ಜಾಗತಿಕ ಮಟ್ಟದ ಬ್ಯಾಂಕುಗಳಿಗೆ ಭಾರತೀಯ ಬ್ಯಾಂಕುಗಳು ಸ್ಪರ್ಧೆ ಒಡ್ಡುತ್ತಿಲ್ಲವೆಂಬುದು ವಾಸ್ತವವೇ. ವಿದೇಶಿ ಬ್ಯಾಂಕುಗಳಿಗೆ ಹೋಲಿಸಿದರೆ ನಮ್ಮ ಬ್ಯಾಂಕುಗಳ ಶೇರು ಬಂಡವಾಳ ತುಂಬ ಕಡಿಮೆ. ಬ್ಯಾಂಕುಗಳನ್ನು ವಿಲೀನ ಮಾಡಿ ಅಂತಾರಾಷ್ಟ್ರೀಯ ಮಟ್ಟದ ಮತ್ತು ಶೇರು ಬಂಡವಾಳ ಸಾಮರ್ಥ್ಯ ಇರುವ ಬ್ಯಾಂಕುಗಳ ಸ್ಥಾಪನೆಗೆ ಕೇಂದ್ರ ಮುಂದಾಗಿರುವುದು ಇದೇ ಕಾರಣಕ್ಕೆ. ಆರ್ಥಿಕ-ಸಾಮಾಜಿಕ ಸಮೀಕರಣಗಳು ಬದಲಾಗಿರುವುದಲ್ಲದೆ, ಹಲವು ಬ್ಯಾಂಕುಗಳು ಆರ್ಥಿಕ ಸಂಕಷ್ಟದಲ್ಲಿರುವುದು, ಅವುಗಳ ಅನುತ್ಪಾದಕ ಆಸ್ತಿ(ಎನ್ಪಿಎ) ಹೆಚ್ಚುತ್ತಿರುವುದು ಕಹಿಸತ್ಯ. ಆದ್ದರಿಂದ, ಬ್ಯಾಂಕುಗಳನ್ನು ಸದೃಢಗೊಳಿಸುವುದು, ಜನಸಾಮಾನ್ಯ ಗ್ರಾಹಕರ ವಿಶ್ವಾಸವನ್ನು ವೃದ್ಧಿಸುವುದು, ಶೇರು ಬಂಡವಾಳ ಹೆಚ್ಚಿಸುವುದು, ಸೇವೆ ಗುಣಮಟ್ಟವನ್ನು ಅಂತಾರಾಷ್ಟ್ರೀಯ ದರ್ಜೆಗೆ ಏರಿಸುವುದು, ಆರೋಗ್ಯಕರ ಸ್ಪರ್ಧೆಗೆ ಒತ್ತು ನೀಡುವುದು ಕೇಂದ್ರ ಸರ್ಕಾರದ ಆದ್ಯತೆಯಾಗಿತ್ತು. ಇದಕ್ಕೆ ಬ್ಯಾಂಕುಗಳ ವಿಲೀನವೇ ದಿವ್ಯೌಷಧ ಎಂಬುದು ವಿತ್ತ ಮಂತ್ರಿಗಳ ನಂಬಿಕೆ. ಅದರಂತೆ, ಹಲವು ಹಂತಗಳಲ್ಲಿ ವಿಲೀನ ಪ್ರಕ್ರಿಯೆ ನಡೆದಿದೆ. ಈ ಪರಿಸ್ಥಿತಿಗೆ ಹೊಂದಿಕೊಳ್ಳಲು ಸಿಬ್ಬಂದಿಗೆ ಸ್ವಲ್ಪ ಸಮಯ ಬೇಕಾಗುತ್ತದೆ ಎಂಬುದರಲ್ಲಿ ಅನುಮಾನವಿಲ್ಲ. ಆದರೆ, ಈ ಸುಧಾರಣೆಯ ಹೆಜ್ಜೆಗಳು ಬ್ಯಾಂಕಿಂಗ್ ರಂಗವನ್ನು ಬೇರುಮಟ್ಟದಿಂದ ಬಲಗೊಳಿಸಬೇಕು, ವಿತ್ತೀಯ ಸುಧಾರಣೆಗೆ, ಜನರ ವಿಶ್ವಾಸಕ್ಕೆ ಪೂರಕವಾಗಿ ಇರಬೇಕು ಎಂಬುದೇ ಆಶಯ.
