ಜಿ-20 ಶೃಂಗಸಭೆಯ ಸರ್ವಸಮ್ಮತ ‘ದೆಹಲಿ ಘೊಷಣೆ’ ರೂಪುಗೊಳ್ಳುವುದರ ಪ್ರಧಾನ ಸೂತ್ರಧಾರಿಯಾದ ಜಿ-20 ಶೆರ್ಪಾ ಅಮಿತಾಬ್ ಕಾಂತ್ ಅವರನ್ನು ಭಾನುವಾರ ಮನದುಂಬಿ ಹೊಗಳಿದ ಹಿರಿಯ ಕಾಂಗ್ರೆಸ್ ನಾಯಕ ಶಶಿ ತರೂರ್, ‘ಇದು ಜಿ-20ರಲ್ಲಿ ಭಾರತಕ್ಕೆ ಹೆಮ್ಮೆಯ ಕ್ಷಣವಾಗಿದೆ’ ಎಂದು ವರ್ಣಿಸಿದ್ದಾರೆ. ಐಎಎಸ್ ಅಧಿಕಾರಿ ಅಮಿತಾಬ್ ಕಾಂತ್ ಜಿ-20 ಶೃಂಗಸಭೆ ನಡೆಸುವ ಹೊಣೆಗಾರಿಕೆ ಹೊತ್ತಿದ್ದಕ್ಕಾಗಿ ಅವರನ್ನು ಜಿ-20 ಶೆರ್ಪಾ ಎಂದು ಸಂಬೋಧಿಸಲಾಗುತ್ತಿತ್ತು. ಜಿ-20 ದೆಹಲಿ ಘೊಷಣೆಯಲ್ಲಿ ರಷ್ಯಾ-ಯೂಕ್ರೇನ್ ಕುರಿತ ವಾಕ್ಯವೃಂದದ ಬಗ್ಗೆ ಸಹಮತವನ್ನು ರೂಪಿಸುವ ಪ್ರಕ್ರಿಯೆಯನ್ನು ಸಂದರ್ಶನವೊಂದರಲ್ಲಿ ಕಾಂತ್ ವಿವರಿಸಿದ್ದನ್ನು ಟ್ಯಾಗ್ ಮಾಡಿ, ಇದೊಂದು ಮಹತ್ಸಾಧನೆ ಎಂದು ತರೂರ್ ಹೇಳಿದ್ದಾರೆ. ‘ನೀವು ಐಎಎಸ್ ಅನ್ನು ಆಯ್ದುಕೊಂಡಾಗ ಐಎಫ್ಎಸ್ ಒಬ್ಬ ಮುತ್ಸದ್ದಿ ರಾಜತಾಂತ್ರಿಕನನ್ನು ಕಳೆದುಕೊಂಡಂತೆ ಕಾಣುತ್ತದೆ’ ಎಂದು ಮಾಜಿ ಅಂಡರ್ ಸೆಕ್ರೆಟರಿ-ಜನರಲ್ ಆಗಿರುವ ತರೂರ್ ಶನಿವಾರ ತಡ ರಾತ್ರಿ ‘ಎಕ್ಸ್’ ಪೋಸ್ಟ್ನಲ್ಲಿ ಹೇಳಿದ್ದಾರೆ. ರಷ್ಯಾ ಮತ್ತು ಚೀನಾದೊಂದಿಗೆ ಸಮಾಲೋಚನೆ ನಡೆಸಿ ಕಳೆದ ರಾತ್ರಿಯಷ್ಟೇ ಅಂತಿಮ ಕರಡನ್ನು ಸಿಸದ್ಧಪಡಿಸಲಾಯಿತು ಎಂದು ‘ದೆಹಲಿ ಘೊಷಣೆ’ ಬಗ್ಗೆ ಭಾರತದ ಜಿ-20 ಶೆರ್ಪಾ ಹೇಳಿದ್ದರು.
