ಕೆಂಚನಕುಪ್ಪೆ ವಾರ್ಡ್‌ನಲ್ಲಿ ಸೌಕರ್ಯ ಕೊರತೆ

* ಚರಂಡಿ ನೀರಿನಿಂದ ಸಾಂಕ್ರಾಮಿಕ ಭೀತಿ

* ಪುರಸಭೆಯಲ್ಲಿ ಅಧ್ಯಕ್ಷ-ಉಪಾಧ್ಯಕ್ಷರ ಆಯ್ಕೆಗೆ ಗ್ರಹಣ

* ಅಧಿಕಾರಿಗಳೇ ಅಧಿಪತಿಗಳು

ಚೇತನ್ ಚಕ್ಕೆರೆ ಬಿಡದಿ

ಬಿಡದಿ ಪಟ್ಟಣಕ್ಕೆ ಕೂಗಳತೆ ದೂರದಲ್ಲಿರುವ ಕೆಂಚನಕುಪ್ಪೆ ವಾರ್ಡ್ ಹಲವು ಸಮಸ್ಯೆಗಳ ತಾಣವಾಗಿದೆ. ರಸ್ತೆ, ಚರಂಡಿ, ಯುಜಿಡಿ, ಕಸದ ಸಮಸ್ಯೆ ನಡುವೆ ವಾರ್ಡ್ ನಿವಾಸಿಗಳು ಜೀವನ ನಡೆಸುತ್ತಿದ್ದಾರೆ.

ಹೌದು. ಬಿಡದಿ ಪುರಸಭೆಯ 4ನೇ ವಾರ್ಡ್‌ನಲ್ಲಿ ಸಾಕಷ್ಟು ಮೂಲ ಸೌಕರ್ಯ ಕೊರತೆ ಕಂಡು ಬರುತ್ತಿದೆ. ಪುರಸಭೆಗೆ ದೊಡ್ಡ ವಾರ್ಡ್ ಎನ್ನಿಸಿಕೊಂಡಿರುವ ಕೆಂಚನಕುಪ್ಪೆ ಗ್ರಾಮದಲ್ಲಿ ಪ್ರಮುಖವಾಗಿ ರಸ್ತೆಗಳಲ್ಲಿ ಗುಂಡಿಗಳು ಬಿದ್ದಿವೆ. ಚರಂಡಿ ನಿರ್ವಹಣೆ ಇಲ್ಲದೆ ಅಲ್ಲಲ್ಲಿ ಕೊಳಚೆ ಸಂಗ್ರಹಗೊಂಡು ಸಾಂಕ್ರಾಮಿಕ ರೋಗ ಹರಡುವ ಭೀತಿ ಸೃಷ್ಟಿಯಾಗಿದೆ.

ಪುರಸಭೆಯಿಂದ ವಾರ್ಡ್‌ನಲ್ಲಿ ನಡೆಸುತ್ತಿರುವ ಯುಜಿಡಿ ಕಾಮಗಾರಿಯನ್ನು ಅಲ್ಲಲ್ಲಿ ಹಾಗೆ ಬಿಡಲಾಗಿದೆ. ಇದರಿಂದಾಗಿ ಹಲವು ಮನೆಗಳಿಗೆ ತೊಂದರೆಯಾಗುತ್ತಿದೆ. ಇದರಿಂದಾಗಿ ಗುಂಡಿಗಳು ಬಿದ್ದು ವಾಹನಗಳ ಸವಾರರು ಹರಸಹಾಸ ಪಡುವ ಸ್ಥಿತಿ ನಿರ್ಮಾಣವಾಗಿದೆ.

ಪುರಸಭೆಯಲ್ಲಿ ಅಧ್ಯಕ್ಷ-ಉಪಾಧ್ಯಕ್ಷರ ಆಯ್ಕೆಗೆ ಗ್ರಹಣ ಹಿಡಿದಿರುವ ಕಾರಣದಿಂದಾಗಿ ಅಧಿಕಾರಿಗಳೇ ಅಧಿಪತಿಗಳಾಗಿದ್ದು, ಅವರು ಮಾಡಿದ್ದೆ ಕೆಲಸ ಸರಿ ಎನ್ನಬೇಕಾದ ಪರಿಸ್ಥಿತಿ, ಇದರ ಜತೆಗೆ ಬೀದಿ ದೀಪಗಳ ವ್ಯವಸ್ಥೆ ಇಲ್ಲದೆ ರಾತ್ರಿ ವೇಳೆ ಕತ್ತಲೆಲ್ಲೇ ಸಂಚರಿಸುವಂತಾಗಿದೆ.

ಆಗಬೇಕಿರುವ ಕೆಲಸಗಳು

* ಡಾಂಬರ್ ಹಾಗೂ ಸಿಮೆಂಟ್ ಕಾಣದ ರಸ್ತೆಗಳಿಗೆ ಮುಕ್ತಿ ನೀಡಬೇಕಿದೆ.

* ವಾರ್ಡ್‌ನಲ್ಲಿ ಸೂಕ್ತ ಚರಂಡಿ ವ್ಯವಸ್ಥೆ ಆಗಬೇಕಿದೆ.

* ಬೀದಿಗಳಲ್ಲಿ ವಿದ್ಯುತ್ ಕಂಬಕ್ಕೆ ಲೈಟ್‌ಗಳ ವ್ಯವಸ್ಥೆ ಮಾಡಬೇಕಿದೆ.

* ಅಂಬೇಡ್ಕರ್ ಭವನ ನಿರ್ಮಾಣ ವಾಗಬೇಕಿದೆ.

* ನೆಲ್ಲಿಗುಡ್ಡೆ ಕೆರೆಯಿಂದ ಹಲವು ಹಳ್ಳಿಗಳಿಗೆ ನೀರು ಹರಿಯುವ ಕಾಲುವೆಗೆ ಕಲುಷಿತ ನೀರು ಸೇರುತ್ತಿದ್ದು ಇದರ ಬಗ್ಗೆ ಕ್ರಮ ವಹಿಸಬೇಕಿದೆ.

* ಯುಜಿಡಿ ಕಾಮಗಾರಿ ಪೂರ್ಣ ಗೊಳ್ಳಬೇಕು.

* ಕಾವೇರಿ ನೀರನ್ನು ಕುಡಿಯುವ ಉದ್ದೇಶದಿಂದ ತರುತ್ತಿರುವ ಪೈಪ್‌ಲೈನ್ ಕಾಮಗಾರಿ ಶೀಘ್ರ ಪೂರ್ಣಗೊಳಿಸಬೇಕಿದೆ.

ರಮೇಶ್, ವಾರ್ಡ್ ಸದಸ್ಯ

ಮೊಬೈಲ್ ನಂಬರ್- 9964662889

ರಾಮಣ್ಣ, ಕೆಂಚನಕುಪ್ಪೆ ವಾರ್ಡ್ ನಿವಾಸಿ