ಪಂಜಾಬ್ ವಾಯುನೆಲೆ ದಾಳಿಗೆ ಅತಿ ವೇಗದ ಕ್ಷಿಪಣಿ ಬಳಕೆ; ಶಾಲೆ, ಆಸ್ಪತ್ರೆ ಮೇಲೂ ಅಟ್ಯಾಕ್​: ಕರ್ನಲ್ ಸೋಫಿಯಾ ಖುರೇಷಿ | MEA Press Conference

MEA Press Conference: ಪಾಕಿಸ್ತಾನದಲ್ಲಿ ನಡೆದ ದಾಳಿಗಳ ಕುರಿತು ಬೆಳಗ್ಗೆ 10:30ಕ್ಕೆ ಸುದ್ದಿಗೋಷ್ಠಿ ನಡೆಸಿದ ಭಾರತೀಯ ಸೇನೆ, ಪ್ರಸ್ತುತ ದೇಶದಲ್ಲಿ ಏನೆಲ್ಲ ಆಗಿವೆ. ಪಾಕ್​ ಯಾವುದನ್ನು ಗುರಿಯಾಗಿಸಿ, ಎಲ್ಲೆಲ್ಲಿ ದಾಳಿ ಮಾಡಿತು ಎಂಬ ಮಾಹಿತಿಯನ್ನು ವಿವರವಾಗಿ ತಿಳಿಸಿದೆ. ವಿಂಗ್ ಕಮಾಂಡರ್ ವ್ಯೋಮಿಕಾ ಸಿಂಗ್, ಕರ್ನಲ್ ಸೋಫಿಯಾ ಖುರೇಷಿ ಮತ್ತು ವಿದೇಶಾಂಗ ಕಾರ್ಯದರ್ಶಿ ವಿಕ್ರಮ್ ಮಿಶ್ರಿ ಸುದ್ದಿಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.

ಇದನ್ನೂ ಓದಿ: ಜಮ್ಮುವಿನಲ್ಲಿ ಪಾಕಿಸ್ತಾನ ಶೆಲ್ ದಾಳಿಗೆ ಸರ್ಕಾರಿ ಅಧಿಕಾರಿ ಬಲಿ..Operation Sindoor

ಪರಿಸ್ಥಿತಿ ವಿವರಿಸಿದ ಕರ್ನಲ್ ಸೋಫಿಯಾ, "ಪಾಕಿಸ್ತಾನಿ ಸೇನೆಯು ಪಶ್ಚಿಮ ಗಡಿಗಳ ಮೇಲೆ ನಿರಂತರವಾಗಿ ದಾಳಿ ಮಾಡುತ್ತಿದೆ. ಅದು ಭಾರತದ ಮಿಲಿಟರಿ ತಾಣಗಳನ್ನು ಗುರಿಯಾಗಿಸಿ ಡ್ರೋನ್‌ಗಳು, ದೀರ್ಘ-ಶ್ರೇಣಿಯ ಶಸ್ತ್ರಾಸ್ತ್ರಗಳು ಮತ್ತು ಫೈಟರ್ ಜೆಟ್‌ಗಳನ್ನು ಬಳಸಿ ದಾಳಿ ನಡೆಸಿದೆ. ಎದುರಾಗುತ್ತಿದ್ದ ಭಾರೀ ಅಪಾಯಗಳನ್ನು ಭಾರತೀಯ ಸೇನೆ ತಟಸ್ಥಗೊಳಿಸಿದೆ. ಆದರೆ, ಪಾಕಿಸ್ತಾನ 26ಕ್ಕೂ ಹೆಚ್ಚು ಸ್ಥಳಗಳಲ್ಲಿ ವಾಯುದಳದ ಮೂಲಕ ನುಸುಳಲು ಪ್ರಯತ್ನಿಸಿದೆ" ಎಂದರು.

"ಪಾಕ್​ ಉಧಮ್‌ಪುರ, ಭುಜ್, ಪಠಾಣ್‌ಕೋಟ್, ಬಟಿಂಡಾದಲ್ಲಿನ ವಾಯುಪಡೆಯ ನೆಲೆಗಳಲ್ಲಿ ನಮ್ಮ ಉಪಕರಣಗಳು ಮತ್ತು ಸಿಬ್ಬಂದಿಯನ್ನು ಟಾರ್ಗೆಟ್​ ಮಾಡಿ ದಾಳಿ ನಡೆಸಿದ್ದಾರೆ. ಅವರು ಪಂಜಾಬ್‌ನ ವಾಯುನೆಲೆಯನ್ನು ಗುರಿಯಾಗಿಸಲು ಬೆಳಗಿನ ಜಾವ 1:40ರ ಸುಮಾರಿಗೆ ಅತಿ ವೇಗದ ಕ್ಷಿಪಣಿಗಳನ್ನು ಬಳಸಿದ್ದಾರೆ. ಅವರು ಆರೋಗ್ಯ ಕೇಂದ್ರಗಳು ಮತ್ತು ಶಾಲೆಗಳ ಮೇಲೆಯೂ ದಾಳಿ ಮಾಡಿದ್ದಾರೆ" ಎಂದು ಕರ್ನಲ್ ಸೋಫಿಯಾ ಖುರೇಷಿ ಹೇಳಿದರು,(ಏಜೆನ್ಸೀಸ್).