಇಲಾಖೆಯಲ್ಲಿ ತಂದಿರುವ ಬದಲಾವಣೆಗಳೇನು? ಜಿಲ್ಲೆಯಲ್ಲಿ ಕಾರ್ಯಕರ್ತರ ಜತೆ ಸಮನ್ವಯ ಸಾಧಿಸಲಾಗಿದೆಯೇ? ಜನಸ್ಪಂದನಾ ಸಭೆ ನಡೆಸಿರುವರೇ? ತಾಲೂಕುಗಳಿಗೆ ಭೇಟಿ ನೀಡಿದಾಗ ಸ್ವೀಕರಿಸಲಾದ ಅಹವಾಲುಗಳಿಗೆ ನೀಡಿರುವ ಸ್ಪಂದನೆ, ಜಿಲ್ಲಾ ಮತ್ತು ತಾಲೂಕು ಮಟ್ಟದಲ್ಲಿ ವಿವಿಧ ಸಮಿತಿಗಳಿಗೆ ನೇಮಕ, ಡಿಸಿಸಿ ಕಚೇರಿಗಳಿಗೆ ಭೇಟಿ, ಪದಾಧಿಕಾರಿಗಳ ಸಭೆ, ಸ್ವಕ್ಷೇತ್ರದಲ್ಲಿ ಹಮ್ಮಿಕೊಂಡಿರುವ ಯೋಜನೆಗಳು, ಬೇರೆ ಜಿಲ್ಲೆಗಳಿಗೆ ಹೋದಾಗ ಪಕ್ಷದ ಕಚೇರಿ ಭೇಟಿ, ಸ್ವಂತ ಜಿಲ್ಲೆಯ ಎಲ್ಲ ತಾಲೂಕುಗಳಲ್ಲಿ ಪಕ್ಷದ ಕಚೇರಿಗೆ ನಿವೇಶನ ಪಡೆಯುವುದು, ಗ್ಯಾರಂಟಿಗಳ ಅನುಷ್ಠಾನ, ಅವುಗಳ ಮೂಲಕ ಸರ್ಕಾರ ಮತ್ತು ಪಕ್ಷದ ಪರವಾಗಿ ಕೈಗೊಂಡಿರುವ ವ್ಯಾಪಕ ಪ್ರಚಾರದ ಮಾಹಿತಿಗಳೇನೆಂಬ ಕುರಿತು ಹಲವು ಪ್ರಶ್ನೆಗಳನ್ನು ಕೇಳಲಾಗಿದೆ.
