ಇಂದಿನಿಂದ ನವರಾತ್ರಿ ಪರ್ವ ಆರಂಭವಾಗಿದೆ. ಮುಂದೆ ಸಾಲು ಸಾಲು ಹಬ್ಬ, ಉತ್ಸವಗಳನ್ನು ಬರಮಾಡಿಕೊಳ್ಳಲು ರಾಜ್ಯ, ದೇಶ ಸಜ್ಜಾಗಿದೆ. ಪರಿಸ್ಥಿತಿ ಸಾಮಾನ್ಯವಾಗಿದ್ದರೆ ಹಬ್ಬದ ಸಂಭ್ರಮ ಮತ್ತಷ್ಟು ಗರಿಗೆದರಿರುತ್ತಿತ್ತು. ಆದರೆ, ಕರೊನಾ ಸೋಂಕಿನ ಹಾವಳಿ ಅದಕ್ಕೆಲ್ಲ ತಡೆಯೊಡ್ಡಿದೆ. ಲಾಕ್ಡೌನ್ ತೆರವುಗೊಂಡಿರುವುದರಿಂದ ಮನೆಗಳಿಗೆ ಸೀಮಿತವಾಗಿ, ಸಾಮೂಹಿಕವಾಗಿ ಸರ್ಕಾರದ ನಿಯಮಗಳ ಅನುಸಾರ ಹಬ್ಬಗಳನ್ನು ಆಚರಿಸಲು ಸಾಧ್ಯವಿದೆ. ನಮ್ಮ ಸಂಸ್ಕೃತಿ, ಸಂಪ್ರದಾಯದ ಗಾಢ ಹಿನ್ನೆಲೆಯನ್ನು ಬಿಂಬಿಸುವ ಪರ್ವಗಳ ಆಚರಣೆಯನ್ನು ಸಂಪೂರ್ಣವಾಗಿ ಕೈಬಿಡಲಂತೂ ಸಾಧ್ಯವಿಲ್ಲ. ಆದರೆ, ಪರ್ವಗಳ ಆಚರಣೆ ಯಾವುದೇ ಕಾರಣಕ್ಕೂ ಕರೊನಾ ಸೋಂಕಿನ ಪ್ರಸರಣವನ್ನು ಹೆಚ್ಚಿಸುವಂತಾಗಬಾರದು ಎಂಬುದನ್ನು ನೆನಪಿನಲ್ಲಿ ಇರಿಸಿಕೊಂಡೇ ಮುಂದಡಿ ಇಡಬೇಕು. ಮಹಾರಾಷ್ಟ್ರ, ಕರ್ನಾಟಕ, ಕೇರಳದಲ್ಲಂತೂ ಪ್ರಕರಣಗಳು ಹೆಚ್ಚುತ್ತಲೇ ಇವೆ. ಇಂಥ ಹೊತ್ತಲ್ಲಿ ಸ್ವಲ್ಪ ಮೈಮರೆತರೂ ಅಪಾಯವನ್ನು ನಾವೇ ಆಹ್ವಾನಿಸಿದಂತೆ.
