ಬೆಂಗಳೂರು ಅವಕಾಶಗಳ ಆಗರ ಎಂಬುದನ್ನು ಅಲ್ಲಗಳೆಯುವಂತಿಲ್ಲವಾದರೂ, ಯಾವುದೇ ನಗರಕ್ಕೂ ತನ್ನದೇ ಆದ ಧಾರಣಾ ಸಾಮರ್ಥ್ಯ ಇರುತ್ತದೆ. ಈ ಸಾಮರ್ಥ್ಯ ಮೀರಿದರೆ ನಗರವು ತನ್ನ ಮೂಲಸ್ವರೂಪ ಕಳೆದುಕೊಂಡು, ಸಮಸ್ಯೆಗಳ ಸುಳಿಯಲ್ಲಿ ಸಿಲುಕುತ್ತದೆ ಅಷ್ಟೇ. ಬೆಂಗಳೂರು ಸಾಗುತ್ತಿರುವ ದಿಕ್ಕನ್ನು ಗಮನಿಸಿದರೆ ಹಲವು ಸಮಸ್ಯೆಗಳು ಸ್ಪಷ್ಟಗೋಚರ. ಹಾಗಾಗಿ, ಆಳುಗರು ಅಭಿವೃದ್ಧಿಯ ದಿಕ್ಕನ್ನೇ ಕೊಂಚ ಬದಲಿಸುವ ಅಗತ್ಯವಿದೆ. ಅಂದರೆ, ಎರಡನೇ, ಮೂರನೇ ಹಂತದ ನಗರಗಳು ಅಭಿವೃದ್ಧಿ ಸಾಧಿಸುವ ನಿಟ್ಟಿನಲ್ಲಿ ಹಲವು ಅವಕಾಶಗಳನ್ನು ಹೊಂದಿದ್ದು, ಅತ್ತ ಗಮನ ಹರಿಸಬೇಕಾಗಿದೆ. ಕೈಗಾರಿಕೆಗಳು, ಇತರ ಕಾರ್ಯಕ್ರಮಗಳು ಇಂಥ ನಗರಗಳಲ್ಲಿ ಸ್ಥಾಪಿತವಾದರೆ, ಬೆಂಗಳೂರು ಮೇಲಿನ ಅತಿ ಅವಲಂಬನೆಯೂ ತಪು್ಪತ್ತದೆ. ಇತರ ನಗರಗಳು ಅಭಿವೃದ್ಧಿಯ ಬೆಳಕು ಕಾಣುವಂತಾಗಿ, ಜನರಿಗೂ ಅನುಕೂಲವಾಗುತ್ತದೆ. ಇಂಥ ನೀತಿಯತ್ತ ಆಳುಗರು ಗಮನ ಹರಿಸಲಿ.
