ಮಂದಿರಗಳು ಶ್ರದ್ಧೆಯನ್ನು ಅರಳಿಸುವ, ನೈತಿಕತೆಯನ್ನು ಬಿತ್ತುವ ಕೇಂದ್ರಗಳು. ದೇವಸ್ಥಾನಗಳ ಪಾವಿತ್ರ್ಯ ಕಾಪಾಡುವ ಜತೆಗೆ, ಅಲ್ಲಿನ ಸಾತ್ವಿಕ ವಾತಾವರಣವನ್ನು ಹೆಚ್ಚಿಸುವುದು ಪ್ರತಿಯೊಬ್ಬರ ಕರ್ತವ್ಯ. ಆದರೆ, ಆಧುನಿಕತೆಯ ಹೆಸರಿನಲ್ಲಿ ದೇವಸ್ಥಾನಗಳಿಗೂ ಹೇಗೇಗೋ ಹೋಗುವ ಪ್ರವೃತ್ತಿ ಹೆಚ್ಚುತ್ತಿದ್ದು, ಇದು ಅಶಿಸ್ತಿಗೆ ದಾರಿಯಾಗುತ್ತಿದೆ. ಇದನ್ನು ಗಮನಿಸಿಯೇ, ದೇಶದ ಅನೇಕ ದೇವಾಲಯ, ಗುರುದ್ವಾರ, ಚರ್ಚ್ ಹಾಗೂ ಇತರ ಪ್ರಾರ್ಥನಾ ಸ್ಥಳಗಳಲ್ಲಿ ವಸ್ತ್ರಸಂಹಿತೆ ಜಾರಿಯಾಗಿದೆ. ಉಜ್ಜೈನಿಯ ಮಹಾಕಾಲೇಶ್ವರ, ವಾರಾಣಸಿ ಕಾಶಿ ವಿಶ್ವೇಶ್ವರ, ತಿರುಪತಿಯ ಶ್ರೀವೆಂಕಟೇಶ್ವರ, ಕೇರಳದ ಶ್ರೀಪದ್ಮನಾಭಸ್ವಾಮಿ ದೇಗುಲ ಸೇರಿ ಹಲವೆಡೆ ಸಾತ್ವಿಕ ವಸ್ತ್ರಸಂಹಿತೆ ಜಾರಿಯಾಗಿದೆ. ಇದೇ ಮಾದರಿಯಲ್ಲಿ ರಾಜ್ಯದ 500ಕ್ಕೂ ಅಧಿಕ ದೇವಸ್ಥಾನಗಳಲ್ಲಿ ಭಾರತೀಯ ಸಂಸ್ಕೃತಿಯ ಪ್ರಕಾರ ವಸ್ತ್ರಸಂಹಿತೆ ಜಾರಿಗೊಳಿಸುವ ನಿರ್ಣಯವನ್ನು ಕರ್ನಾಟಕ ದೇವಸ್ಥಾನ-ಮಠ ಮತ್ತು ಧಾರ್ವಿುಕ ಸಂಸ್ಥೆಗಳ ಮಹಾಸಂಘ ಕೈಗೊಂಡಿದ್ದು, ಈ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸಲು ಮುಂದಾಗಿರುವುದು ಸಂಸ್ಕಾರವರ್ಧನೆ, ಶಿಸ್ತುಪಾಲನೆ ನಿಟ್ಟಿನಲ್ಲಿ ಸಕಾರಾತ್ಮಕ ಹೆಜ್ಜೆ.
