ಕ್ಯಾನ್ಸರ್ ಜಾಗೃತಿ ಫ್ಯಾಷನ್ ಶೋದಲ್ಲಿ ಮಿಂಚಿದ ಕ್ಯಾನ್ಸರ್ ವಿರುದ್ಧ ಹೋರಾಡಿ ಗೆದ್ದ ಕನ್ನಡತಿ ಲತಾ ಕಲಿಯತ್| Latha Kaliyat

Latha Kaliyat: ನ್ಯೂಯಾರ್ಕ್ ಅಂಕಾಲಜಿ ಹೆಮಟೊಲಜಿ ಕಮ್ಯೂನಿಟಿ ಕ್ಯಾನ್ಸರ್ ಫೌಂಡೇಶನ್ ಆಯೋಜಿಸಿದ್ದ ‘ರಾಕ್ ಯುವರ್ ಸ್ಟೈಲ್’ ಪ್ಯಾಷನ್​ ಶೋ ಕಾರ್ಯಕ್ರಮದಲ್ಲಿ ಕ್ಯಾನ್ಸರ್ ಮಹಾಮಾರಿಯ ವಿರುದ್ಧ 9 ವರ್ಷಗಳಿಂದ ಸತತವಾಗಿ ಹೋರಾಡಿ ಗೆದ್ದಿರುವ 78 ವರ್ಷದ ಆಲ್ಬನಿ ಕನ್ನಡ ಕಲಿ ಶಾಲೆಯ ಟೀಚರ್ ಆಗಿ ಸೇವೆ ಸಲ್ಲಿಸುತ್ತಿರುವ ಶ್ರೀಮತಿ ಲತಾ ಕಲಿಯತ್ ಭಾಗವಹಿಸಿ ಎಲ್ಲರ ಮೆಚ್ಚುಗೆ ಪಡೆದರು.

ಫ್ಯಾಷನ್ ಶೋದಲ್ಲಿ ಭಾರತೀಯ ಸಂಸ್ಕೃತಿಯನ್ನು ಸೂಚಿಸುವ ಸುಂದರವಾದ ಸೀರೆಯನ್ನು ಧರಿಸಿ ದಸರಾ ಹಬ್ಬದ ಪ್ರಯುಕ್ತ "ಐಗಿರಿ ನಂದಿನಿ" ಹಾಡಿಗೆ ಹೆಜ್ಜೆ ಹಾಕಿದ್ದು ಎಲ್ಲರನ್ನು ರೋಮಾಂಚನಗೊಳಿಸಿತು. ಫ್ಯಾಷನ್ ಶೋ ನಲ್ಲಿ ಸುಮಾರು 20 ಜನ ಮಾಡೆಲ್​ಗಳು ಭಾಗವಹಿಸಿದ್ದರು. ಎಲ್ಲರೂ ಕ್ಯಾನ್ಸರ್ ರೋಗದ ವಿರುದ್ಧ ಹೋರಾಡಿ ಬದುಕುಳಿದವರು, ಬಳಲುತ್ತಿರುವವರು ಹಾಗೂ ಕ್ಯಾನ್ಸರ್ ರೋಗದಿಂದ ಮೃತಪಟ್ಟವರ ಸಂಬಂಧಿಕರು.

ಈ ಕಾರ್ಯಕ್ರಮದಲ್ಲಿ ಕ್ಯಾನ್ಸರ್ ರೋಗದಿಂದ ಮೃತಪಟ್ಟ ತಮ್ಮ ತಾಯಿ ಲಿಸಾ ಓನೀಲ್ ಗೌರವಾರ್ಥವಾಗಿ ಚಿಕ್ಕ ಮಕ್ಕಳಾದ ಏಳು ವರ್ಷದ ಪೇಟಾನ್ ಮತ್ತು ಇಲ್ಲೀ ಓನೀಲ್ ಭಾಗವಹಿಸಿದ್ದು ವಿಶೇಷವಾಗಿತ್ತು. ಕಾರ್ಯಕ್ರಮದ ಮುಖಾಂತರ ಕ್ಯಾನ್ಸರ್ ಓಷಧಿಯ ಸಂಶೋಧನೆಗಾಗಿ ಒಟ್ಟು $197,000 ಹಣವನ್ನು ಸಂಗ್ರಹಿಸಲಾಯಿತು.

ಇದನ್ನೂ ಓದಿ: ಸಂಪಾದಕೀಯ; ಕಠಿಣ ಮಾರ್ಗಸೂಚಿ ಅಗತ್ಯ

ನಮ್ಮ ಕನ್ನಡಿಗ ಕ್ಯಾನ್ಸರ್ ಸ್ಪೆಷಲಿಸ್ಟ್ ಡಾ. ರಾಹುಲ್ ರವಿಲ್ಲಾ ತಮ್ಮ ತಂದೆಯ ನೆನಪಿಗಾಗಿ ಫ್ಯಾಷನ್ ಶೋ ದಲ್ಲಿ ವಾಕ್ ಮಾಡಿದರು. ಅತ್ಯಂತ ಹೆಚ್ಚು ಫಂಡ್ ರೈಸ್ ಮಾಡಿದವರಲ್ಲಿ ಸುಮಾರು $14,000 ಫಂಡ್ ರೈಸ್ ಮಾಡಿದ ಡಾ. ರಾಹುಲ್ ಎರಡನೇ ಬಹುಮಾನ ಪಡೆದರು.

ಲತಾ ಕಲಿಯತ್ ಮಾತನಾಡಿ, ನನ್ನ ಫಂಡ್ ರೈಸಿಂಗ್ ಟಾರ್ಗೆಟ್ $2500 ಇತ್ತು. ಆದರೆ ನಮ್ಮ ಆಲ್ಬನಿ ಕನ್ನಡ ಸಂಘದ ಸದಸ್ಯರ ಸಹಾಯದಿಂದ ಪ್ರೋತ್ಸಾಹದಿಂದ ಸುಮಾರು $5000 ಸಂಗ್ರಹಿಸಿದ್ದೇನೆ. ಎಲ್ಲರಿಗೂ ತುಂಬು ಹೃದಯದ ಧನ್ಯವಾದಗಳು. ನಿಮ್ಮೆಲ್ಲರ ಸಹಾಯದಿಂದ, ಔಷಧಿಯನ್ನು ಕಂಡು ಹಿಡಿದು ಈ ಕ್ಯಾನ್ಸರ್ ಮಹಾಮಾರಿಯನ್ನು ಭೂಮಿಯಿಂದ ಹೊಡೆದು ಓಡಿಸುವಂತೆ ಆಗಲಿ ಎಂದು ಆಸೆ ವ್ಯಕ್ತಪಡಿಸಿದರು.

https://www.vijayavani.net/asia-cup-2025-team-india-wins-over-pak-in-the-final-but-team-india-refuses-to-accept-the-trophy