ಕೋಲಾರಕ್ಕೆ ಮಲ್ಲೇಶ್​ಬಾಬು ಪ್ರಥಮ ದಳಪತಿ

ಕೋಲಾರ: ತೀವ್ರ ಕುತೂಹಲಗಳ ನಡುವೆ ನಡೆದ ಕೋಲಾರ ಲೋಕಸಭಾ ಕ್ಷೇತ್ರದ ಚುನಾವಣೆಯಲ್ಲಿ ಜೆಡಿಎಸ್​&ಬಿಜೆಪಿ ಮೈತ್ರಿ ಅಭ್ಯರ್ಥಿ ಎಂ.ಮಲ್ಲೇಶ್​ ಬಾಬು 71,388 ಮತಗಳ ಅಂತರದಿಂದ ಗೆಲುವು ಸಾಧಿಸುವ ಮೂಲಕ ಜಿಲ್ಲೆಯ ಮೊದಲ ಜೆಡಿಎಸ್​ ಸಂಸದ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

ಕ್ಷೇತ್ರದಲ್ಲಿ ಒಟ್ಟು 17,26,914 ಮತದಾರರಿದ್ದು, ಆ ಪೈಕಿ 13,51,646 ಮಂದಿ ಮತ ಚಲಾಯಿಸಿದ್ದಾರೆ. ಚಲಾವಣೆಯಾಗಿರುವ ಮತಗಳ ಪೈಕಿ ಮೈತ್ರಿ ಅಭ್ಯರ್ಥಿ ಎಂ.ಮಲ್ಲೇಶ್​ ಬಾಬು 6,91,481 ಮತಗಳನ್ನು ಗಳಿಸಿ 71,388 ಮತಗಳ ಅಂತರದಿಂದ ಗೆಲುವು ಸಾಧಿಸಿದ್ದು, ಕಾಂಗ್ರೆಸ್​ ಅಭ್ಯರ್ಥಿ ಕೆ.ವಿ.ಗೌತಮ್​ 6,20,093 ಮತ ಪಡೆದುಕೊಂಡು ಪರಾಭವಗೊಂಡಿದ್ದಾರೆ. ಇನ್ನು ಉಳಿದ 16 ಮಂದಿ ವಿವಿಧ ಪಕ್ಷಗಳ ಹಾಗೂ ಪಕ್ಷೇತರ ಅಭ್ಯರ್ಥಿಗಳು ಠೇವಣಿ ಕಳೆದುಕೊಂಡಿದ್ದಾರೆ.
ಎಂಟು ವಿಧಾನಸಭಾ ಕ್ಷೇತ್ರಗಳ ಪೈಕಿ ಐದು ಕ್ಷೇತ್ರಗಳಲ್ಲಿ ಕಾಂಗ್ರೆಸ್​ ಶಾಸಕರು, ಎರಡು ಕ್ಷೇತ್ರಗಳಲ್ಲಿ ಜೆಡಿಎಸ್​ ಶಾಸಕರಿದ್ದಾರೆ. ಅದರಂತೆ ಕೆಜಿಎ್​ ಹಾಗೂ ಶಿಡ್ಲಟ್ಟ ಕ್ಷೇತ್ರ ಹೊರತುಪಡಿಸಿ ಉಳಿದ ಆರು ಕ್ಷೇತ್ರಗಳ ಪೈಕಿ ಐದು ಕ್ಷೇತ್ರಗಳಲ್ಲಿ ಕಾಂಗ್ರೆಸ್​ ಶಾಸಕರಿದ್ದರೂ ಜೆಡಿಎಸ್​ ಅಭ್ಯರ್ಥಿಗೆ ಬಹುಮತ ದೊರೆತಿದೆ.ಕೋಲಾರ ಕ್ಷೇತ್ರದ ಅಭ್ಯರ್ಥಿಗಳ ಆಯ್ಕೆಯು ರಾಜಕೀಯ ಪಕ್ಷಗಳಿಗೆ ಸವಾಲಾಗಿತ್ತು. ಮೈತ್ರಿ ಅಭ್ಯರ್ಥಿಯಾಗಿ ಮಲ್ಲೇಶ್​ ಬಾಬು ಅವರನ್ನು ಕಣಕ್ಕೆ ಇಳಿಸಿದರು. ಮಲ್ಲೇಶ್​ಬಾಬು ಬಂಗಾರಪೇಟೆ ವಿಧಾನಸಭಾ ಕ್ಷೇತ್ರದಿಂದ ಚುನಾವಣೆಗೆ ಸ್ಪರ್ಧಿಸಿ ಎರಡು ಬಾರಿ ಸೋಲು ಅನುಭವಿಸಿದ್ದರು. ಇದರ ಅನುಕಂಪವೂ ಲಭಿಸಿದೆ, ಜತೆಗೆ ಮೈತ್ರಿ ಧರ್ಮಪಾಲನೆಯಾಗಿದ್ದು ಇದರ ಲಾಭ ದೊರೆತಿದೆ.
ಚುನಾವಣೆಯ ದಿನಾಂಕ ಘೋಷಣೆಯಾದರೂ ಕಾಂಗ್ರೆಸ್​ನಲ್ಲಿ ಅಷ್ಟು ಬೇಗ ಟಿಕೆಟ್​ ಗೊಂದಲ ಬಗೆಹರಿದಿರಲಿಲ್ಲ. ಬಲಗೈ ಸಮುದಾಯಕ್ಕೆ ಟಿಕೆಟ್​ ನೀಡಬೇಕು ಎಂದು ಮಾಜಿ ಸಚಿವ ಕೆ.ಆರ್​.ರಮೇಶ್​ಕುಮಾರ್​ ತಂಡ ಹಾಗೂ ಎಡಗೈ ಸಮುದಾಯದ ಚಿಕ್ಕಪೆದ್ದಣ್ಣರಿಗೆ ಟಿಕೆಟ್​ಗಾಗಿ ಸಚಿವ ಕೆ.ಎಚ್​.ಮುನಿಯಪ್ಪ ಪಟ್ಟು ಹಿಡಿದಿದ್ದರು. ಇದರಿಂದಾಗಿ ಪಕ್ಷದ ಅಭ್ಯರ್ಥಿ ಘೋಷಣೆ ತಡವಾಯಿತು. ಜತೆಗೆ ಕಾಂಗ್ರೆಸ್​ ಪಕ್ಷದಲ್ಲಿ ಗುಂಪುಗಾರಿಕೆ, ಸಚಿವ ಕೆ.ಎಚ್​.ಮುನಿಯಪ್ಪ ಅವರನ್ನು ಕಡೆಗಣಿಸಿದ್ದು ಸೇರಿದಂತೆ ಹಲವು ಪ್ರಮುಖ ಕಾರಣಗಳು ಗೆಲುವಿನ ಹಳಿಗೆ ಬರಲು ಅಡ್ಡಿಯಾದವು.

• ವಿಶೇಷಪೂಜೆ
  ಕೋಲಾರ ಲೋಕಸಭಾ ಚುನಾವಣೆಯಲ್ಲಿ ಗೆಲುವು ಸಾಧಿಸಿದ ನಂತರ ಅಭ್ಯರ್ಥಿ ಎಂ.ಮಲ್ಲೇಶ್​ ಬಾಬು ಅವರು ನಗರದ ಕೋಲಾರಮ್ಮ ದೇವಾಲಯ ಹಾಗೂ ತಂದೆ ಸಿ.ಮುನಿಸ್ವಾಮಿ ಸಮಾಧಿಗೆ ವಿಶೇಷ ಪೂಜೆ ಸಲ್ಲಿಸಿದರು. ಕುಟುಂಬದ ಸದಸ್ಯರು, ಜೆಡಿಎಸ್​&ಬಿಜೆಪಿ ಕಾರ್ಯಕರ್ತರು ಸಾಥ್​ ನೀಡಿದರು. ಆನಂತರ ಸ್ವಗ್ರಾಮ ಕುಂಬಾರಹಳ್ಳಿಯಲ್ಲಿ ಗ್ರಾಮಸ್ಥರೊಂದಿಗೆ ವಿಜಯೋತ್ಸವ ಆಚರಿಸಿದರು. ಶಾಸಕರಾದ ಜಿ.ಕೆ.ವೆಂಕಟಶಿವಾರೆಡ್ಡಿ, ಸಮೃದ್ಧಿ ಮಂಜುನಾಥ್​, ಎಂಎಲ್ಸಿ ಇಂಚರ ಗೋವಿಂದರಾಜು, ಬಿಜೆಪಿ ಜಿಲ್ಲಾಧ್ಯಕ್ಷ ಡಾ.ಕೆ.ಎನ್​.ವೇಣುಗೋಪಾಲ್​, ಮಾಜಿ ಶಾಸಕರಾದ ವರ್ತೂರು ಆರ್​.ಪ್ರಕಾಶ್​, ಕೆ.ಎಸ್​.ಮಂಜುನಾಥ್​ಗೌಡ, ವೈ.ಸಂಪಂಗಿ, ಮುಖಂಡರಾದ ಸಿಎಂಆರ್​ ಶ್ರೀನಾಥ್​, ರಾಮೇಗೌಡ ಮತ್ತಿತರರು ಇದ್ದರು.

• ಅಭ್ಯರ್ಥಿಗಳು ಪಡೆದುಕೊಂಡಿರುವ ಮತಗಳು
  ಕೋಲಾರ ಲೋಕಸಭಾ ಕ್ಷೇತ್ರದಲ್ಲಿ ಕಾಂಗ್ರೆಸ್​, ಜೆಡಿಎಸ್​ ಹೊರತುಪಡಿಸಿ ಉಳಿದೆಲ್ಲ ಅಭ್ಯರ್ಥಿಗಳು ಠೇವಣಿ ಕಳೆದುಕೊಂಡಿದ್ದಾರೆ. ಬಹುಜನ ಸಮಾಜ ಪಕ್ಷದ ಎಸ್​.ಬಿ.ಸುರೇಶ್​ 4,732, ಸಮಾಜವಾದಿ ಪಕ್ಷದ ಡಿ.ಗೋಪಾಲಕೃಷ್ಣ-1,669, ಆರ್​ಪಿಐನ ತಿಮ್ಮರಾಯಪ್ಪ 864, ಉತ್ತಮ ಪ್ರಜಾಕೀಯ ಪಕ್ಷದ ಎ.ದೇವರಾಜ್​ 1354, ಕರ್ನಾಟಕ ರಾಷ್ಟ್ರೀಯ ಸಮಿತಿಯ ಎ.ವಿ.ಮಹೇಶ್​ಗೆ 1,065, ವಿದುತ್ತಲೈ ಚಿರುತಾಯಿಗಲ್​ ಕಚ್ಚಿ ಪಕ್ಷದ ಎಂ.ಸಿ.ಹಲ್ಲಿವೇಣು 521 ಮತ ಪಡೆದರು. ಪಕ್ಷೇತರ ಅಭ್ಯರ್ಥಿಗಳಾದ ಎನ್​.ಕೃಷ್ಣಯ್ಯ 443, ಎಸ್​.ಎನ್​.ನಾರಾಯಣಸ್ವಾಮಿ 1,985, ಎಂಎಸ್​.ಬದ್ರಿನಾರಾಯಣ 1,116, ಎಂ.ಮುನಿಗಂಗಪ್ಪ 604, ಆರ್​.ರಾಜೇಂದ್ರ 751, ಆರ್​.ರಂಜಿತ್​ ಕುಮಾರ್​ 2,118, ಡಾ.ಎಂ.ವೆಂಕಟಸ್ವಾಮಿ 3354, ಹೋಳೂರು ಶ್ರೀನಿವಾಸ 6,163 ಹಾಗೂ ಎಚ್​.ಎನ್​.ಸುಮನ್​ 6,487 ಮತ ಪಡೆದುಕೊಂಡಿದ್ದಾರೆ.

• ಮೈತ್ರಿ ಅಭ್ಯರ್ಥಿಯ ಗೆಲುವಿಗೆ ಕಾರಣಗಳು
  ಬಿಜೆಪಿ&ಜೆಡಿಎಸ್​ ಮೈತ್ರಿ
  ನರೇಂದ್ರ ಮೋದಿ ಹವಾ
  ಬಂಗಾರಪೇಟೆ ಕ್ಷೇತ್ರದಿಂದ ಎರಡು ಬಾರಿ ಸೋತಿದ್ದ ಅನುಕಂಪ
  ಉಭಯ ಪಕ್ಷಗಳ ನಾಯಕರ ಪ್ರಚಾರದ ಲಾಭ
  ಸ್ಥಳಿಯ ವ್ಯಕ್ತಿ ಹಾಗೂ ಸಮುದಾಯದ ಬೆಂಬಲ
• ಸೋಲಿಗೆ ಕಾರಣಗಳೇನು?
  ತಡವಾಗಿ ಅಭ್ಯರ್ಥಿ ಘೋಷಣೆ
  ಸಚಿವ ಕೆ.ಎಚ್​.ಮುನಿಯಪ್ಪ ಅವರನ್ನು ಕಡೆಗಣಿಸಿದ್ದು
  ಕ್ಷೇತ್ರದಲ್ಲಿ ಪರಿಚಯ ಇಲ್ಲದಿರುವುದು.
  ಮಾಜಿ ಸಚಿವ ಕೆ.ಆರ್​.ರಮೇಶ್​ ಕುಮಾರ್​ ಒಕ್ಕಲಿಗ ಸಮುದಾಯದ ವಿರುದ್ಧ ಹೇಳಿಕೆ ನೀಡಿದ್ದು.
  ಪಕ್ಷದ ಕಾರ್ಯಕರ್ತರು, ಮುಖಂಡರ ನಡುವಿನ ಗುಂಪುಗಾರಿಕೆ
• ಫಲಿತಾಂಶ ವಿವರ-2024
  ಗೆದ್ದ ಅಭ್ಯರ್ಥಿ: ಎಂ.ಮಲ್ಲೇಶ್​ಬಾಬು
  ಪ: ಜೆಡಿಎಸ್​
  ಪಡೆದ ಮತ: 6,91,481
  ಸಮೀಪದ ಎದುರಾಳಿ: ಕೆ.ವಿ.ಗೌತಮ್​
  ಪಕ್ಷ: ಕಾಂಗ್ರೆಸ್​
  ಪಡೆದ ಮತ: 6,20,093
  ಗೆಲುವಿನ ಅಂತರ: 71,388
  ನೋಟಾ ಮತಗಳು: 5,831