'ಮನೆಯ ಕಿಟಕಿ ಮುಚ್ಚಿರಲಿ...ಪಾತ್ರೆ, ಡ್ರಮ್​​ಗಳನ್ನು ಬಡಿಯಿರಿ...': ಈ ಸಲಹೆ ಯಾಕೆ ಗೊತ್ತಾ?

ಗುರ್​ಗಾಂವ್​: ಕರೊನಾ ವೈರಸ್​ ಸಂಕಷ್ಟದ ಜತೆಗೆ ಬೆಳೆ ನಾಶಕರ ಮಿಡತೆಗಳ ದಂಡು ಒಂದಾದ ಬಳಿಕ ಒಂದು ರಾಜ್ಯಕ್ಕೆ ಪ್ರವೇಶ ಮಾಡುತ್ತಿದ್ದು, ಅವುಗಳ ನಿಯಂತ್ರಣವೂ ಕಷ್ಟವಾಗುತ್ತಿದೆ.

ಪಾಕಿಸ್ತಾನದಿಂದ ಬಂದಿರುವ ಮಿಡತೆಗಳು ಉತ್ತರ ಭಾರತದ ರಾಜ್ಯಗಳ ರೈತರನ್ನು ಹೈರಾಣಾಗಿಸಿವೆ. ಆ ಕೀಟಗಳಿಂದ ಬೆಳೆ ಉಳಿಸಿಕೊಳ್ಳುವುದು ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಆಯಾ ರಾಜ್ಯ ಸರ್ಕಾರಗಳು ಆದಷ್ಟು ಮುನ್ನೆಚ್ಚರಿಕೆ ಕ್ರಮ ತೆಗೆದುಕೊಳ್ಳುತ್ತಿದೆ.

ಇದೀಗ ಮಿಡತೆಗಳ ದಂಡು ಹರಿಯಾಣಾದ ಬಳಿ ಕಾಣಿಸಿಕೊಂಡಿದ್ದು, ಅಲ್ಲಿನ ರೈತರಿಗೆ ಸರ್ಕಾರ ಮುನ್ನೆಚ್ಚರಿಕೆ ಕೊಟ್ಟಿದೆ. ಗುರ್​ಗಾಂವ್​ನಲ್ಲಿ ಕೂಡ ಸ್ಥಳೀಯ ಆಡಳಿತ ರೈತರನ್ನು ಎಚ್ಚರಿಸಿದೆ. ಮನೆಯ ಕಿಟಕಿಗಳನ್ನು ಸಾಧ್ಯವಾದಷ್ಟು ಮುಚ್ಚಿಕೊಂಡೇ ಇರಿ. ಪಾತ್ರೆ, ಡ್ರಮ್​​ಗಳನ್ನು ಬಡಿಯುವ ಮೂಲಕ ದೊಡ್ಡದಾಗಿ ಶಬ್ದ ಮಾಡಿ ಎಂದು ಸಲಹೆ ನೀಡಿದೆ.

ಮಿಡತೆಗಳ ಸಮೂಹ ಮಹೇಂದ್ರಗಢ್​ ಜಿಲ್ಲೆಯನ್ನು ಪ್ರವೇಶಿಸಿದೆ. ಇನ್ನೇನು ರೇವಾರಿ ಗಡಿಯನ್ನು ತಲುಪಲಿದೆ. ರೈತರು ಮುನ್ನೆಚ್ಚರಿಕೆ ಕ್ರಮಗಳನ್ನು ತೆಗೆದುಕೊಳ್ಳಬೇಕು. ಮನೆಯ ಕಿಟಕಿಗಳನ್ನು ತೆರೆದಿಡಬಾರದು. ಹಾಗೇ ಪಾತ್ರೆಗಳು, ಡ್ರಮ್​ಗಳನ್ನು ದೊಡ್ಡದಾಗಿ ಬಡಿಯುತ್ತಿರಬೇಕು. ದೊಡ್ಡದಾಗಿ ಸದ್ದು ಮಾಡುತ್ತಿದ್ದರೆ ಕೀಟಗಳು ಒಂದು ಕಡೆ ಉಳಿಯುವುದಿಲ್ಲ. ಅವು ಹಾರಿ ಮುಂದೆ ಹೋಗುತ್ತವೆ ಎಂದು ಗುರ್​ಗಾಂವ್​ ಆಡಳಿತ ತಿಳಿಸಿದೆ.

ಹಾಗೇ ರೈತರು ಕೀಟನಾಶಕ ಸಿಂಪಡಣಾ ಪಂಪ್​​ಗಳನ್ನು ಸಿದ್ಧವಾಗಿಟ್ಟುಕೊಳ್ಳಿ. ಯಾವಾಗ ಅಗತ್ಯಬಿದ್ದರೂ ಅದನ್ನು ಉಪಯೋಗಿಸಿ. ಬೆಳೆ ರಕ್ಷಣೆ ಆದ್ಯತೆಯಾಗಲಿ ಎಂದು ಹೇಳಿದೆ. ಇದನ್ನೂ ಓದಿ: ಇನ್​ಸ್ಟಾಗ್ರಾಂ ಮಿತ್ರನಿಗಾಗಿ ಮನೆ ಬಿಟ್ಟ ಬಾಲಕಿ: ಬಲೆಗೆ ಬೀಳುವಷ್ಟರಲ್ಲಿ ಬಚಾವ್​ ಆಗಿದ್ಹೇಗೆ?

ಅಷ್ಟೇ ಅಲ್ಲ, ರೈತರಿಗೆ ಮಿಡತೆಗಳ ದಾಳಿ ಬಗ್ಗೆ ಸರಿಯಾದ ಅರಿವು ಮೂಡಿಸುವಂತೆ ಕೃಷಿ ಇಲಾಖೆ ಅಧಿಕಾರಿಗಳಿಗೆ ತಿಳಿಸಿದೆ. ಮಿಡತೆಗಳು ಈಗಾಗಲೇ ಮಹಾರಾಷ್ಟ್ರ, ಉತ್ತರ ಪ್ರದೇಶ, ಪಂಜಾಬ್, ರಾಜಸ್ಥಾನ, ಗುಜರಾತ್​, ಮಧ್ಯಪ್ರದೇಶಗಳಲ್ಲಿ ಬೆಳೆ ನಾಶ ಮಾಡಿವೆ.

ಮಿಡತೆ ದಾಳಿ ಬಗ್ಗೆ ಮುನ್ನೆಚ್ಚರಿಕೆ ವಹಿಸಿ, ಅಗತ್ಯ ಕ್ರಮಗಳನ್ನು ಕೈಗೊಳ್ಳಲು ಕೇಂದ್ರ ಸರ್ಕಾರ ಒಟ್ಟು 11 ಕಂಟ್ರೋಲ್​ ರೂಂಗಳನ್ನು ರಚಿಸಿದೆ. (ಏಜೆನ್ಸೀಸ್​)

https://www.vijayavani.net/senior-congress-leader-abhishek-manu-singhvi-tests-positive-for-covid-19/