ಹೆಂಗಸರೇ ಹುಷಾರ್: ಲೈಂಗಿಕ ಶೋಷಣೆ ಜತೆಗೆ ಬ್ಯಾಂಕ್ ಖಾತೆಗಳಿಗೂ ಬೀಳುತ್ತೆ ಕನ್ನ...

| ಗೋವಿಂದರಾಜು ಚಿನ್ನಕುರ್ಚಿ ಬೆಂಗಳೂರು

ಡಿಜಿಟಲ್ ವಹಿವಾಟನ್ನೇ ವಂಚನೆಗೆ ಬಂಡವಾಳ ಮಾಡಿಕೊಂಡಿರುವ ಸೈಬರ್ ಕಳ್ಳರೀಗ ಮಹಿಳೆಯರನ್ನೇ ಟಾರ್ಗೆಟ್ ಮಾಡಿ ಟೋಪಿ ಹಾಕುತ್ತಿರುವ ಪ್ರಕರಣಗಳು ರಾಜ್ಯದಲ್ಲಿ ಹೆಚ್ಚುತ್ತಿವೆ. ಫೇಸ್​ಬುಕ್, ಟ್ವಿಟರ್, ಇನ್​ಸ್ಟಾಗ್ರಾಂ, ವಾಟ್ಸ್​ಆಪ್, ಮ್ಯಾಟ್ರಿಮೋನಿಯಲ್​ನಲ್ಲಿ ಅಮಾಯಕ ಯುವತಿಯರು, ಮಹಿಳೆಯರಿಗೆ ಗಾಳ ಹಾಕಿ ಲೈಂಗಿಕವಾಗಿ ಬಳಸಿಕೊಳ್ಳುವುದರ ಜತೆಗೆ ಬ್ಲಾ್ಯಕ್​ವೆುೕಲ್ ಮೂಲಕವೂ ಕೋಟ್ಯಂತರ ರೂಪಾಯಿ ದೋಚುತ್ತಿದ್ದಾರೆ. ಕಳೆದ ಮೂರು ವರ್ಷಗಳಲ್ಲಿ ದಾಖಲಾದ ಹೆಣ್ಮಕ್ಕಳ ಮೇಲಿನ ಸೈಬರ್ ಅಪರಾಧ ಪ್ರಕರಣಗಳಿಗೆ ಹೋಲಿಸಿದರೆ 2020ನೇ ಸಾಲಿನಲ್ಲಿ ಅಂದಾಜು 3.5 ಪಟ್ಟು ಕೇಸ್​ಗಳು ಹೆಚ್ಚಾಗಿರುವುದು ಸಮಸ್ಯೆಯ ಗಂಭೀರತೆಗೆ ಸಾಕ್ಷಿ.

ರಾಜ್ಯ ಅಪರಾಧ ದಾಖಲಾತಿ ವಿಭಾಗದ ವರದಿ ಈ ಆತಂಕಕಾರಿ ಮಾಹಿತಿಯನ್ನು ಬಹಿರಂಗಪಡಿಸಿದೆ. ಇಂದು ಪ್ರತಿಯೊಬ್ಬರ ಕೈನಲ್ಲೂ ಸ್ಮಾರ್ಟ್​ಫೋನ್ ಇರುತ್ತದೆ. ಅಗ್ಗವಾದ ಇಂಟರ್ನೆಟ್ ಸೌಲಭ್ಯ ಪಡೆಯುವ ಬಹುತೇಕ ಮಂದಿ ಫೇಸ್​ಬುಕ್, ಟ್ವಿಟರ್, ವಾಟ್ಸ್​ಆಪ್ ಮೋಹಕ್ಕೆ ಬಿದ್ದು ಅದರ ಮೂಲಕ ಅಪರಿಚಿತರ ಸ್ನೇಹಕ್ಕೆ ಮನಸೋಲುತ್ತಿದ್ದಾರೆ. ಇದನ್ನೇ ದುರುಪಯೋಗ ಪಡಿಸಿಕೊಳ್ಳುತ್ತಿರುವ ಸೈಬರ್ ಖರೀಮರು ಅಮಾಯಕ ಯುವತಿಯರಿಗೆ ಬಲೆ ಬೀಸಿ ಸ್ನೇಹದ ನೆಪದಲ್ಲಿ ಸನಿಹವಾಗಿ ಸುತ್ತಾಡಿ ಪ್ರೀತಿ, ಮದುವೆ ಎಂದೆಲ್ಲ ತಲೆಕೆಡಿಸಿ ದೈಹಿಕವಾಗಿ ಬಳಸಿಕೊಂಡು ದೂರ ತಳ್ಳುತ್ತಾರೆ. ಜಾಲತಾಣದ ಸ್ನೇಹಿತರಿಂದಲೇ ಲೈಂಗಿಕ ಶೋಷಣೆಗಳು ಹೆಚ್ಚುತ್ತಿರುವ ಪ್ರಕರಣಗಳ ಸಂಖ್ಯೆ ಏರಿಕೆಯಾಗುತ್ತಿದೆ.

ಇನ್ನೂ ಕೆಲವರು ಕರೊನಾ ಲಾಕ್​ಡೌನ್​ನಿಂದ ಕೆಲಸ ಕಳೆದು ಕೊಂಡವರನ್ನು ಟಾರ್ಗೆಟ್ ಮಾಡಿ ಪ್ರತಿಷ್ಠಿತ ಕಂಪನಿಗಳಲ್ಲಿ ಕೆಲಸ ಕೊಡಿಸುವ ನೆಪದಲ್ಲಿ ವಾಟ್ಸ್​ಆಪ್ ಲೈವ್ ಇಂಟರ್​ವ್ಯೂ ಎಂದು ನಂಬಿಸಿ ಯುವತಿಯರ ಖಾಸಗಿ ವಿಡಿಯೋ, ಫೋಟೋ ಪಡೆದುಕೊಳ್ಳುತ್ತಾರೆ. ಬಳಿಕ ಬೆದರಿಕೆ ಒಡ್ಡಿ ಸುಲಿಗೆ ಅಥವಾ ಮುಂಗಡ ಶುಲ್ಕವೆಂದು ಹಣ ಪಡೆದು ಮೋಸ ಮಾಡುತ್ತಿದ್ದಾರೆ. ಸೆಲ್ಪಿ ಗೀಳಿಗೆ ಬೀಳುವ ಯುವತಿಯರು ಸಾರ್ವಜನಿಕ ಸ್ಥಳಗಳಲ್ಲಿ ಸೆಲ್ಪಿ ತೆಗೆದುಕೊಂಡು ಅಥವಾ ವಿಡಿಯೋ ಮಾಡಿಕೊಂಡು ಆ ದೃಶ್ಯಗಳನ್ನು ಜಾಲ ತಾಣಗಳಲ್ಲಿ ಹಾಕಿ ಸಂಭ್ರಮಿಸುತ್ತಾರೆ. ಅದನ್ನು ಕಿಡಿಗೇಡಿಗಳು ತಿರುಚಿ ವೈರಲ್ ಮಾಡಿ ಮರ್ಯಾದೆ ತೆಗೆಯುವ ಪ್ರಕರಣ ಬೆಳಕಿಗೆ ಬರುತ್ತಿವೆ.

ವಧು ವರಾನ್ವೇಷಣೆ ವೆಬ್​ಸೈಟ್​ಗಳು ವಂಚನೆ ಅಡ್ಡೆಯಾಗುತ್ತಿವೆ. ಮ್ಯಾಟ್ರಿಮೋನಿಯಲ್​ನಲ್ಲಿ ನಕಲಿ ಖಾತೆ ತೆರೆದು, ವರನ ಹುಡುಕಾಟ ನಡೆಸುವ ವಿಚ್ಛೇದಿತ ಮಹಿಳೆ ಮತ್ತು ಉದ್ಯೋಗಸ್ಥ ಯುವತಿಯರನ್ನು ವಿದೇಶದಲ್ಲಿ ಕೆಲಸ, ಉದ್ಯಮಿ ಎಂದು ನಂಬಿಸಿ ಬುಟ್ಟಿಗೆ ಹಾಕಿಕೊಳ್ಳುತ್ತಾರೆ. ಆನಂತರ ವಿದೇಶದಿಂದ ಉಡುಗೊರೆ, ಆಭರಣ ಕೊರಿಯರ್ ಮಾಡಿರುವುದಾಗಿ ಹೇಳುತ್ತಾರೆ. ಮತ್ತೊಬ್ಬ ವಂಚಕ ಕಸ್ಟಮ್್ಸ ಅಧಿಕಾರಿ ಸೋಗಿನಲ್ಲಿ ಕರೆ ಮಾಡಿ ತೆರಿಗೆ ಪಾವತಿಸಿ ಪಾರ್ಸೆಲ್ ಬಿಡಿಸಿಕೊಳ್ಳುವಂತೆ ಹೇಳಿ ಲಕ್ಷಾಂತರ ರೂ. ಬ್ಯಾಂಕ್ ಖಾತೆಗೆ ಜಮಾ ಮಾಡಿಕೊಂಡು ವಂಚಿಸುವ ಪ್ರಕರಣಗಳು ಸೈಬರ್ ಕ್ರೖೆಂ ಠಾಣೆಯಲ್ಲಿ ಪ್ರತಿದಿನ ದಾಖಲಾಗುತ್ತಿವೆ.

ನಕಲಿ ಖಾತೆಗಳ ಹಾವಳಿ: ಲೈಂಗಿಕ ಶೋಷಣೆ, ಹಣದ ವಂಚನೆ ಉದ್ದೇಶದಿಂದಲೇ ಫೇಸ್​ಬುಕ್, ಟ್ವಿಟರ್, ಇನ್​ಸ್ಟಾಗ್ರಾಮ್ಲ್ಲಿ ನಕಲಿ ಖಾತೆ ತೆರೆಯುವ ಸೈಬರ್ ಖದೀಮರ ಸಂಖ್ಯೆ ಹೆಚ್ಚಾಗಿದೆ. ಕರೊನಾ ಲಾಕ್​ಡೌನ್​ನಿಂದ ಶುರುವಾಗಿರುವ ಆನ್​ಲೈನ್ ಕ್ಲಾಸ್​ನಲ್ಲಿ ವಿದ್ಯಾರ್ಥಿಗಳು ಸಂಕಷ್ಟಕ್ಕೆ ಸಿಲುಕಿರುವ ದೂರುಗಳು ಸೈಬರ್ ಕ್ರೖೆಂ ಠಾಣೆ ಮೆಟ್ಟಿಲೇರುತ್ತಿವೆ. ಮತ್ತೊಂದೆಡೆ ಪಾಲಕರಿಗೆ ಆತಂಕ ಹೆಚ್ಚಾಗಿದೆ.

ಲಾಕ್​ಡೌನ್​ನಲ್ಲೂ ನಿಂತಿಲ್ಲ: ಕರೊನಾ ಲಾಕ್​ಡೌನ್​ನಲ್ಲಿಯೂ ಮಹಿಳೆಯರ ಮೇಲಿನ ಸೈಬರ್ ಅಪರಾಧಗಳು ಕಡಿಮೆ ಆಗಿಲ್ಲ. ಜನವರಿಯಲ್ಲಿ 92 ಕೇಸು, ಫೆಬ್ರವರಿ-80, ಮಾರ್ಚ್​ನಲ್ಲಿ 149 ಪ್ರಕರಣಗಳು ದಾಖಲಾಗಿದ್ದವು. ಲಾಕ್​ಡೌನ್​ನ ಬಳಿಕ ಏಪ್ರಿಲ್​ನಲ್ಲಿ 89, ಮೇ-126, ಜೂನ್-176, ಜುಲೈ-181, ಆಗಸ್ಟ್-189, ಸೆಪ್ಟೆಂಬರ್-197 ಸೈಬರ್ ಪ್ರಕರಣಗಳು ದಾಖಲಾಗಿವೆ.

ಹೀಗೆಲ್ಲ ವಂಚಿಸ್ತಾರೆ..

• ವೈಟ್​ಫೀಲ್ಡ್​ನ ವಿದುಶಿ(31) ಎಂಬಾಕೆಗೆ ಮ್ಯಾಟ್ರಿಮೋನಿಯಲ್​ನಲ್ಲಿ ಪರಿಚಯನಾದ ಸೈಬರ್ ಕಳ್ಳ ಇಂಗ್ಲೆಂಡ್​ನಲ್ಲಿ ಸಿವಿಲ್ ಇಂಜಿನಿಯರಿಂಗ್​ನಲ್ಲಿ ಪಿಎಚ್​ಡಿ ಮಾಡುತ್ತಿದ್ದುದಾಗಿ ನಂಬಿಸಿ ಬಳಿಕ 25 ಲಕ್ಷ ರೂ. ಪಡೆದು ವಂಚಿಸಿದ್ದ. ವಿದುಶಿ ಕೊಟ್ಟ ದೂರಿನ ಮೇರೆಗೆ ವೈಟ್​ಫೀಲ್ಡ್ ಸಿಇಎನ್ ಪೊಲೀಸರು ಆರೋಪಿ ಬ್ರೖೆಟ್ ಎಂಬಾತನನ್ನು ಬಂಧಿಸಿದಾಗ 10 ವಂಚನೆ ಪ್ರಕರಣಗಳು ಬೆಳಕಿಗೆ ಬಂದಿವೆ.
• ಇನ್​ಸ್ಟಾಗ್ರಾಮ್​ನಲ್ಲಿ ಯುವತಿಗೆ ಪರಿಚಯವಾಗಿದ್ದ ಪುದುಚೆರಿ ಮೂಲದ ಕಾರ್ತಿಕ್ ಎಂಬಾತ ಮದುವೆ ಆಗುವುದಾಗಿ ನಂಬಿಸಿ 2 ಲಕ್ಷ ರೂ. ಮತ್ತು 6 ಗ್ರಾಂ ಉಂಗುರ ಪಡೆದು ವಂಚಿಸಿದ್ದಾನೆ.
• ನಾಗರಬಾವಿಯ ದಿವ್ಯಾ ಎಂಬಾಕೆ ಮೊಬೈಲ್​ಗೆ ಕರೆ ಮಾಡಿದ ವಂಚಕ ಬ್ಯಾಂಕ್ ವ್ಯವಸ್ಥಾಪಕ ಎಂದು ನಂಬಿಸಿ ಪ್ರಧಾನಿ ಮೋದಿಯಿಂದ ಹಣ ಬಂದಿದ್ದು, ಜಮೆ ಮಾಡುವುದಾಗಿ ಹೇಳಿ ಬ್ಯಾಂಕ್ ವಿವರ ಪಡೆದು 47 ಸಾವಿರ ರೂ.ಗೆ ಕನ್ನ ಹಾಕಿದ್ದಾನೆ.
• ಕೆಲಸಕ್ಕಾಗಿ ಅರ್ಜಿ ಸಲ್ಲಿಸಿದ್ದ ಯುವತಿಗೆ ವಿಮಾನಯಾನ ಸಂಸ್ಥೆಯಲ್ಲಿ ನೌಕರಿ ಕೊಡಿಸುವುದಾಗಿ ಹೇಳಿ ಆನ್​ಲೈನ್​ನಲ್ಲಿ ಸಂದರ್ಶನ ನಡೆಸಿ ಶುಲ್ಕವೆಂದು 18 ಲಕ್ಷ ರೂ. ಪಡೆದು ವಂಚನೆ, ಇಸಿಎನ್ ಠಾಣೆಗೆ ಯುವತಿ ದೂರು.

ಎಚ್ಚರಿಕೆ ಇರಲಿ

• ಫೇಸ್​ಬುಕ್, ಟ್ವಿಟರ್​ನಲ್ಲಿ ಅಪರಿಚಿತರ ಸ್ನೇಹದಿಂದ ದೂರವಿರಿ
• ಜಾಲತಾಣದಲ್ಲಿ ಅನಗತ್ಯವಾಗಿ ಲೈಕ್, ಶೇರ್ ಮಾಡುವುದು ಅಪಾಯ
• ಅನಗತ್ಯವಾಗಿ ಫೋಟೋ, ವಿಡಿಯೋ ಅಪ್​ಲೋಡ್ ಮಾಡಬೇಡಿ
• ನೋಂದಾಯಿತ ವಧು ವರಾನ್ವೇಷಣೆ ಕೇಂದ್ರದ ಜತೆಯಷ್ಟೇ ವ್ಯವಹರಿಸಿ
• ಮ್ಯಾಟ್ರಿಮೋನಿಯಲ್ ಭಾವಿ ವರನ ಮೇಲೆ ಸದಾ ನಿಗಾ ಇರಲಿ
• ಹಿಂದೆಮುಂದೆ ತಿಳಿಯದೆ ಅಪರಿಚಿತರ ಅನಗತ್ಯ ಭೇಟಿ, ಸ್ನೇಹ ಒಳಿತಲ್ಲ
• ಕಸ್ಟಮ್ಸ್​ ಅಧಿಕಾರಿ ಸೋಗಿನಲ್ಲಿ ಕರೆ ಮಾಡುವವರ ಬಗ್ಗೆ ಎಚ್ಚರ