ಇತ್ತೀಚಿಗೆ ವೀರಣ್ಣನಪಾಳ್ಯದಿಂದ ಹೆಬ್ಬಾಳದ ಕಡೆ ಸಾಗುವ ಸರ್ವಿಸ್ ರಸ್ತೆ ತೀರಾ ಹಾಳಾಗಿದ್ದು ದುರಸ್ತಿಪಡಿಸುವಂತೆ ನಾಗರಿಕರು ಸ್ಥಳೀಯ ಶಾಸಕ ಕೃಷ್ಣಬೈರೇಗೌಡಗೆ ‘ಎಕ್ಸ್’ ಮೂಲಕ ವಿನಂತಿಸಿದ್ದರು. ಇದಕ್ಕೆ ಪ್ರತಿಯಾಗಿ ಶಾಸಕರು, ಬಿಬಿಎಂಪಿ ಅಥವಾ ಬಿಎಂಆರ್ಸಿಎಲ್ ರಸ್ತೆ ದುರಸ್ತಿಪಡಿಸುವಂತೆ ವಿನಂತಿಸಿದ್ದು ಸಾಮಾಜಿಕ ಜಾಲತಾಣದಲ್ಲಿ ಟ್ರೋಲ್ಗೆ ಒಳಗಾಗಿತ್ತು. ಆ ಬಳಿಕ ವಾರದೊಳಗೆ 1 ಕಿ.ಮೀ. ವರೆಗೆ ಡಾಂಬರು ಹಾಕಿದ್ದು, ಉಳಿದ ಭಾಗವನ್ನು ಹಾಗೆಯೇ ಬಿಡಲಾಗಿದೆ. ಸದ್ಯ ಹೆಬ್ಬಾಳದ ಬಸ್ ಡಿಪೋ ಬಳಿ ಮೆಟ್ರೋ ಕಾಮಗಾರಿಗಾಗಿ ಸರ್ವಿಸ್ ರಸ್ತೆಯನ್ನು ಬಂದ್ ಮಾಡಲಾಗಿದೆ. ನಾಗವಾರ ಕೆರೆ ಬಳಿಯಿಂದ ವಾಹನಗಳ ಸಂಚಾರಕ್ಕೆ ಅವಕಾಶ ಇದ್ದರೂ, ಭಾರಿ ಗಾತ್ರದ ಗುಂಡಿಗಳಿಂದಾಗಿ ಸವಾರರು ಇಲ್ಲಿ ಸಂಚರಿಸಲು ಹಿಂದೇಟು ಹಾಕುತ್ತಿದ್ದಾರೆ. ಇದೇ ಪರಿಸ್ಥಿತಿ ರಾಮಮೂರ್ತಿನಗರ ಜಂಕ್ಷನ್ವರೆಗೂ ಕಂಡುಬಂದಿದ್ದು, ಸರ್ವಿಸ್ ರಸ್ತೆಯು ಕಚ್ಚಾ ರಸ್ತೆಯಾಗಿ ಮಾರ್ಪಟ್ಟಿದೆ. ಸುಮಾರು 9 ಕಿ.ಮೀ. ಉದ್ದಕ್ಕೂ ನೂರಾರು ಗುಂಡಿಗಳು ಉಂಟಾಗಿದ್ದರೆ, ಕೆಲವೆಡೆ ಕೆಲ ನೂರು ಮೀಟರ್ವರೆಗೆ ಇಡೀ ಸರ್ವಿಸ್ ರಸ್ತೆ ಹಾಳಾಗಿದೆ. ಇದನ್ನು ದುರಸ್ತಿಪಡಿಸಲು ಸಂಬಂಧಿಸಿದ ಸರ್ಕಾರಿ ಸಂಸ್ಥೆ ಮುಂದಾಗದ ಕಾರಣ ನಾಗರಿಕರು ಸಮಸ್ಯೆಗೆ ಒಳಗಾಗಿದ್ದಾರೆ. ಮಳೆ ಬಂದಾಗ ಸರ್ವಿಸ್ ರಸ್ತೆಯಲ್ಲಿ ಸಾಗುವುದು ದುಸ್ತರವಾಗಿದೆ.
