ಲಡಾಖ್ ಭಾಗದಲ್ಲಿ ಚೀನಾ ಅಪ್ರಚೋದಿತ ದಾಳಿ ನಡೆಸಿ, ಇದರಲ್ಲಿ 20 ಭಾರತೀಯ ಯೋಧರು ಹುತಾತ್ಮರಾದ ಘಟನೆ ಬಳಿಕ ದೇಶಾದ್ಯಂತ ಚೀನಾದ ವಿರುದ್ಧ ಆಕ್ರೋಶ ಭುಗಿಲೆದ್ದಿದೆ. ಚೀನಿ ಸೈನಿಕರನ್ನು ಗಡಿಯಲ್ಲಿ ನಮ್ಮ ಯೋಧರು ಮಣಿಸಿದರೆ, ಜನಸಾಮಾನ್ಯರು ಆರ್ಥಿಕ ಯುದ್ಧದ ಮೂಲಕ ಡ್ರಾ್ಯಗನ್ ರಾಷ್ಟ್ರಕ್ಕೆ ಪಾಠ ಕಲಿಸಬೇಕು ಎಂಬ ಕೂಗು ಜೋರಾಗಿದೆ. ಕಳೆದ ಮೂರ್ನಾಲ್ಕು ವರ್ಷಗಳಿಂದ ಚೀನಾ ಉತ್ಪನ್ನಗಳನ್ನು ನಿಷೇಧಿಸಬೇಕೆಂಬ ಆಗ್ರಹ ಕೇಳಿಬಂದಿತ್ತಾದರೂ, ಈ ಬಾರಿ ಇದು ಜನಾಂದೋಲನದ ಸ್ವರೂಪ ಪಡೆದುಕೊಳ್ಳುತ್ತಿರುವುದು ವಿಶೇಷ. ಅಲ್ಲದೆ, ಕರೊನಾ ಸೋಂಕು ಚೀನಾದಿಂದಲೇ ಆರಂಭವಾದ ಕಾರಣ ಜಾಗತಿಕ ಸಮುದಾಯ ಆ ರಾಷ್ಟ್ರದ ವಿರುದ್ಧ ತೀವ್ರ ಅಸಮಾಧಾನಗೊಂಡಿದೆ. ಅದರಲ್ಲೂ, ಚೀನಾದಲ್ಲಿ ಹೂಡಿಕೆ ಮಾಡಿರುವ ಕಂಪನಿಗಳು ಅಲ್ಲಿಂದ ಕಾಲು ಕೀಳಲು ತುದಿಗಾಲಿನಲ್ಲಿ ನಿಂತಿದ್ದು, ಹೂಡಿಕೆಸ್ನೇಹಿ ದೇಶಗಳತ್ತ ಚಿತ್ತ ಹರಿಸಿವೆ. ‘ಕರೊನಾ ಸಂಕಷ್ಟವನ್ನೇ ಅವಕಾಶವನ್ನಾಗಿ ಪರಿವರ್ತಿಸೋಣ’ ಎಂದು ದೇಶಕ್ಕೆ ಕರೆನೀಡಿರುವ ಪ್ರಧಾನಿ ನರೇಂದ್ರ ಮೋದಿ ಆತ್ಮನಿರ್ಭರತೆಯ ಮಂತ್ರವನ್ನೂ ನೀಡಿದ್ದಾರೆ. ಒಂದೆಡೆ, ಕೇಂದ್ರ ಸರ್ಕಾರವು ಚೀನಾದಿಂದ ಹೊರಬರುತ್ತಿರುವ ಕಂಪನಿಗಳನ್ನು ಭಾರತಕ್ಕೆ ಕರೆತರಲು ಆಸಕ್ತಿ ತೋರಿದ್ದರೆ, ಮತ್ತೊಂದೆಡೆ, ರಾಜ್ಯಗಳ ಮಟ್ಟಿಗೆ ಕರ್ನಾಟಕವೂ ಈ ವಿಷಯದಲ್ಲಿ ಹಿಂದೆ ಬಿದ್ದಿಲ್ಲ. ಮಾಹಿತಿ ಮತ್ತು ಜೈವಿಕ ತಂತ್ರಜ್ಞಾನ ಕ್ಷೇತ್ರದಲ್ಲಿ ವಿಶ್ವದ ಗಮನ ಸೆಳೆದಿರುವ ಕರ್ನಾಟಕ ಈಗ ಚೀನಾದ ವಿರುದ್ಧ ಸ್ಪರ್ಧೆಗೆ ಸಿದ್ಧಗೊಳ್ಳುತ್ತಿದೆ. ಸ್ಥಳೀಯ ಉತ್ಪನ್ನಗಳನ್ನು ಉತ್ತೇಜಿಸಲೂ ಮುಂದಾಗಿದೆ.
