ಅದೇನಿದ್ದರೂ, ಟ್ರಂಪ್ ನಿರ್ಧಾರದಿಂದ ಅಮೆರಿಕ ಮಾತ್ರವಲ್ಲ ಇತರ ದೇಶಗಳೂ ನಲುಗುವಂತೆ ಆಗಿದೆ. ಈ ಮಧ್ಯೆ ಅಮೆರಿಕಕ್ಕೆ ಸೆಡ್ಡು ಹೊಡೆದಿರುವ ಚೀನಾ ಪ್ರತೀಕಾರದ ಕ್ರಮವಾಗಿ ಶೇ.34ರಷ್ಟು ತೆರಿಗೆ ಘೋಷಿಸಿದೆ. ಟ್ರಂಪ್ ಹೇರಿರುವ ಪಾರಸ್ಪರಿಕ ತೆರಿಗೆಯಿಂದ ಭಾರತದಲ್ಲೂ ಕಂಪನ ಸೃಷ್ಟಿಯಾಗಿದೆ. ಭಾರತವು ಬಟ್ಟೆ, ಔಷಧ, ವಾಹನದ ಬಿಡಿಭಾಗಗಳು ಸೇರಿದಂತೆ ವಿವಿಧ ಉತ್ಪನ್ನಗಳನ್ನು ಅಮೆರಿಕಕ್ಕೆ ರಫ್ತು ಮಾಡುತ್ತದೆ. ಆದರೆ, ಟ್ರಂಪ್ ಈಗ ಶೇಕಡ 26ರಷ್ಟು ಪಾರಸ್ಪರಿಕ ತೆರಿಗೆ ವಿಧಿಸಿರುವುದರಿಂದ ಈ ಉತ್ಪನ್ನಗಳ ಬೆಲೆ ಅಮೆರಿಕದಲ್ಲಿ ಇನ್ನಷ್ಟು ಹೆಚ್ಚಾಗಲಿದೆ. ಆದ್ದರಿಂದ ಅಮೆರಿಕದ ಗ್ರಾಹಕರು ಬೇರೆ ಆಯ್ಕೆಗಳ ಕಡೆ ಮುಖ ಮಾಡಬಹುದು. ಇಂಥ ಸ್ಥಿತಿಯಲ್ಲಿ ಭಾರತವು ಕ್ಷಿಪ್ರವಾಗಿ ಸೂಕ್ತ ಆರ್ಥಿಕ ಸುಧಾರಣಾ ಕ್ರಮಗಳನ್ನು ಕೈಗೊಳ್ಳಬೇಕಿದೆ. ಅಲ್ಲದೆ, ಇತರ ದೇಶಗಳಿಗೆ ಹೋಲಿಸಿದರೆ ಭಾರತದ ಮೇಲೆ ಟ್ರಂಪ್ ತೆರಿಗೆ ತುಂಬ ಅಡ್ಡ ಪರಿಣಾಮವನ್ನು ಉಂಟು ಮಾಡುವುದಿಲ್ಲ.
