ಇಂದಿನ ಯುವಜನತೆಯ ಸಾಮಾನ್ಯ ಉದ್ದೇಶ ಉತ್ತಮ ಅಂಕಗಳೊಂದಿಗೆ ಡಿಗ್ರಿ ಅಥವಾ ಮಾಸ್ಟರ್ ಡಿಗ್ರಿ ಪೂರ್ಣಗೊಳಿಸಿ, ಭದ್ರವಾದ ಕೆಲಸ ಪಡೆದು, ಸುಖವಾಗಿ ಬದುಕುವುದು. ಆದರೆ, ಹೆಚ್ಚಿನವರು ವಿದ್ಯಾರ್ಥಿ ಜೀವನದಲ್ಲಿ ಓದುವ ಒತ್ತಡ ಅನುಭವಿಸುತ್ತಿದ್ದಾರೆ. ಕಾಲೇಜಿಗೆ ಬಂಕ್ ಹೊಡೆದು, ಸಿನಿಮಾ ವೀಕ್ಷಣೆ ಅಥವಾ ದ್ವಿಚಕ್ರವಾಹನಗಳಲ್ಲಿ ಸುಮ್ಮನೆ ಸುತ್ತಾಡುವುದು, ಪರೀಕ್ಷೆಯ ಕೊನೆಯ ಕ್ಷಣದಲ್ಲಿ ಓದಿ ಹೇಗೋ ಪಾಸ್ ಆಗುವುದು... ಇವುಗಳೇ ಸಾಮಾನ್ಯ ಸಂಗತಿಗಳಾಗಿವೆ. ಇದರ ಹಿಂದೆ ಶಿಕ್ಷಣ ಪದ್ಧತಿ, ಪೋಷಕರ ನಿರೀಕ್ಷೆಗಳು ಮತ್ತು ಸಮಾಜದ ಒತ್ತಡದಂಥ ಮುಖ್ಯ ಕಾರಣಗಳಿವೆ. ಇದು ಅಕ್ಷರಜ್ಞಾನದ ಪ್ರಮಾಣವನ್ನು ಹೆಚ್ಚಿಸಬಹುದು, ಆದರೆ ನೈಜ ಜ್ಞಾನವೃದ್ಧಿಯನ್ನು ಖಚಿತಪಡಿಸುವುದಿಲ್ಲ.
