ಕಳೆದ ವರ್ಷ ತೆರೆಕಂಡ ಹಿಟ್ ಮಲಯಾಳಂ ಸಿನಿಮಾ "ಮಂಜುಮ್ಮೆಲ್ ಬಾಯ್ಸ್' ಖ್ಯಾತಿಯ ಚಿದಂಬರಂ ನಿರ್ದೇಶನ ಮತ್ತು ವೆಂಕಟ್ ಕೆ. ನಾರಾಯಣ್ ಒಡೆತನದ ಕೆವಿಎನ್ ಪ್ರೊಡಕ್ಷನ್ಸ್ ನಿರ್ಮಾಣದಲ್ಲಿ ಮೂಡಿಬಂದ ಸಿನಿಮಾ "ಬಾಲನ್ ದ ಬಾಯ್'. ಈ ಚಿತ್ರಕ್ಕೆ "ಆವೇಷಂ' ನಿರ್ದೇಶಕ ಜಿತು ಮಾಧವನ್ ಚಿತ್ರಕಥೆಯಿದ್ದು, ಮಾ. ಚಂದು ಸಲೀಮ್ ಕುಮಾರ್ "ಬಾಲನ್' ಪಾತ್ರದಲ್ಲಿ ನಟಿಸಿದ್ದಾನೆ. ವಿಶೇಷ ಅಂದರೆ ಈ ಚಿತ್ರವಿಗ ಪ್ರತಿಷ್ಠಿತ ಕಾನ್ಸ್ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಪ್ರದರ್ಶನಗೊಳ್ಳಲಿದೆ. ಇದೇ ತಿಂಗಳ 12ರಿಂದ 23ರವರೆಗೆ 79ನೇ ಕಾನ್ಸ್ ಫಿಲಂ ಫೆಸ್ಟಿವಲ್ ನಡೆಯಲಿದ್ದು, ಮೇ 14ರಂದು "ಬಾಲನ್ ದ ಬಾಯ್' ಚಿತ್ರದ ವಿಶೇಷ ಪ್ರದರ್ಶನ ಆಯೋಜಿಸಲಾಗಿದೆ. ಆ ಮೂಲಕ ದೇಶ, ವಿದೇಶಗಳ ನಿರ್ಮಾಪಕರು, ವಿತರಕರು, ಪ್ರದರ್ಶಕರ ಗಮನ ಸೆಳೆದು, ಭಾರತೀಯ ಚಿತ್ರಗಳಿಗೆ ಅಂತಾರಾಷ್ಟ್ರೀಯ ಮಾರುಕಟ್ಟೆ ಸೃಷ್ಟಿಸಿಕೊಳ್ಳುವ ಪ್ಲ್ಯಾನ್ ಚಿತ್ರತಂಡದ್ದು. "ಬಾಲನ್ ದ ಬಾಯ್' ಚಿತ್ರ ಕಾನ್ಸ್ನಲ್ಲಿ ಪ್ರದರ್ಶನಗೊಳ್ಳುತ್ತಿರುವ ಬಗ್ಗೆ ನಿರ್ದೇಶಕ ಚಿದಂಬರಂ, "ನಾವು ಎಲ್ಲಿಂದ ಬಂದೆವು ಎಂಬ ಹೊರೆಯ ಜತೆಗೆ ನಾವೆಲ್ಲಿಗೆ ಹೋಗಿ ಮುಟ್ಟುತ್ತೇವೆ ಎಂಬ ಹಸಿವನ್ನು ಸಹ ನಮಗೆ ಗೊತ್ತಿಲ್ಲದೇ ನಾವು ಹೊತ್ತಿರುತ್ತೇವೆ. ಈ ಎರಡನ್ನೂ ಅನುಭವಿಸಿದ, ಹೇಳಿಕೊಳ್ಳಲಾಗದೇ, ಉತ್ತರವೂ ಸಿಗದೇ ಪರದಾಡುತ್ತಿರುವ ವ್ಯಕ್ತಿಗಾಗಿ ನಾನು ಈ ಸಿನಿಮಾ ಮಾಡಿದೆ. ಅರ್ಥವಾಗುವ ಮುನ್ನವೇ ಅನುಭವಕ್ಕೆ ಸಿಗುವ ಕಥೆಯಿದು. ಹೀಗಾಗಿಯೇ ಕಾನ್ಸ್ನಂತಹ ಚಿತ್ರೋತ್ಸವದ ಭಾಗವಾಗಿರುವುದು ಖುಷಿ ನೀಡಿದೆ' ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ. ಹಾಗೇ ನಿರ್ಮಾಪಕ ವೆಂಕಟ್ ಕೆ. ನಾರಾಯಣ್, ""ಬಾಲನ್ ದ ಬಾಯ್' ಕೇವಲ ಒಂದು ಸಿನಿಮಾ ಅಲ್ಲ. ಇದೊಂದು ಸ್ಟೇಟ್ಮೆಂಟ್. ನೀನು ಚಿತ್ರರಂಗಕ್ಕೆ ಏಕೆ ಬಂದೆ ಎಂದು ನೆನಪಿಸುವ ಚಿತ್ರ. ಮಲಯಾಳಂ ಚಿತ್ರರಂಗ ಯಾರೂ ಕಡೆಗಣಿಸಲಾಗದಂತಹ ಚಿತ್ರಗಳನ್ನು ಮಾಡುತ್ತಿದೆ. ಈ ಬಾರಿಯ ಕಾನ್ಸ್ನಲ್ಲಿ "ಬಾಲನ್ ದ ಬಾಯ್' ಚರ್ಚೆಯ ಕೇಂದ್ರಬಿಂದುವಾಗಲಿದೆ ಎಂಬ ನಂಬಿಕೆ ಇದೆ' ಎಂದಿದ್ದಾರೆ.
