"ರೋಮ್ ನಗರವೆ ಹೊತ್ತಿ ಉರಿಯುತ್ತಿರುವ ಸಂದರ್ಭದಲ್ಲಿ ನಿರೋ ಪಿಟೀಲು ಬಾರಿಸುತ್ತಿದ್ದ' ಎಂಬ ವಿಚಾರವೂ ಎಲ್ಲರಿಗೂ ತಿಳಿದಿರುವಂಥದ್ದೆ. "ಬೆಕ್ಕಿಗೆ ಚೆಲ್ಲಾಟ, ಇಲಿಗೆ ಪ್ರಾಣ ಸಂಕಟ', "ಚಿಂತೆಯಿಲ್ಲದವನಿಗೆ ಸಂತೆಯಲ್ಲಿ ನಿದ್ರೆ' ಎಂಬ ಗಾದೆಗಳನ್ನು ಸಂವಾದಿಯಾಗಿ ತೆಗೆದುಕೊಳ್ಳಬಹುದು. ತನ್ನಂತೆ ಪರರು ಎಂಬ ಮನೋಭಾವನೆ ಇರಬೇಕು. ತನಗೇನು ಬೇಕೋ ಅದನ್ನು ಪಡೆಯಲು ಇತರರ ಸಹಾಯ ಪಡೆಯುವಂತೆ, ಇತರರಿಗೆ ಬೇಕಾದ್ದನ್ನು ಪಡೆಯಲು ನಾವು ಸಹಕರಿಸಬೇಕು. ಸಹಾಯ ಕೇಳಬೇಕು ನಿಜ, ಆದರೆ ನಾವು ಕೇಳುವ ಸಹಾಯ ನಿಜಕ್ಕೂ ಸಹಾಯವೇ ಎನ್ನುವುದರ ಅವಲೋಕನವೂ ಮುಖ್ಯ. ತೊಂದರೆಯಲ್ಲಿ ಸಿಲುಕಿ ಅದರಿಂದ ಬಿಡಿಸಿಕೊಳ್ಳಲು ಕಷ್ಟಸಾಧ್ಯ ಎಂದಾಗ ಇತರರನ್ನು ಕೇಳುವುದು ಸರಿ! ಇತರರಿಗೆ ನೆರವಾಗುವಾಗಲೂ ಅಷ್ಟೇ, ಅವರ ಕಷ್ಟ, ನೋವನ್ನು ಗಮನಿಸಿ, ಪ್ರಾಂಜಲ ಮನಸ್ಸಿನಿಂದ ಸ್ಪಂದಿಸಬೇಕೆ ಹೊರತು ತೋರಿಕೆಗಾಗಿ ಅಲ್ಲ. ಹೀಗೆ ಮಾಡುವ ಸಣ್ಣ ಸಹಾಯವೂ ಸಂತೃಪ್ತಿ, ಸಾರ್ಥಕತೆ ಒದಗಿಸುತ್ತದೆ. ಇದೇ ಮಾನವೀಯತೆಯ ಮೌಲ್ಯವೂ ಹೌದು!
