ಹುಟ್ಟುಹಬ್ಬವೇ ಇರಲಿ, ಸಿನಿಮಾ ಬಿಡುಗಡೆಯ ಸಂದರ್ಭವೇ ಇರಲಿ- ಆ ದಿನವನ್ನು ರಚನಾತ್ಮಕ ಚಟುವಟಿಕೆಗಳ ಮುಖಾಂತರ ಸ್ಮರಣೀಯವಾಗಿಸಲು ಸಾಧ್ಯವಿದೆ. ಸಮಾಜದಲ್ಲಿ ದುಃಖಿತರ, ಶೋಷಿತರ, ಬಡವರ ಸಂಖ್ಯೆ ದೊಡ್ಡಪ್ರಮಾಣದಲ್ಲಿದೆ. ಒಂದಿಷ್ಟು ಸಮಾಜಮುಖಿ ಕೆಲಸಗಳ ಮೂಲಕ ಅಂಥವರ ಮೊಗದಲ್ಲಿ ನಗು ಅರಳಿಸಿದರೆ, ಸಿಗುವ ಸಾರ್ಥಕತೆ ಅನನ್ಯ. ಅನಾಥಾಶ್ರಮ, ವೃದ್ಧಾಶ್ರಮಗಳಲ್ಲಿ ಅನ್ನದಾನ, ಬಡವಿದ್ಯಾರ್ಥಿಗಳ ವಿದ್ಯಾಭ್ಯಾಸಕ್ಕೆ ನೆರವು. ರಸ್ತೆಬದಿಯಲ್ಲಿ ವಾಸಿಸುವ ನಿರಾಶ್ರಿತರಿಗೆ ಜೀವನಾವಶ್ಯಕ ವಸ್ತುಗಳ ವಿತರಣೆ, ಬಡ ರೋಗಿಗಳಿಗೆ ಆರ್ಥಿಕ ನೆರವು, ರಕ್ತದಾನ ಶಿಬಿರ, ಆರೋಗ್ಯ ತಪಾಸಣೆ ಶಿಬಿರ ಹೀಗೆ ಎಷ್ಟೊಂದು ಮಾರ್ಗಗಳ ಮೂಲಕ ಅಭಿಮಾನದ ಸಂಭ್ರಮವನ್ನು ಆಚರಿಸಬಹುದಲ್ಲವೇ? ಈ ನಿಟ್ಟಿನಲ್ಲಿ ಅಭಿಮಾನಿಗಳ ಸಂಘಗಳು ಯೋಚಿಸುವುದಿಲ್ಲವೇಕೆ? ಕೆಲವರು ಈಗಾಗಲೇ ಇಂಥ ಮಾದರಿ ಕಾರ್ಯಗಳನ್ನು ಕೈಗೊಂಡಿದ್ದಾರೆ. ಆದರೆ, ಪ್ರಮಾಣ ಇನ್ನಷ್ಟು ಹೆಚ್ಚಬೇಕಿದೆ. ಒಳ್ಳೆಯ ಕೆಲಸಗಳ ಮೂಲಕ ಅಭಿಮಾನವನ್ನು ವ್ಯಕ್ತಪಡಿಸಿದರೆ ನಟರಿಗೆ ಅಥವಾ ಸಂಬಂಧಿತ ಗಣ್ಯರಿಗೂ ಅವರ ಅನುಯಾಯಿಗಳ ಬಗ್ಗೆ ಸಂತೋಷವಾಗುತ್ತದೆ. ಇಲ್ಲಿ ಯೋಚನೆಯ ದಿಕ್ಕು ಬದಲಿಸಿ, ಸಕಾರಾತ್ಮಕ ಹಾದಿಯಲ್ಲಿ ಸಾಗಬೇಕಿರುವುದು ಅಗತ್ಯ.
