mango pachcha movie review: ರಾಜರ ಊರಿನಲ್ಲಿ ಪಚ್ಚನ ದರ್ಬಾರ್

ನಿರ್ಮಾಣ: ಪ್ರಿಯಾ ಸುದೀಪ್, ಕಾರ್ತಿಕ್ ಗೌಡ, ಯೋಗಿ ರಾಜ್

ನಿರ್ದೇಶನ: ವಿವೇಕ

ತಾರಾಗಣ: ಸಂಚಿತ್ ಸಂಜೀವ್, ಕಾಜಲ್ ಕುಂದರ್, ಮಯೂರ್ ಪಟೇಲ್, ಜೈ ಗೋಪಿನಾಥ್, ಹರಿಣಿ, ಪ್ರಶಾಂತ್ ಹಿರೇಮಠ

ಆರಡಿ ಆಳೆತ್ತರದ, ಮೊನಚು ಧ್ವನಿಯ ಸಂಚಿತ್ ಸಂಜೀವ್ ಎಂಬ ಹೊಸ ಪ್ರತಿಭೆ ‘ಮ್ಯಾಂಗೋ ಪಚ್ಚ’ ಚಿತ್ರದ ಮೂಲಕ ಚಂದನವನಕ್ಕೆ ಪರಿಚಯವಾಗಿದ್ದಾರೆ. ನಟ ಕಿಚ್ಚ ಸುದೀಪ್ ಸೋದರಳಿಯ ಎಂಬ ಕಾರಣಕ್ಕೆ ಅವರ ಎಂಟ್ರಿ ಬಗ್ಗೆ ಎಲ್ಲರಲ್ಲೂ ಕೌತುಕವಿತ್ತು. ಸಂಚಿತ್‌ಗೆ ಚಿತ್ರಕಥೆ ಮತ್ತು ಪಾತ್ರ ಬೆಂಬಲವಾಗಿ ನಿಂತಿದ್ದು, ಇಡೀ ಕಥೆಯಲ್ಲಿ ಆ್ಯಕ್ಷನ್-ಹೀರೋ ಆಗಿ ಕಂಗೊಳಿಸಿದ್ದಾರೆ. ಪೂರ್ಣ ಪ್ರಮಾಣದಲ್ಲಿ ತಯಾರಿ ನಡೆಸಿಯೇ ಪದಾರ್ಪಣೆ ಮಾಡಿರುವುದು ತೆರೆ ಮೇಲೆ ಎದ್ದು ಕಾಣುತ್ತದೆ. ಇನ್ನು ಸಂಚಿತ್ ನಟನೆಯಲ್ಲಿ ಸುದೀಪ್ ಮ್ಯಾನರಿಸ್‌ಂನ ಛಾಯೆ ಕಾಣಬಹುದಾಗಿದ್ದು, ಕಿಚ್ಚನ ಅಭಿಮಾನಿಗಳಿಗೆ ಈ ಪಚ್ಚ ಅಚ್ಚುಮೆಚ್ಚು ಆಗುವುದರಲ್ಲಿ ಅನುಮಾನವಿಲ್ಲ. ಇದು ಸುದೀಪ್ ಪತ್ನಿ ಪ್ರಿಯಾ ನಿರ್ಮಾಣದ ಚೊಚ್ಚಲ ಚಿತ್ರವಾಗಿದ್ದು, ಅವರಿಗೆ ಕೆಆರ್‌ಜಿಯ ಕಾರ್ತಿಕ್ ಗೌಡ, ಯೋಗಿ ರಾಜ್ ಸಾಥ್ ನೀಡಿದ್ದಾರೆ.

ಮೈಸೂರಿನಲ್ಲಿ ಡಿವಿಡಿ ಅಂಗಡಿ ಇಟ್ಟುಕೊಂಡಿರುವ ಹುಡುಗ ಪ್ರಶಾಂತ್ ಅಲಿಯಾಸ್ ಪಚ್ಚ (ಸಂಚಿತ್). ತನ್ನದೇ ಸಣ್ಣ ಗುಂಪು ಕಟ್ಟಿಕೊಂಡು ಸಿನಿಮಾಗಳ ಪೈರಸಿ ಮಾಡಿ ಹಂಚುವುದು ಆತನ ಮತ್ತೊಂದು ಕಾಯಕ .ತಾಯಿ (ಹರಿಣಿ), ತಮ್ಮ ಶ್ಯಾಮ (ಗೋಪಿನಾಥ್) ಹಾಗೂ ಪ್ರಿಯತಮೆ ಸೂಜಿ (ಕಾಜಲ್) ಜತೆಗೆ ನೆಮ್ಮದಿಯ ಬದುಕು. ಹೀಗಿರುವಾಗ ಆತನ ತಂದೆಯ ನಿಧನ ಸುದ್ದಿ ಬರುತ್ತದೆ. ಅಪ್ಪನ ಅಂತಿಮ ದರ್ಶನ ಪಡೆಯಲು ಹೋದಾಗಲೇ, ಮಲ ಸಹೋದರ ನಾಗಪ್ಪ (ಮಯೂರ್) ಎದುರಾಗುತ್ತಾನೆ. ಅಲ್ಲಿಂದ ಅವರಪ್ಪ ನಡೆಸುತ್ತಿದ್ದ ಮಾದಕ ವಸ್ತುಗಳ ಮಾರಾಟ ದಂಧೆಯ ಮುಂದಿನ ರೂವಾರಿ ಯಾರು? ಎಂಬ ಪ್ರಶ್ನೆ ಉದ್ಭವಿಸುತ್ತದೆ. ಅಗ ಸಂಧಾನಕಾರರಾಗಿ ಬರುವ ಮೇಯರ್ ಮಹೇಂದ್ರ (ಪ್ರಶಾಂತ್), ಪಚ್ಚನಿಗೆ ತಂದೆಯ ವ್ಯವಹಾರ ಉಸ್ತುವಾರಿ ಕೊಟ್ಟರೆ, ನಾಗಪ್ಪನನ್ನು ಮೇಲುಸ್ತುವಾರಿ ಮಾಡುತ್ತಾನೆ. ಮುಂದೆ ವ್ಯಾಪಾರದಲ್ಲಿ ಕುದುರುವ ಪಚ್ಚನಿಗೆ ಬೆಳೆಯಬೇಕು ಎಂಬ ಹಂಬಲ ಮೂಡುತ್ತದೆ. ಅದಕ್ಕೆ ನಾಗಪ್ಪ, ಮೇಯರ್ ಕತ್ತರಿ ಹಾಕಲು ಮುಂದಾಗುತ್ತಾರೆ. ಆಗ ಸಿಡಿದೇಳುವ ಪಚ್ಚ, ತನ್ನದೇ ಸಾಮಾಜ್ರ್ಯದ ಮೂಲಕ ‘ಮ್ಯಾಂಗೋ ಪಚ್ಚ’ನಾಗಿ ಬೆಳೆಯುತ್ತಾನೆ. ಹಾಗಾದರೆ, ಪಚ್ಚ, ‘ಮ್ಯಾಂಗೋ ಪಚ್ಚ’ ಆಗುವುದು ಹೇಗೆ? ದಾಯಾದಿಗಳ ಕದನ ಹೇಗಿರುತ್ತದೆ? ಅದರಲ್ಲಿ ಗೆಲ್ಲುವವರಾರು? ತಿಳಿಯಲು ಸಿನಿಮಾ ನೋಡಬೇಕಷ್ಟೇ.

ಇಡೀ ಸಿನಿಮಾದಲ್ಲಿ ಸಂಚಿತ್ ಸಂಜೀವ್ ಪ್ರಮುಖ ಆಕರ್ಷಣೆ. ಆ್ಯಂಗ್ರಿ ಯಂಗ್ ಮ್ಯಾನ್ ಲುಕ್‌ನಲ್ಲಿ ಕಾಣಿಸಿಕೊಂಡು ನಟನೆಯಲ್ಲಿ ಪ್ರೌಢಿಮೆ ಸಾಧಿಸಿದ್ದಾರೆ. ಸುದೀಪ್ ಗಾಂಭೀರ್ಯ, ಹಾವಭಾವ, ಮ್ಯಾನರಿಸಂ ಸಂಚಿತ್‌ನಲ್ಲಿ ಕಾಣಬಹುದು. ಮೊನಚಾದ ಧ್ವನಿಯಲ್ಲಿ ಸಂಚಿತ್ ಹೇಳುವ ಡೈಲಾಗ್‌ಗಳು ಚಪ್ಪಾಳೆಗಿಟ್ಟಿಸಿಕೊಳ್ಳುತ್ತವೆ. ಯುವ ನಿರ್ದೇಶಕ ವಿವೇಕ, ಮೈಸೂರಿನ ಹಿನ್ನೆಲೆಯ 2002ರ ಕಥೆಯನ್ನು ಸೊಗಸಾಗಿ, ವೇಗವಾಗಿ ನಿರೂಪಿಸಿದ್ದಾರೆ. ಮುಂದೇನು? ಎಂಬ ಕುತೂಹಲ ಇಲ್ಲದಿದ್ದರೂ, ಸಾಹಸ ದೃಶ್ಯಗಳು ಗಮನ ಸೆಳೆಯುತ್ತವೆ. ಕೆಲವು ಪಾತ್ರಗಳಿಗೆ ಇನ್ನಷ್ಟು ವಿವರಣೆ ಬೇಕಿತ್ತು ಅನಿಸುತ್ತದೆ. ಕೇವಲ 95 ನಿಮಿಷದ ಈ ಚಿತ್ರದಲ್ಲಿ ಹಲವು ಪಾತ್ರಗಳಿದ್ದು, ಎಲ್ಲರಿಗೂ ಕಾಣಿಸಿಕೊಳ್ಳುವ ಅವಕಾಶ ಸಿಕ್ಕಿದೆ. ಕ್ಲೈಮ್ಯಾಕ್ಸ್‌ನಲ್ಲಿ ಅಚ್ಚರಿ ಇಟ್ಟಿದ್ದು, ವಿಶೇಷ ಪಾತ್ರವನ್ನು ಪರಿಚಯಿಸುವ ಮೂಲಕ ಸೀಕ್ವೆಲ್ ಸುಳಿವು ನೀಡಿದ್ದಾರೆ. ಸಂಚಿತ್ ಜತೆಗೆ ಕಾಜಲ್ ಕುಂದರ್, ಮಯೂರ್ ಪಟೇಲ್, ಜೈ ಗೋಪಿನಾಥ್ ಗಮನ ಸೆಳೆಯುತ್ತಾರೆ. ರಂಗಕರ್ಮಿ ಪ್ರಶಾಂತ್ ಹಿರೇಮಠ ಪಾತ್ರಕ್ಕೆ ಇನ್ನಷ್ಟು ಆರ್ಭಟ ಬೇಕಿತ್ತು. ಇಡೀ ಆ್ಯಕ್ಷನ್ ಕಥೆಗೆ ಚರಣ್ ರಾಜ್ ಹಿನ್ನೆಲೆ ಸಂಗೀತ ಜೀವಾಳ. ‘ಹಸ್ರವ್ವ; ಸಾಂಗ್ ನೆನಪಿನಲ್ಲಿ ಉಳಿಯುತ್ತದೆ. 2000ರ ಮೈಸೂರನ್ನು ಶೇಖರ್ ಚಂದ್ರ ತಮ್ಮ ಕ್ಯಾಮರಾದಲ್ಲಿ ಚೆನ್ನಾಗಿ ಸೆರೆಹಿಡಿದಿದ್ದಾರೆ. ಮಾವಿನ ಸೀಸನ್ ಮುಗಿಯುವಷ್ಟರಲ್ಲಿ ಮಾವು ಪ್ರಿಯರಿಗೆ ‘ಮ್ಯಾಂಗೋ ಹೊಸ ತಳಿ’ಯನ್ನು ‘ಮ್ಯಾಂಗೋ ಪಚ್ಚ’ ಮೂಲಕ ಬಿಗ್‌ಸ್ಕ್ರೀನ್ ಮೇಲೆ ಕಣ್ತುಂಬಿಕೊಳ್ಳಬಹುದಾಗಿದೆ.