ಡೊನಾಲ್ಡ್ ಟ್ರಂಪ್ ಎರಡನೇ ಅವಧಿಗೆ ಅಧ್ಯಕ್ಷರಾಗುತ್ತಿದ್ದಂತೆ ತೆಗೆದುಕೊಂಡ ಕಠಿಣ ನಿರ್ಧಾರಗಳು, ಡಿಢೀರನೆ ಅನುಸರಿಸಿದ ನಿಲುವುಗಳ ಪರಿಣಾಮ ಒಂದಿಷ್ಟು ಗೊಂದಲ ಏರ್ಪಟ್ಟಿದೆ ಎಂಬುದು ವಾಸ್ತವ. ಮುಖ್ಯವಾಗಿ, ಅಮೆರಿಕಕ್ಕೆ ಬರುವ ಸರಕುಗಳ ಮೇಲೆ ಪರಸ್ಪರ ತೆರಿಗೆ ಹೇರಿರುವುದು. ಭಾರತದ ಮೇಲೆ ಶೇಕಡ 26ರಷ್ಟು ಪರಸ್ಪರ ತೆರಿಗೆ ವಿಧಿಸುವ ನಿರ್ಧಾರ ಕೈಗೊಂಡಿದ್ದ ಟ್ರಂಪ್, ಅದನ್ನು ಜುಲೈವರೆಗೆ ಮುಂದೂಡಿದ್ದಾರೆ. ಆದರೂ, ಈ ಬಗೆಯ ಅನಿಶ್ಚಿತತೆ ದೀರ್ಘಕಾಲ ಮುಂದುವರಿಯುವುದು ಸೂಕ್ತವಲ್ಲ. ಭಾರತ-ಅಮೆರಿಕ ನಡುವೆ ಮೈತ್ರಿ ಗಾಢವಾಗಿದೆ. ಹೀಗಾಗಿ, ಈ ವಿವಾದವನ್ನು ಮಾತುಕತೆಯ ಮೂಲಕ ಬಗೆಹರಿಸಿಕೊಳ್ಳುವ ವಿಶ್ವಾಸ ಕೇಂದ್ರ ಸರ್ಕಾರದ್ದು. ಈ ನಿಟ್ಟಿನಲ್ಲಿ ಮಾತುಕತೆ ಈಗಾಗಲೇ ಆರಂಭಗೊಂಡಿದ್ದು, ‘ವ್ಯಾಪಾರ ಸಮರ’ದ ಬಿಸಿ ಭಾರತಕ್ಕೆ ತಟ್ಟದಂತೆ ನಿಗಾ ವಹಿಸಲಾಗಿದೆ. ಆದರೆ, ಟ್ರಂಪ್ ಮತ್ತೆ ಪರಸ್ಪರ ತೆರಿಗೆಯನ್ನು ಮುಂದುವರಿಸುವ ನಿರ್ಧಾರ ಕೈಗೊಂಡರೆ ನಷ್ಟ ತಪ್ಪಿದ್ದಲ್ಲ ಎಂಬ ಆತಂಕ ಕಾಡುತ್ತಿದೆ.
