ಮಂಡ್ಯದಲ್ಲಿ ನಡೆದ ಹತ್ಯೆ ಪ್ರಕರಣಕ್ಕೆ ಟ್ವಿಸ್ಟ್​; ಕತೆ ಕಟ್ಟಿದ್ದ ಪತ್ನಿ ಅಂದರ್​...ಕೊಲೆಗೆಡುಕರನ್ನು ಹಿಡಿಯಲು ಒಂದರ್ಥದಲ್ಲಿ ಮಂಗಳೂರು ಬಾಂಬ್​ ಕಾರಣವಾಯ್ತಾ?

ಮಂಡ್ಯ: ಪ್ರಿಯಕರನೊಂದಿಗೆ ಸೇರಿ ಗಂಡನನ್ನು ಹತ್ಯೆ ಮಾಡಿ, ಬಳಿಕ ಪಾರಾಗಲು ಸುಳ್ಳು ಕತೆ ಕಟ್ಟಿದ್ದ ಮಹಿಳೆಯನ್ನು ಪೊಲೀಸರು ಬಂಧಿಸಿದ್ದಾರೆ.

ಮಂಡ್ಯದ ವಿದ್ಯಾನಗರ ಬಡಾವಣೆಯ ಎರಡನೇ ಕ್ರಾಸ್​​ನಲ್ಲಿ ಸೋಮವಾರ ಕೊಲೆಯೊಂದಾಗಿತ್ತು. ರಾಜಸ್ಥಾನ ಮೂಲದ ಬುಂಡಾರಾಮ್​ ಹತ್ಯೆಯಾದ ವ್ಯಕ್ತಿ. ಇದಾದ ಬಳಿಕ ಆತನ ಪತ್ನಿ ಪೊಲೀಸರಿಗೆ ನೀಡಿದ್ದ ಮಾಹಿತಿಯಲ್ಲಿ, ದರೋಡೆಕೋರರು ನನ್ನ ಪತಿಯ ಹತ್ಯೆ ಮಾಡಿದ್ದಾರೆ. ನನ್ನ ಹಾಗೂ ಮಕ್ಕಳ ಕೈಕಾಲು ಕಟ್ಟಿ ಕೊಲೆ ಮಾಡಿದ್ದಾರೆ ಎಂದು ಹೇಳಿದ್ದಳು.

ಆದರೆ ಈ ಕೊಲೆಯಲ್ಲಿ ಭಾಗಿಯಾಗಿದ್ದ ರಾಜಸ್ಥಾನದ ಮನೀಶ್​ ಮತ್ತು ಕಿಶನ್​ ಚೆನ್ನರಾಯಪಟ್ಟಣದ ಬಸ್​ ನಿಲ್ದಾಣದಲ್ಲಿ ಬ್ಯಾಗ್ ಬಿಟ್ಟು ಹೋಗಿದ್ದರು. ಮಂಗಳೂರು ಏರ್​ಪೋರ್ಟ್​ನಲ್ಲಿ ಬಾಂಬ್​ ಸಿಕ್ಕ ಬೆನ್ನಲ್ಲೇ ಎಲ್ಲ ಬಸ್​ ನಿಲ್ದಾಣ ಸೇರಿ ಪ್ರಮುಖ ಸ್ಥಳಗಳಲ್ಲಿ ಪೊಲೀಸರು ಪರಿಶೀಲನೆ ನಡೆಸಿದ್ದರು. ಹಾಗೇ ಚೆನ್ನರಾಯಪಟ್ಟಣದ ಬಸ್​ಸ್ಟ್ಯಾಂಡ್​ನಲ್ಲಿ ಮನೀಶ್​ ಮತ್ತು ಕಿಶನ್​ ಬಿಟ್ಟು ಹೋಗಿದ್ದ ಬ್ಯಾಗ್ ಸಿಕ್ಕಿತ್ತು. ಅದನ್ನು ತೆರೆದು ನೋಡಿದಾಗ, ಗನ್​ ಸೇರಿ ಕೆಲವು ಮಾರಕಾಸ್ತ್ರಗಳು ದೊರೆತಿದ್ದವು.

ಬ್ಯಾಗ್​ನ್ನು ವಾಪಸ್​ ಪಡೆಯಲು ಬಂದ ಮನೀಶ್​, ಕಿಶನ್​ನನ್ನು ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಪೂರ್ತಿ ಸತ್ಯ ಹೊರಬಂದಿದೆ. ಪ್ರಿಯಕರನ ಜತೆ ಸೇರಲು ಬುಂಡಾರಾಮ್​ ಪತ್ನಿಯೇ ಸುಪಾರಿ ಕೊಟ್ಟಿದ್ದಾಗಿ ಬಾಯಿಬಿಟ್ಟಿದ್ದಾರೆ. ಸದ್ಯ ಪತ್ನಿ ಚಂದ್ರಿಕಾ, ಪ್ರಿಯಕರ ಸುರೇಶ್​, ಸುಫಾರಿ ಕಿಲ್ಲರ್ಸ್​ಗಳಾದ ಮನೀಶ್ ಮತ್ತು ಕಿಶನ್​ ಪೊಲೀಸರಿಂದ ಬಂಧಿತರಾಗಿದ್ದಾರೆ.