ಒಂದೆಡೆ ಹೋಮ್ ಸಿಕ್ನೆಸ್. ಮತ್ತೊಂದೆಡೆ, ಈ ಮಕ್ಕಳ ಮೇಲೆ ಪಾಲಕರ ನಿರೀಕ್ಷೆಯ ಭಾರ. ಜೊತೆಗೆ, ತರಬೇತಿ ಕೇಂದ್ರಗಳ ಪಾಠ-ಪ್ರವಚನದ ಶೆಡ್ಯೂಲ್ಗಳು ಸಿಕ್ಕಾಪಟ್ಟೆ ಬಿಗಿಯಾಗಿರುತ್ತವೆ. ಒಂದೆರಡು ಗಂಟೆಗಳನ್ನೂ ರಿಲ್ಯಾಕ್ಸ್ ಆಗಿ ಕಳೆಯುವ ಸ್ಥಿತಿ ಇರುವುದಿಲ್ಲ. ಇನ್ನಷ್ಟು, ಮತ್ತಷ್ಟು ಚೆನ್ನಾಗಿ ಓದಬೇಕು, ಇತರ ವಿದ್ಯಾರ್ಥಿಗಳಿಗಿಂತಲೂ ಹೆಚ್ಚಿನ ಸಾಧನೆ ಮಾಡಬೇಕು ಎಂಬ ಒತ್ತಡ ನಿರಂತರವಾಗಿರುತ್ತದೆ. ಈ ಮನಸ್ಥಿತಿಯನ್ನು ಯಶಸ್ವಿಯಾಗಿ ನಿರ್ವಹಿಸುವವರು ಕೆಲವರಾದರೆ, ಸೋತು ಆತ್ಮಹತ್ಯೆಗೆ ಶರಣಾಗುವವರು ಕೆಲವರು. ಇದೊಂದು ಗಂಭೀರ ಸಮಸ್ಯೆ. ಈ ಸಮಸ್ಯೆಯ ಬಗ್ಗೆ ಸ್ಥಳೀಯ ಕೋಚಿಂಗ್ ಸೆಂಟರ್ಗಳು ಕಣ್ಮುಚ್ಚಿ ಕುಳಿತಿವೆ ಎಂದೇನೂ ಅಲ್ಲ. ಮಕ್ಕಳಲ್ಲಿ ಧೈರ್ಯ ತುಂಬುವ ಕಾರ್ಯಕ್ರಮಗಳನ್ನು ಅವು ಮಾಡಿವೆ. ಆದರೆ ಅದರ ಪ್ರಮಾಣ ಸಾಲದು. ರಾಜಸ್ಥಾನ ಸರ್ಕಾರ ಮತ್ತು ಕೇಂದ್ರ ಸರ್ಕಾರ ಒಟ್ಟಿಗೇ ಸೇರಿ ಈ ಸಮಸ್ಯೆಯ ಮೂಲವನ್ನು ಅರಿತು, ಇದಕ್ಕೊಂದು ಪರಿಹಾರವನ್ನು ತುರ್ತಾಗಿ ಕಂಡುಹಿಡಿಯುವ ಅವಶ್ಯಕತೆ ಇದೆ.
