ಅನೇಕ ಬಾರಿ ಸಾಕಷ್ಟು ಪ್ರಯತ್ನ ಮಾಡಿದರೂ ಅಂದುಕೊಂಡ ಕೆಲಸ ಆಗದೇ ಇದ್ದಾಗ ಕೊನೆಗೆ ಇದಾಗುವ ಕೆಲಸವಲ್ಲ ಎಂದು ಕೈ ಚೆಲ್ಲಿ ಬಿಡುವುದುಂಟು. ಉದ್ಯೋಗ ಅರಸುವಿಕೆ, ಮನೆ ಕಟ್ಟುವುದು, ವಧು-ವರಾನ್ವೇಷಣೆ, ಹೊಸ ಉದ್ಯಮ ಪ್ರಾರಂಭ ಇಂತಹವುಗಳನ್ನೆಲ್ಲ ಕೈಗೊಳ್ಳುವಾಗ ಆರಂಭದಲ್ಲಿರುವ ಉತ್ಸಾಹ, ಹುರುಪು ಬರ ಬರುತ್ತ ಕಡಿಮೆಯಾಗುತ್ತದೆ. ಅದಕ್ಕೆ ತಕ್ಕನಾಗಿ ಆತ್ಮೀಯರೋ, ಬಂಧುಗಳೋ ನಕಾರಾತ್ಮಕವಾಗಿ, ‘ನಿನಗೆ ಯಾರು ಹೆಣ್ಣು ಕೊಡುತ್ತಾರೆ ಮಾರಾಯಾ’, ‘ನಿನಗೆ ಯಾಕೆ ಈ ಹೊಸ ವ್ಯಾಪಾರ ಮಾಡುವ ಉಸಾಬರಿ’, ‘ನಿನ್ನ ಕೈಯಲ್ಲಿ ಆಗದು, ಸುಮ್ಮನೆ ಇದ್ದ ಹಣವನ್ನೂ ಹಾಳು ಮಾಡಬೇಡ’ ಎಂದೆಲ್ಲ ಮಾತನಾಡಿದರಂತೂ ಧೈರ್ಯ ಮತ್ತಷ್ಟು ಕುಗ್ಗಿ ಹೋಗಿ ಅಯ್ಯೋ ಇದರ ಉಸಾಬರಿ ಬೇಡವೆಂಬ ಭಾವನೆ ಮೂಡುತ್ತದೆ. ಆದರೆ ಇನ್ನು ಕೆಲವರು ಸತತ ಪ್ರಯತ್ನ, ಶ್ರಮ ವಹಿಸಿ ಅಂದುಕೊಂಡ ಕೆಲಸವನ್ನು ಮಾಡಿ ಮುಗಿಸುತ್ತಾರೆ. ಅದು ಅವರ ಶ್ರಮ, ಕಾರ್ಯದಲ್ಲಿನ ಬದ್ಧತೆಗೆ ದೊರಕಿದ ಪ್ರತಿಫಲವೂ ಆಗಿರಬಹುದು, ಜೊತೆಗೆ ಅದೃಷ್ಟವೂ ಇದ್ದಿರಬಹುದು. ಆದರೆ ಎಂದಿಗೂ ಅದೃಷ್ಟವನ್ನು ಬಯಸಿ ಕೂರುವುದು ಖಂಡಿತ ತಪ್ಪು. ಯಾಕೆಂದರೆ ಅದೃಷ್ಟ ಯಾವಾಗ ಬೇಕಾದರೂ ಕೈ ಕೊಡಬಹುದು, ಶ್ರಮ ಎಂದಿಗೂ ಕೈ ಕೊಡದು.
