ಕಲಾ ವಿಭಾಗದಲ್ಲೂ ಲ್ಯಾಟರಲ್ ಎಂಟ್ರಿ?: ನಿಯಮಗಳಿಗೆ ತಿದ್ದುಪಡಿ ತರಲು ಯುಜಿಸಿ ಚಿಂತನೆ

ಬೆಂಗಳೂರು: ವಿವಿಧ ಕೋರ್ಸ್ ಹಾಗೂ ಶಿಕ್ಷಣ ಸಂಸ್ಥೆಗಳ ನಡುವೆ ಕ್ರೆಡಿಟ್ ಸ್ಕೋರ್​ಗಳ ವರ್ಗಾವಣೆ, ಉನ್ನತ ಶಿಕ್ಷಣದಲ್ಲಿ ಪ್ರತಿ ಹಂತ ಪೂರೈಸಿದಾಗಲೂ ತಿಳಿದಿರಬೇಕಾದ ಕಲಿಕಾ ಅಂಶಗಳನ್ನು ವ್ಯಾಖ್ಯಾನಿಸುವ ನಿಯಮಾವಳಿ ರೂಪಿಸಲು ವಿಶ್ವವಿದ್ಯಾಲಯ ಧನ ಸಹಾಯ ಆಯೋಗ (ಯುಜಿಸಿ) ತೀರ್ವನಿಸಿದೆ.

ನಿಯಮಗಳನ್ನು ತಿದ್ದು ಪಡಿ ಮಾಡಿ ಮುಂದಿನ ಜನವರಿಯಲ್ಲಿ ಸಾರ್ವತ್ರಿಕ ಗೊಳಿಸಲಾಗುವುದು. ಈ ಮೂಲಕ ತಾಂತ್ರಿಕ ಶಿಕ್ಷಣದಲ್ಲಿ ಕ್ಷೇತ್ರದ ಮಾರ್ಗದರ್ಶಿ ಸೂತ್ರಗಳೊಂದಿಗೆ ಸಮಾನತೆ ಸಾಧಿಸಲಾಗುವುದು ಎಂದು ಯುಜಿಸಿ ಅಧ್ಯಕ್ಷ ಡಾ.ಜಗದೀಶ್​ಕುಮಾರ್ ಹೇಳಿದ್ದಾರೆ.

ಹೀಗಾಗಿ, ಸದ್ಯ ತಾಂತ್ರಿಕ ಕೋರ್ಸ್​ಗಳಲ್ಲಿ ಅವಕಾಶವಿರುವ ಲ್ಯಾಟರಲ್ ಎಂಟ್ರಿ ಸೌಲಭ್ಯ ಕಲಾ ಹಾಗೂ ಇತರ ವಿಭಾಗದ ಕೋರ್ಸ್​ಗಳಿಗೂ ಅನ್ವಯವಾಗುತ್ತಾ ಎಂಬ ನಿರೀಕ್ಷೆ ಗರಿಗೆದರಿದೆ. ಸರಳವಾಗಿ ವಿವರಿಸುವುದಾದಲ್ಲಿ ನ್ಯಾಷನಲ್ ಹೈಯರ್ ಎಜುಕೇಷನ್ ಕ್ವಾಲಿಫಿಕೇಷನ್ ಫ್ರೇಮ್ರ್ಕ್ (ಎನ್​ಎಚ್​ಇಕ್ಯುಎಫ್) ತಿದ್ದುಪಡಿ ಮಾಡಲಾಗುತ್ತಿದ್ದು, ಇದರಿಂದಾಗಿ ಪ್ರತಿ ಕೋರ್ಸ್ ಪೂರ್ಣಗೊಳಿಸಿದ ನಂತದ ಕಲಿಕಾರ್ಥಿಯು ತಿಳಿದಿರಬೇಕಾದ ಅಂಶಗಳೇನು ಎಂಬುದನ್ನು ಸ್ಪಷ್ಟಪಡಿಸಲಿದೆ. ಸರ್ಟಿಫಿಕೇಟ್ ಕೋರ್ಸ್​ಗಳಿಂದ ಪಿಎಚ್​ಡಿವರೆಗಿನ ಎಲ್ಲ ಹಂತಗಳಿಗೂ ಇದು ಅನ್ವಯವಾಗಲಿದೆ.

ಕೋರ್ಸ್​ವೊಂದನ್ನು ಪೂರ್ಣಗೊಳಿಸಲು ಹಾಗೂ ಮುಂದಿನ ಹಂತಕ್ಕೆ ತೆರಳಲು ವಿದ್ಯಾರ್ಥಿಯೊಬ್ಬ ಗಳಿಸಬೇಕಾದ ಕನಿಷ್ಠ ಕ್ರೆಡಿಟ್ ಸ್ಕೋರ್ ನಿಗದಿಪಡಿಸಲಿದೆ. ಈ ಮೊದಲು ಎನ್​ಎಚ್​ಇಕ್ಯುಎಫ್ ನಿಯಮಗಳಲ್ಲಿ 5ರಿಂದ 10ರವರೆಗೆ ಸ್ಕೇಲ್ ನಿಗದಿ ಮಾಡಲಾಗಿತ್ತು. ಆದರೆ, ನ್ಯಾಷನಲ್ ಸ್ಕಿಲ್ ಕ್ವಾಲಿಫಿಕೇಷನ್ ಫ್ರೇಮ್ರ್ಕ್​ನಲ್ಲಿ (ಎನ್​ಎಸ್​ಕ್ಯುಎಫ್) ಈ ಪ್ರಮಾಣವನ್ನು 4.5ರಿಂದ 8ರವರೆಗೆ ನಿಗದಿ ಮಾಡಲಾಗಿದೆ. ಈ ಕಾರಣಕ್ಕಾಗಿ ಎರಡೂ ನಿಯಮಗಳಲ್ಲಿ ವ್ಯತ್ಯಾಸವಿದೆ. ಪ್ರತಿ ಶೈಕ್ಷಣಿಕ ಹಂತದ ಪ್ರವೇಶಕ್ಕೆ ನಿಗದಿತ ಅರ್ಹತೆ, ಲ್ಯಾಟರಲ್ ಎಂಟ್ರಿಗೆ ಪೂರ್ವ ನಿರ್ಧರಿತ ಅಂಶಗಳು ಹಾಗೂ ಹಿಂದಿನ ಕಲಿಕಾ ಫಲಗಳ ಸಾಧನೆಗೆ ದೃಢೀಕರಣ ಮೊದಲಾವುಗಳನ್ನು ಸೂಚಿಸುತ್ತದೆ. ಈ ಕಾರಣಕ್ಕಾಗಿ ಕಲಿಕೆಯ ಸಮತಲ ಹಾಗೂ ಉರ್ಧ್ವ ಚಲನೆಗೆ ಅಡ್ಡಿಯಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಎನ್​ಎಚ್​ಇಕ್ಯುಎಫ್​ನಲ್ಲೂ 4.5-8ರವರೆಗಿನ ಪ್ರಮಾಣವನ್ನೇ ಅನುಸರಿಸಲಾಗುವುದು ಎಂದು ಜಗದೀಶ್ ಹೇಳಿದ್ದಾರೆ.

ಎನ್​ಇಪಿ ಅನ್ವಯ ತಿದ್ದುಪಡಿ: ರಾಷ್ಟ್ರೀಯ ಶಿಕ್ಷಣ ನೀತಿ (ಎನ್​ಇಪಿ) ಅನ್ವಯ 4 ವರ್ಷಗಳ ಪದವಿ ಶಿಕ್ಷಣ ಆರಂಭಿಸಲಾಗಿದೆ. ಇದರಲ್ಲಿ ಬಹುಹಂತದ ಪ್ರವೇಶ ಹಾಗೂ ನಿರ್ಗಮನಕ್ಕೆ ಅವಕಾಶವಿದೆ. ಮೊದಲ ವರ್ಷಕ್ಕೆ ಸರ್ಟಿಫಿಕೇಟ್ 2ನೇ ವರ್ಷಕ್ಕೆ ಡಿಪ್ಲೊಮಾ, 3ನೇ ವರ್ಷ ಪದವಿ, ಅಂತಿಮ ವರ್ಷ ಆನರ್ಸ್ ನೀಡಲಾಗುತ್ತದೆ. ಇದಕ್ಕೆ ಅನುಗುಣವಾಗಿ ಎನ್​ಎಚ್​ಇಕ್ಯುಎಫ್ ನಿಯಮಗಳಿಗೆ ತಿದ್ದುಪಡಿ ಮಾಡಲಾಗುವುದು ಎಂದಿದ್ದಾರೆ.

ನಾಳೆಯಿಂದ ಕುಲಪತಿಗಳ ಚರ್ಚೆ: ಎನ್​ಎಚ್​ಇಕ್ಯುಎಫ್ ತಿದ್ದುಪಡಿಗೆ ಸಂಬಂಧಿಸಿದಂತೆ ಜಗದೀಶಕುಮಾರ್ ಮೇ 25ರಿಂದ ದೇಶದ ವಿವಿಧ ವಿವಿಗಳ ಕುಲಪತಿಗಳು ಹಾಗೂ ವಿವಿಗಳ ಮುಖ್ಯಸ್ಥರೊಂದಿಗೆ ಚರ್ಚೆ ನಡೆಸಲಿದ್ದಾರೆ. ಪರಿಷ್ಕರಣೆ ಯೋಜನೆಯ ವಿವರಗಳನ್ನು ನೀಡಲಿದ್ದಾರೆ.

https://www.vijayavani.net/this-sslc-student-needs-financial-help/

https://www.vijayavani.net/textbook-controversy-here-is-the-clarifications-by-minister/