*ವಿಶ್ರಾಂತ ನ್ಯಾಯಮೂರ್ತಿಗಳ ಬಲ
೧೯೭೬ ರಿಂದಲೂ ಬಯಲು ಸೀಮೆಯ ಭಾಗಗಳಿಗೆ ಶಾಶ್ವತ ನೀರಾವರಿ ಸೌಲಭ್ಯವನ್ನು ಒದಗಿಸಬೇಕೆಂದು ಹೋರಾಟ ನಡೆಸಲಾಗುತ್ತಿದೆ. ಮಾಜಿ ಶಾಸಕ ಜಿ.ವಿ.ಶ್ರೀರಾಮರೆಡ್ಡಿ ನೇತೃತ್ವದಲ್ಲಿ ಬೆಂಗಳೂರಿಗೆ ಪಾದಯಾತ್ರೆ, ಶಾಶ್ವತ ನೀರಾವರಿ ಹೋರಾಟ ಸಮಿತಿಯು ಧರಣಿ, ಉಪವಾಸ ಸತ್ಯಾಗ್ರಹ, ಬೆಂಗಳೂರು ಚಲೋ, ಜಿಲ್ಲೆಗಳ ಬಂದ್, ಅನಿರ್ದಿಷ್ಟಾವಧಿ ಮುಷ್ಕರ, ಬೃಹತ್ ರ್ಯಾಲಿ, ಜಾಗೃತಿ ಆಂದೋಲನ ಸೇರಿದಂತೆ ಕಾನೂನು ಹೋರಾಟವನ್ನು ನಡೆಸಿದೆ. ಇದರ ನಡುವೆ ಸರ್ಕಾರವು ಎತ್ತಿನಹೊಳೆ ಯೋಜನೆ, ಎಚ್.ಎನ್.ವ್ಯಾಲಿ ಹಾಗೂ ಕೆ.ಸಿ.ವ್ಯಾಲಿ ಯೋಜನೆಯ ಜಾರಿಯ ಮೂಲಕ ತೃಪ್ತಿಪಡಿಸಲು ಯತ್ನಿಸಿದ್ದು ಇದೇ ವೇಳೆ ನಿಲುವನ್ನು ಒಂದು ಬಣವು ಸ್ವಾಗತಿಸಿ, ಮತ್ತೊಂದು ಬಣವು ವಿರೋಧಿಸಿ ಇಬ್ಭಾಗವಾಗಿದ್ದು ಅನೇಕರು ಹೋರಾಟಗಳಿಂದ ಹಂತ ಹಂತವಾಗಿ ವಿಮುಖರಾಗಿದ್ದರು. ಇದು ಕೆಲ ಸ್ಥಳೀಯ ಜನಪ್ರತಿನಿಧಿಗಳಿಗೆ ಖುಷಿಯಾಗಿದ್ದು ಒಡಕಿನ ಜನರ ಸಮಸ್ಯೆಯನ್ನು ಆಲಿಸುವ ವಿಚಾರದಲ್ಲಿ ಮಂದ ಕಿವಿಯಾಗಿದ್ದರು. ಇದರ ಬಗ್ಗೆ ಅಸಮಾಧಾನ ವ್ಯಕ್ತವಾಗುತ್ತಿರುವುದರ ನಡುವೆ ಚಿಕ್ಕಬಳ್ಳಾಪುರ, ಬೆಂಗಳೂರು ಗ್ರಾಮಾಂತರ, ಕೋಲಾರ ಜಿಲ್ಲೆಯ ವ್ಯಾಪ್ತಿಯ ಹೋರಾಟ ಸಮಿತಿಗೆ ವಿಶ್ರಾಂತ ನ್ಯಾಯಮೂರ್ತಿ ಗೋಪಾಲಗೌಡ ನಾಯಕತ್ವ ವಹಿಸಿದ್ದು ಪ್ರತ್ಯೇಕ ಹೋರಾಟಗಳಿಂದ ದೂರವಾಗಿದ್ದ ಅನೇಕ ಸಂಘಟನೆಗಳು ಒಗ್ಗೂಡಿವೆ. ಇದರೊಂದಿಗೆ ನೀರಾವರಿ ಧ್ವನಿಗೆ ಹೆಚ್ಚಿನ ಬಲ ಬಂದಂತಾಗಿದೆ.
