ಪ್ರೀತಿ ಇಲ್ಲದಿದ್ದರೆ ಜಗತ್ತು ತೊಂದರೆಗಳಿಂದ ಮುಕ್ತವಾಗಿರುತ್ತಿತ್ತು! ಜಗತ್ತಿನಲ್ಲಿ ಎಲ್ಲ ತೊಂದರೆಗಳು ಪ್ರೀತಿಯಿಂದಲೇ ಶುರು ವಾಗುವುದು, ಅಂತೆಯೇ ಖುಷಿ, ಸಂತೋಷ ಮತ್ತು ಜೀವನದ ನಮ್ಮ ಉದ್ದೇಶ ಸಹ ಪ್ರೀತಿಯಿಂದಲೇ ಶುರು ವಾಗುವುದು. ಪ್ರೀತಿ ಇಲ್ಲದಿದ್ದರೆ ಯಾವುದರ ಬಗ್ಗೆಯೂ ಹೊಟ್ಟೆಕಿಚ್ಚು ಉಂಟಾಗಲು ಸಾಧ್ಯವಿಲ್ಲ. ಹೊಟ್ಟೆಕಿಚ್ಚಿಗೆ ಪ್ರೀತಿಯೇ ಕಾರಣವಾಗಿದೆ. ನಮಗೆ ದುರಾಸೆ ಕೂಡ ಪ್ರೀತಿಯಿಂದಲೇ ಬರುವುದು, ಒಂದು ವಸ್ತುವಿನ ಮೇಲೆ ಅತಿಯಾದ ಪ್ರೀತಿ ಇದ್ದಾಗ ಮಾತ್ರ ಅದರ ಮೇಲೆ ನಮಗೆ ದುರಾಸೆ ಮೂಡುವುದು. ನಾವು ಯಾವುದರಲ್ಲಾದರು ಪರಿಪೂರ್ಣತೆಯನ್ನು ಬಯಸಿ ಮತ್ತು ಅದರಲ್ಲಿ ಏನಾದರೂ ಅಪೂರ್ಣ ಕಂಡುಬಂದರೆ ತಕ್ಷಣ ನಮಗೆ ಕೋಪ ಬರುತ್ತದೆ. ಅಂದರೆ ಪರಿಪೂರ್ಣತೆಯ ಮೇಲಿನ ಪ್ರೀತಿ, ಕೋಪಕ್ಕೆ ದಾರಿ ಮಾಡಿಕೊಡುತ್ತದೆ. ನಮ್ಮ ಬಗ್ಗೆಯೇ ನಮಗೆ ಅತಿಯಾದ ಪ್ರೀತಿ ಇರುವುದರಿಂದ, ನಾವು ಪ್ರತಿಷ್ಠೆ ಹಾಗು ದುರಹಂಕಾರಕ್ಕೆ ಒಳಗಾಗುತ್ತೇವೆ. ಹೌದಲ್ಲವೇ? ಪ್ರೀತಿಯು ಈ ರೀತಿ ವಿಕೃತವಾಗಿ, ನಮಗೂ ತೊಂದರೆ ಕೊಡುತ್ತದೆ ಹಾಗೂ ಇತರರಿಗೂ ತೊಂದರೆಯನ್ನು ಉಂಟುಮಾಡುತ್ತದೆ. ಪ್ರೀತಿಯಲ್ಲಿ ಇಷ್ಟೆಲ್ಲ ದೋಷಗಳಿದ್ದರೂ, ಪ್ರೀತಿ ಇಲ್ಲದೆ ಜೀವನ ಸಾಧ್ಯವೇ ಇಲ್ಲ. ನಿಮ್ಮನ್ನು ಯಾರೂ ಪ್ರೀತಿಸುತ್ತಿಲ್ಲ ಮತ್ತು ನೀವು ಯಾರನ್ನೂ ಪ್ರೀತಿಸುವುದಿಲ್ಲ ಎಂಬುದನ್ನು ಕಲ್ಪಿಸಿಕೊಳ್ಳಿ. ಆಗ ಜೀವನಕ್ಕೆ ಏನಾದರೂ ಅರ್ಥವಿದೆಯೇ? ಜೀವನದಲ್ಲಿ ನಿರಾಸೆ, ನಿರುತ್ಸಾಹ ಮತ್ತು ಖಿನ್ನತೆಗಳು ಮನೆ ಮಾಡುತ್ತವೆ. ಹಾಗಾದರೆ, ನಾವು ಹೇಗೆ ಸಹಜವಾದ ಮತ್ತು ಯಾವುದೇ ವಿಕಲ್ಪಗಳಿಲ್ಲದ ಪ್ರೀತಿಯನ್ನು ಪಡೆದುಕೊಳ್ಳಬಹುದು? ನಾವು ನಮ್ಮ ಬಗ್ಗೆ ಅರಿತುಕೊಂಡಾಗ, ನಮ್ಮ ಮನಸ್ಸು ಮತ್ತು ಚೈತನ್ಯಗಳ ಬಗ್ಗೆ ತಿಳಿದುಕೊಂಡಾಗ ಹಾಗೂ ಪ್ರೀತಿಯು ವಿಕೃತಗೊಳ್ಳಲು ಮೂಲ ಕಾರಣವೇನು ಎಂದು ಅರಿತುಕೊಂಡಾಗ. ಆಗ ಇದರಿಂದ ಹೊರಬರಲು ಸಹಾಯವಾಗುತ್ತದೆ. ನಾವು ಒತ್ತಡಗೊಂಡು ನಮಗೆ ಆಯಾಸವಾದಾಗ, ನಮ್ಮ ಪ್ರತಿಭೆ ಅಥವಾ ಗುಣಗಳಿಂದ ದೂರವಾಗುತ್ತೇವೆ. ಪ್ರತಿಯೊಬ್ಬರಲ್ಲೂ ಎಲ್ಲ ರೀತಿಯ ಸದ್ಗುಣಗಳೂ ಅಡಗಿರುತ್ತವೆ. ಸರಿಯಾದ ತಿಳಿವಳಿಕೆ ಇಲ್ಲದೆ ಅವೆಲ್ಲಾ ಮರೆಯಾಗಿರುತ್ತದೆ. ಮರೆಮಾಚಿರುವ ಈ ಸದ್ಗುಣಗಳನ್ನು ಮರೆಯಿಂದ ಹೊರ ತರಬೇಕಿದೆ ಅಷ್ಟೇ.
